Lukaji 15 - Mazu Otchena a Mulungu

Yofwalrafwaniha ya nibila nimohi nodimela

¹ Anamasokiha misoko atene na atu otega atene kohozaga valigi Yesu ira kavuruwane jafundjihaga liye.

² Mwa enne aFarizewu na anamafundjiha malamulo kohoromaga nong'ona keraga: <<Kamuoneni liye unorumela kala vamohi na atu otega, aliwa djaga vamohi.>>

³ Evale Yesu agaavwile kawongaga enne, ohoromaga awongela yofwalrafwaniha ila, eraga:

⁴ <<Kodi bani muwari mwa nyo uni aganna mabila 100, nimohi nidimela amala liye ahadowa nisaka? Mutu adimeleliwa nibila naye nimohi, unohiya mabilaye 99 kokolani ule, liye dowa roma sayela nimohi nidimenle nne ante afiyede nifwanya.

⁵ Liye anifwanya nibila naye nne, unonikapatcha, liye dowaga aganna hagalala ulukulu.

⁶ Liye afiya vande vaye, unoaitana afwaye na amwandamanaye, liye awandela ira: <Hagalalani, mwasiwa nibila naga nadimenle dihinifwanya.>

⁷ Yofwalrafwaniha yenna eto inafwalrafwana na jinaireya ilambo ya zulu. Tchoira ilambo ya zulu unokala hagalala ulukulu na mwasa wa mutu mmohi otega unatwaruwa, hiyaniha na atu 99 kali apamene katwaruwile wanle.

Yofwalrafwaniha ya kobiri imohi yodimela

⁸ <<Inakala nnga muhiyana akana kobiri daye kumi da parata mmba mwaye. Kodi imohi yadimela mmba mule, liye kanaisaka? Na ibaribari liye unohindiha panti, ajele mmba mule, arome sayela kobiraye ile na ntindi.

⁹ Liye agaifwanyile, unoawandela afwaye na amwandamanaye ira: <Hagalalani na miyo mwasiwa dihifwanya kobiraga yenno yadimenle.>

¹⁰ Eto inafwalrafwana na jinaireya zulu. Tchoira miyo nnouwandelani ira angelro a Mulugu tambe na aliwene anokana hagalala ulukulu na mwasa wa mutu mmohi otega wenno unatwaruwa.>>

Yofwalrafwaniha ya mwana mmohi opupuruwa

¹¹ Yesu ohowongagave yofwalrafwaniha imohiwa eraga: <<Ohokalawo mulombwana mmohi anna ahima a alombwana ambinli.

¹² Siku nimohi mwana wa ng'onong'ono ule ohomuwongana babaye, liye ira: <Babani mudigawele pandi ya jorayela jenyu yenno yafuna kala yaga nyo mwagakwile.> Babayele agavwile mazu awongile mwanaye ule, ohotukulaga jorayela jaye, liye agawela ahima ambinlene anne.

¹³ Vagavirile malambo a vang'ono, mwana wa ng'onong'ono ule ohotukulaga jorayela jaye jatene janna liye, liye manga ulrendo adowaga ilambo imohiwene yolapela. Agadowile wewule, ohomala nonga jorayela jaye jatene na makalelo abure, airagana jengo jidjindji johofwanela.

¹⁴ Agamanle nonga jatene janna liye, ilambo yali liye ule yohozawo ndala ilukulu. Evale liye ohoroma ona goyi.

¹⁵ Noira eno, ohovenyaga, liye dowa ona ganyo vande va mulombwana mmohi wa ilambo yenne. Mulombwanole amurumile ira adowe minda adjihege nguluwe daye.

¹⁶ Liye wewule na mwasa wa ndala, ofuna nnga mutu anvahaga sambale neno nadja nguluwe dile, mbwenye kalivo anvaha yengo.

¹⁷ Evale liye ohozeliwa zelru ira: <Anamalaba a babaga anodja, anorumbala mokwakwanela. Eto miyo uno nnakwa ndala.

¹⁸ Yapamiwa eva inafwanela diwelele vande va babaga, didowe damuwandele ira: <<Babani miyo dihimutegela Mulugu wa zulu eto duhutegelani nyo.

¹⁹ Miyo kadili ofwanela itaniwa mwaninyu, mbwenye mudibalre nnga namalaba wenyu.>>>

²⁰ <<Agaumbuwenle enne, ohovenyaga adowaga vande va babaye. Mbwenye ahanafiye, agali olapela wene, babaye ohomuonaga. Evale liye agaonne makalelo anna mwanaye ule, ohomukumbanyaga, liye tamanga dowa mukumbarela, liye mbejari.

²¹ Evale mwanole ohomuwandelaga, liye ira: <Babani, miyo dihimutegela Mulugu wa zulu eto duhutegelani nyo. Miyo peno kadili ofwanela itaniwa mwaninyu!>

²² Mbwenye babayele ohawandelaga anamalabaye ira: <Mubaranye mudowe mwatukule bata yoriyetchetcha kwaranya, muzena mmuwarihe. Mwamala mmuwarihe aneli muibunoni mwaye eto mmuwarihe sapato.

²³ Eto muzena mwana ng'ombe yoruvele, mupe ira nidje, nihagalale.

²⁴ Mwasiwa mwanagola ohokwa eto eni uhukalawo akoka. Liye ohodimela eto uhuoneya.> Evale aliwa kohoromaga dja kahagalalaga.

²⁵ <<Jaireyaga atu ejile, mwanaye wa mulukulu afwanyeyaga minda. Liye awelagawo, agawandamenle vande vale, unavwa muzika na atu kainaga.

²⁶ Evale liye ohomuitana namalaba mmohi aligi vande vale, liye nfuka eraga: <Kodi vande va jinaireyavo nni?>

²⁷ Evale namalabole ohorumelaga eraga: <Mbalawo wire za. Agazile, babawo uhumutambilra, liye aruma anamalaba ira kape mwana ng'ombe yoruvele mwasiwa liye uhumutambilra mwanaye aganna ingumi eto agali wapamene.>

²⁸ Evale mwanaye wa mulukulu ule agavwile mazu anne, ohotakaleliwaga eto liye kafunile volowa mwadja atu mule. Mwa enne babaye ohokumaga, liye dowa musembeselra ira avolowe.

²⁹ Mbwenye mwanayele ohomuwakulaga babayele eraga: <Miyo dihimala yaka didjindji dene dulabagani nnga muzari, miyo kannababihe viringaniha nne yengo imohi munadiruma nyo. Mbwenye kamunadivahe nne mwana mbuzi ing'ining'ini ira disakanye pwando na afwaga.

³⁰ Mbwenye mwaninyula unongile jorayela jenyu na aputa eto agazile, nyo muhumpela mwana ng'ombe yoruvele.>

³¹ Evale babaye ohomuwakulaga ira: <Mwanaga, weyo tempu yatene unakala na miyo. Jengo jatene jinna miyo jawo.

³² Mbwenye yali yofwanela nihagalale, niteyele, mwasiwa mbalawo ula ohokwa eto peno uhufwanyeyana ingumi. Liye ohodimela, peno mbwenye uhuoneya.> >>