Lukaji 12 - Mazu Otchena a Mulungu

Yesu ohawendjeliha anamamuharaye eto ohalimbiha

¹ Tempu yenne atu oindjiva ohokala a masika kohogumanaga evale fiyeda nyingalagana mutu mmohi na nfwaye. Mwa ora yenne Yesu ohoroma awandelaga anamamuharaye eraga: <<Polre polre zela leverina wa aFarizewu, wenno uli ungongomwa.

² Kilivo yengo yokuneliwa yenno yahanagomela oniwa eto kilivo yengo yokoyiwa yahanagomela vituleya.

³ Nona jengo jatene munawonga nyo muisini, jinovweya ora ya ntana wagali wareya, eto jatene jinanong'ona nyo jinoza jilaleyiwe vatando vene.

⁴ <<Nyo afwaga miyo nnouwandelani ira nyo kamwaovege atu anne anapa maningo eto sogolro uwa kahawandaga irana yengo imohiwa.

⁵ Mbwenye nnafuna duwandeleni wenno munafuna nyo muova. Mmuovege wenno unawanda pa maningo amala avokeda munloni ohokana goma uwa. Miyo nnouwandelani ira mmuovege liyene bahi.

⁶ Kavuruwanani pama! Kodi mariye matanu kinagulihiwa na kobiri mbinli ding'onong'ono? Mbwenye masiki eno, Mulugu kanaidiwala nne mbalrame imohi.

⁷ Fiyeda ante masisi anafwanyeya mmuruni mwinyu, Mulugu umala iziwa indjiva uwa. Nona nyo kamuove, mwasiwa muli ofuneyetchetcha kwaranya mariye madjindji.>>

⁸ Yesu ohowongaga eraga: <<Miyo nnouwandelani ira mutu wenne unawanda dirumela vari va atu, na miyene Mwana wa Mutu nnoza dimurumele vari va angelro a Mulugu.

⁹ Mbwenye mutu wenne unadiruna vari va atu, na miyene Mwana wa Mutu nnoza dimurune vari va angelro a Mulugu.

¹⁰ Atu atene anno anawonga ubure zela Mwana wa Mutu, aliwa anowanda za kurumuweliwa. Mbwenye ule unamululuviha Munemba Otchena kaza akurumuweliwa.

¹¹ <<Mwatukuliwaga mudowiwagana nyumba dofundjamo Mazu ira mwatongiwe na andimuwa na anamatonga milandu, nyo kamukukumuwe ira: <Kodi kanifukaga, nnafuna niwakule nni?> Owu hehi ira: <Kodi nadowa, nnafuna nawonge nni ira nivuneliwe?>

¹² Mwasiwa Munemba Otchena gunafuna uwandelani yenno inafuna nyo wonga.>>

Yofwalrafwaniha ya mulombwana mmohi anna jodja jidjindji

¹³ Mulombwana mmohi afwanyeya muwari mwa anamwindji ale ohowongaga eraga: <<Namafundjiha, kamuwandeleni mbalaga ira nigane jengo jahiyile babihu akwaga.>>

¹⁴ Evale Yesu ohomuwakula eraga: <<We mulombwana we, kodi bani udisakunlre ira dikale namatonga wenyu nari dikale maliba ugawelani jengo?>>

¹⁵ Nowonga eno, ohawandelaga atu atene eraga: <<Polre polre, inafwanela murambele makalelo ali matene ofuna kana jorayela pwi. Mwasiwa ingumi kinazela mwa jengo jidjindji jinakana mutu.>>

¹⁶ Yesu ohawandelaga yofwalrafwaniha imohi eraga: <<Ohokalawo mulombwana mmohi apile jodja pwi pwi mmindani mwaye.

¹⁷ Evale mulombwanole ohelavo zelru ira: <Miyo kadinna nimburo nofuna helamo jatene jipile miyo.

¹⁸ Inafuna miyo irana tchi ila. Nnafuna dibwanyule sandja daga datene, dimange sandja dimohi diwa dilukulu ira dihelemo jodja jatene jinna miyo na jorayela jaga jatene.

¹⁹ Damala eno divume, didje, ding'we, dihagalale, mwasiwa dihikana jengo jidjindji jodikwakwana yaka didjindji dene.>

²⁰ Mbwenye Mulugu ohomuwandela mulombwanole eraga: <We zimora we. Kodi weyo kunaiziwa ira mahiyu anna unokosiwa kalawo wawo? Nnga wagakwile jorayela jawo jatene ejo jipile we jinafuna jikale jaani?> >>

²¹ Nomala eno, Yesu ohowongaga eraga: <<Jatene eji jinaaireyela atu anne anafuna koya jorayela jiwa okave aliwa eto kaharayenle zela ja Mulugu.>>

Zela muselu okukumuwela ja mwilamboni

²² Yesu ohowongaga na anamamuharaye, liye ira: <<Mwa eno, miyo nnouwandelani ira nyo kamukale okukumuwela ingumi yenyu muiraga: <Kodi hiyo nnadje nni?> Nne kamukukumuwele maningo enyu ira: <Nnaware nni?>

²³ Mwasiwa ingumi inafwanyeya yagali yofuneya kwaranya yodja. Eto maningo kohokwaranya yowara.

²⁴ Kaaoneni anakungu. Aliwa kinazala, kinahanda eto kinna ntata nne kinna sandja. Mbwenye masiki eno, Mulugu unoavaha jodja jiwa. Nnga ikalele nyo avi, kodi kamuli ofuneya kwaranya mbalrame?

²⁵ Eto mutu guvi unawanda indjiviha kalawo waye ora imohi movikukumuwela?

²⁶ Akala nyo kamunawanda irana yengo ing'onong'ono eni, nnga munakukumuwela nni zela jimohi jiwa?

²⁷ Kaing'anani makalelo anaulukula folori. Folori kannalaba yengo, kannavisakanyela jowara jiwa. Mbwenye miyo nnouwandelani ira nne Salomawu no rayela waye watene, kawandile wara afiyeda nnga jinaira riya wa folori.

²⁸ Tchoira akala Mulugu unowanda wariha mpinda wa mukokolani, wenno unakalawo peno bahi eto metchelo adowa atatileliwa vanikusani, kodi liye kanauwarihani nyo atu okana nroromelo noyeva?

²⁹ Mwa eno, nyo kamukale ozuzumela zela yenno munafuna nyo dja nari yenno munafuna nyo ng'wa. Eto nne kamuwendege okukumuwene.

³⁰ Tchoira atu atene a mwilamboni na aliwene anozuzumela jengo jeji. Mbwenye Babinyu liye uhuiziwa ira nyo munofuna jengo jeji.

³¹ Ifwanele yengo yoroma muzuzumele Umwene wa Mulugu. Mwairana eno, jatene eji munowendjediwa!

³² <<Nyo nikuru ning'onong'ono na mabila aga kamuove. Mwasiwa Babinyu unafuna auvaheni nyo Umwene waye.

³³ Mugulihe jinna nyo, kobiri diwa mwaavahe atu osimela. Musakanye masartera kahanakauwa, ira mukoye jorayela jenyu ilambo ya zulu, wewo wahanafiya ambava eto wahananonga anantumbwa. Rayela wewo kunakana mala uwa.

³⁴ Tchoira wewo unafuna kala jorayela jenyu, muriminyu eto unakala wewo.>>

Yesu kwi: <>

³⁵ Yesu ohowongagave eraga: <<Inafwanela mukale okozeyene eto panti dinyu dikaleve dohinda dene.

³⁶ Mukale nnga atu omudediheda patarawu wewa udowile pwandoni ya matelo, ira awelagawo, afiyaga vande vale, vanagogoda liye musuwo, kawande muhulela.

³⁷ Orelihiwa ba anamalaba anno anafwanyiwe orurumuwene kamuing'anelaga mbwiyiwa azaga. Na ibaribari nnouwandelani ira liye aza, unowara jowara ja namalaba, aadowena vameza, liyene mwinnya arome agawela jodja anamalabaye ale.

³⁸ Masiki liye azege vari va mahiyu, nari mutumbi oroma anlaga, orelihiwa ba anamalaba anno unaafwanye liye orurumuwene, kamuing'anelaga.

³⁹ Eto inafwanela muiziwe ira ahakanlege mbava azaga vande mwinnya aiziwaga ora inafuna za mbavole, erege ing'anela vande vaye vale eto kavenyegevo ira mbava aze akupulevo.

⁴⁰ Na nyenne inafwanela mukale okozeyene. Mwasiwa Mwana wa Mutu unaza afiye tempu yahanadediha nyo.>>

⁴¹ Evale Peduru ohonfukaga, liye ira: <<Nabwiya, yofwalrafwaniha yenna munaniwongela hiyo bahi owu hehi atu atene?>>

⁴² Nabwiya ohowongagave eraga: <<Kodi musogolrelri ororomeleya eto owendjela guvi? Gwenno uni agavahediwe mabasa na patarawu waye ira aaing'anelege anamalaba afwaye eto ira aavahege jodja jiwa oriwa yakwakwana, airagana nnga mwarumiwe liye.

⁴³ Orelihiwa gu namalaba wenne patarawaye ule azaga unanfwanye liye alabaga mabasaye.

⁴⁴ Na ibaribari nnouwandelani ira patarawu ule unonvaheda namalabole ira aing'anelege jengo jaye jatene.

⁴⁵ <<Mbwenye namalabole akala wabure, patarawu waye adowa, liye aroma wonga na mmirimani mwaye ira: <Patarawu unosimbwa dibeliwa, kanawanda zawo>, era enne aroma abubudaga anamalaba afwaye a alombwana na anamalaba a ahiyana, aromaga dja, no ng'wa fiyeda lrezelraga,

⁴⁶ siku nahamudediheda liye na ora yahaiziwile liye, pinafuna fiya patarawu waye ule. Patarawu waye ule agafiyile, aganfwannye airagana jejile, unongwada yano yano, amutukule amudowena nimburo neno vili atu ohororomela.

⁴⁷ Namalaba wenne uiziwile yofuna ya patarawaye amala liye ahakozeyaga eto ahafunaga harihamo, unoonihiwa goyi ilukulu muwari mowaxuliwa.

⁴⁸ Mbwenye namalaba wenne ahaiziwile yofuna ya patarawaye, liye airana yengo yofwanela bubudiwela, bubudiwa waye unakala wa vang'onove. Mutu wenno uvahiwe bure unoza akosiwe bure eto ule uvahediwe jidjindji unoza akosiwe jidjindji.>>

Yesu kazilena murendele, mbwenye uzilena gaweya

⁴⁹ Yesu ohowongagave eraga: <<Miyo dizele vokela munlo mwilamboni. Miyo dohofuna nnga munlole agahindile.

⁵⁰ Eto ukala batiziwa uhanle ira dibatiziwe. Miyo nnokana zuzuma ulukulu fiyeda batiziwa waga umale.

⁵¹ Kodi nyo munaumbuwela ira miyo dizilena murendele mwilamboni? Miyo mbwenye kadizilena murendele. Miyo dizele mwalaniha.

⁵² Kuma peno eni dowa sogolro, atu atanu a vande vamohive kinavwananege. Atu ambinli anerege aharahara afwiwa araru eto atu araru anerege aharahara afwiwa ambinli ale.

⁵³ Babi kanavwananege na mwanaye wa mwanapongwe eto mwana wa mwanapongwe kanavwananege na babaye. Mma kanavwananege na mwanaye wa muhiyana eto mwana wa muhiyana kanavwananege na mmaye. Nijali kanavwananege na nijaliye eto nijaliye kanavwananege na nijali waye.>>

⁵⁴ Yesu ohowongagave na anamwindji eraga: <<Nyo mwaona mirambo dikumelaga mavirelo wa nzuwa, munaira: <Muzongwe unafuna arumbwe.> Era eno aliwa ireya.

⁵⁵ Eto mwaona nipevo nlukulu niombaga pandi ya suli, munaira: <Peno unokala viha wohokala wa masika.> Era eno yenno aliwa ireya.

⁵⁶ Nyo angongomwa nyo! Akala nyo munowanda tapulela mirambo zulu nnga mwasiwa gwa nni nyo hawandaga tapulela jinaireya malambwala?

⁵⁷ <<Nnga mwasiwa gwa nni nyo hawandaga iziwa makalelo apama?

⁵⁸ Akala mwidani wawo wire usumela, autukula audowagana ira watongiwe, inafwanela muvayele vwanana mundila, mumalihe mulandu wenyu mundila emo, tawiha ira nfwawo unaudowena wa namatonga, namatonga audowena wa namafungela, namafungela adowe aufungele mukadeya.

⁵⁹ Miyo nnouwandelani ira weyo kuza ukumamo mukadeya mule wahanapagalri kobiri yatenene.>>