Lukaji 14 - Mazu Otchena a Mulungu

Yesu agali vande va muFarizewu

¹ Siku nimohi na sabado, Yesu ohodowaga vande va mundimuwa mmohi wa aFarizewu ira adowe adje. Agadowile wewule, atu kohoromaga muing'anetchetcha.

² Mwa enne ohokalaga mulombwana mmohi anna urenda ozimbelana maningo matene afwanyeyaga vevale valigi Yesu.

³ Yesu agamuonne mulombwanole, ohafukaga anamafundjiha malamulo na aFarizewu, liye ira: <<Kodi mwa nlamulo inorumelihiwa nvulumutcha mutu siku na sabado owu hehi?>>

⁴ Aliwa mbwenye tchawakunleve yengo. Evale liye ohomuhindaga mulombwanole, liye nvulumutcha, nomala liye muruma ira: <<Dowaga vande.>>

⁵ Evale Yesu ohowongaga ira: <<Kodi muwari mwa nyo mutu akana ng'ombe yaye nari mwanaye amorela muisimeni siku na sabado, kanadowa mukumihamo mobaranya?>>

⁶ Evale aliwa tchawandilege wakula yengo.

Yofwalrafwaniha ya aliba dowa dja pwandoni

⁷ Mwa ora yenne Yesu ohaonaga aliba itaniwa amohiwa kafwanyeya vevale, kasakulraga mipando da undimuwa. Evale Yesu agaonne enne, ohawongelaga yofwalrafwaniha imohi, liye ira:

⁸ <<Waitaniwa vapwandoni ya matelo, kuvendege jogarati mipando da undimuwa. Mwasiwa evale unoza akalevo mutu mmohiwa uitaniwile oukwaranya weyo.

⁹ Tchoira weyo wagarati nimburo napama, maliba uitanani ule aza, aira: <Weyo kavenyavo, agarativo ula>, evale weyo unonyaswa eto unodowa wagarati mipando da mundulri da atu ohokana mabasa.

¹⁰ Mbwenye mofutukula, akala weyo wire itaniwa vapwandoni, inafwanela udowe wagarati mipando da mundulri dogomiheda. Waira enne, maliba uitanani ule unowonga na weyo ira: <Nfwaga, kaza ugarati sogolro uno vampandoni vapama va.> Jaireya enne weyo unotitimiheya vari va atu atenene anafwanyeya vameza vamohi na weyo.

¹¹ Tchoira mutu wenne unavitukulela, unoyevihiwa. Mbwenye ule unaviyeviha, unotukuleliwa.>>

¹² Nomala enne, Yesu ohomuwongagana mulombwana amuitanile ule, liye ira: <<Weyo wafunaga sakanya jantari nari wafunaga sakanya pwando, kwaaitane afwawo, nne adibilawo, nne atu a muibalini mwawo, nne amwandamanawo orayela. Mwasiwa waaitana afwawo, na aliwene anouitana weyo. Mwaira enne aliwa kohoupagalri zela jejile jaairele we.

¹³ Mbwenye weyo wafunaga sakanya pwando, waaitanege aliba simela, aliba rangala, aliba hawenda na aliba haona.

¹⁴ Waira eno, weyo unorelihiwa. Tchoira waaitana atu osimela, aliwa kinapagalri yenno yaairele we, mbwenye Mulugu gunafuna za upagalri siku na mavenyelo wa atu atene apama.>>

Yesu ohowongaga yofwalrafwaniha ya mulombwana mmohi asakanyile pwando vande vaye

¹⁵ Mutu mmohi afwanyeya vameza vale, agavwile ejile, ohomuwongana Yesu eraga: <<Orelihiwa ba atu anno anafuna kadje pawu vameza muUmweneni mwa Mulugu!>>

¹⁶ Evale Yesu ohowongaga, liye ira: <<Ohokala mulombwana mmohi asakanyile pwando ilukulu, nomala liye aitana atu adjindji.

¹⁷ Ora ya pwando yagafiyile, mulombwanole ohomurumaga namalabaye ira: <Udowe waawandele atu atene daitanile miyo ira kaze, mwasiwa jatene jihimala kwakwanela!>

¹⁸ Mbwenye namalabole agadowile ira aawandele atwale, atene kohoroma vepa ira aakurumuwele. Mutu oroma ohowonga na namalabole, liye ira: <Miyo dihigula munda eni, dafuna didowe daonewo. Nnavepa ira kadikurumuwele.>

¹⁹ Mutu mmohiwa ohowonga eraga: <Miyo dihigula ng'ombe daga kumi dolima mbinli, mbinli. Miyo dafuna daxixe limana ira dione akala nnolaba pama. Nnavepa ira kadikurumuwele.>

²⁰ Mmohiwa ohowonga eraga: <Miyo ditenle tchineneva, kavili jowandeya ira nnoya wewo.>

²¹ <<Evale namalabole agawenlewo, ohomuwandelaga mbwiyaye ule. Mbwenye mbwiye wa vande vale agavwile, ohotakaleliwaga, liye muwandela ira: <Venya uharege rampa nlukulu na mandila a mutatamoni mo, waazena uno atu atene osimela, orangala, ohoona na atu ohowenda.>

²² Namalaba ule agamanle irana jarumiwe liye, ohowelagawo, liye ira: <Mbwiyeni miyo dihirana nnga mwawongele nyo mbwenye mamburo kohalawove.>

²³ Evale mbwiyaye ule ohomuwakulaga, liye ira: <Udowe mmarampani na ndila da mmatatamoni waakanyihedege atu atene unaafwanye we, kaze kavolowe ira nyumbaga izale.

²⁴ Tchoira miyo nnouwandelani ira zela atu atene oroma itaniwa ale, kalivo unafuna lawiha pwando yaga.> >>

Yofwalrafwaniha zela ibaribari yomuhara Yesu

²⁵ Noira eno, kohokalawo anamwindji kamuharaga Yesu. Evale Yesu oharungunuwelaga, liye ira:

²⁶ <<Akalavo mutu unafuna za wa miyo eto ahamuide babaye na mmaye, muhiyanaye na ahimaye, adibiliye na arongoliye nari ingumi yaye, liye kanakala namadiharaga.

²⁷ Eto mutu wenne ahanawanda tukula muradi waye adihara, liye kaza eto kala namadiharaga.

²⁸ Kodi muwari mwa nyo, mutu afunaga manga nyumba yolapa ya gwarda unobaranyeda roma manga ahanababihe garati akontari kobiri dinna liye, aona akala unomarihana nyumbayele?

²⁹ Mutu wenno ahanairana eno, liye unomanga aliserisive, mbwenye nyumbiwa kinamala. Aira enne, atu atene anerege muteya keraga:

³⁰ <Mulombwanole ohoroma manga nyumbaye pama eto kawandile mariha!>

³¹ Eto kodi mwene guvi uni afunaga dowa wana kondo na mwene nfwaye ahababihaga garati aumbuwela ira: <Miyo dinna anyakondo 10.000. Mwene nfwaga unna 20.000. Kodi miyo na anyakondo aga nnowanda wana na mwene nfwaga unna anyakondo 20.000?>

³² Liye aona ira: <Miyo kannawanda agondjiha>, mwene nfwaye ule agalive olapela wene, liye unoaruma anamalabaye ira: <Mudowe mwawonge na mwene nfwagole, mwanvepe makalelo anafuna hiyo vwanana nahawanile.> >>

³³ Yesu ohomarihaga eraga: <<Sawasawa muwari mwa nyo, mutu wenno ahanawanda rumela hiya jatene jinna liye, wenno kanawanda kala namadiharaga.>>

³⁴ Yesu ohowongaga eto eraga: <<Mwinnyu tchi yengo yapama. Mbwenye yozivele yamalamo, unawanda avi welela kana yoziva ya mwinnyu akoka?

³⁵ Unagomela tukuliwa dowa tatiliwa. Mwasiwa kanalaba yengo, nne para tatileliwa vateyani ira teya ibalihe pama, nne para tatileliwa vakambani ya mambi. Ule unna mabaru ovwana, avwe.>>