Lukaji 11 - Mazu Otchena a Mulungu

Yesu ohafundjiha anamamuharaye lobela

¹ Siku nimohi Yesu afwanyeya agali nimburo nimohi eni liye lobelaga. Evale liye agamanle lobela, namamuharaye mmohi ohonvepaga, liye ira: <<Nabwiya kanifundjiheni lobela, nnga Juwawu aafundjihile liye anamamuharaye lobela.>>

² Evale Yesu ohawandelaga eraga: <<Nyo mwafunaga lobela muirege eni: <Babani, nzina nenyu nititimihiwege. Umwene wenyu uze.

³ Munivahe yodja yehu ya siku na siku.

⁴ Munikurumuwele jotega jehu mwasiwa na hiyene nnoakurumuwela ale ananitegela. Kamunihiye ira nigwe muwari moxixiwa mbwenye munivunele mwa jotakala.> >>

⁵ Evale Yesu ohowongagave eraga: <<Nnafuna nifwalrafwanihe eni. Muwari mwa nyo mutu unomukana nfwaye. Evale liye unovenya dowa wa nfwaye ule vari va mahiyu eraga: <Nfwaga, kadibolihe pawu taru,

⁶ tchoira dire zeliwa mulendwaga mmohi unakumela olapa eto miyo kadinna yonvaha.>

⁷ Era enne nfwaye ule unomuwakula agali mmba emule ira: <Kudikukumule! Musuwo uli ofungene eto miyo dire gonanti na ahimaga vakamani vaga. Kavali jowandeya ira miyo divenye duvahe pawu.> >>

⁸ Evale Yesu ohowongaga eraga: <<Miyo nnouwandelani ira maliba vepa akalela ntindi, nfwayele unovenya liye nvaha jatene jinafuna liye. Muwari monvaha mule, liye kananvahela ira liye ere kala nfwaye, nari. Mbwenye unanvahela muwari mwa ntindi nanna nfwayele.

⁹ Na mwasa wenno nnouwandelani ira inafwanela muvepe. Mwaira eno munovahiwa. Muvende. Mwaira eno munofwanya. Mugogode musuwo. Mwaira eno munohuleliwa.

¹⁰ Tchoira mutu uli watene unavepa, unovahiwa. Eto mutu wenne unavenda, unofwanya. Eto mutu wenne unagogoda, unohuleliwa.

¹¹ Kodi baba guvi muwari mwa nyo, unanvaha mwanaye nyowa agali mwanaye ule uvepile somba?

¹² Nari baba guvi muwari mwa nyo, mwanaye aganvepile nzayi liye anvaha walruze?

¹³ Akala nyo mwagalive atu abure muhuiziwa avaha ahiminyu jengo japama, nnga ikalele Baba wa zulu avi? Kodi kanawanda avaha Munemba Otchena ale ananvepa?>>

Atu kohomunukeda Yesu nnga mutu olabana kopolo da Satana

¹⁴ Siku nimohi Yesu ohotamangiha munemba wabure ohomuwongiha mutu, afwanyeya muwari mwa mulombwana mmohi. Munemba wabure ule agakumilemo, mutule ohoroma wonga. Jagaireyile enne anamwindji kafwanyeyaga evale kohotikiniheya.

¹⁵ Mbwenye atu amohiwa kowongaga keraga: <<Eni Yesu kopolo dotamangihana minemba dabure, unanvaha gu Belizebu mundimuwa wa minemba dabure.>>

¹⁶ Eto atu amohiwa muwari moira kamuxixe Yesu, kohonvepaga ira: <<Hiyo nnafuna muniirele ionihedo imohi yokumela zulu!>>

¹⁷ Mbwenye Yesu muwari moiziwa jaumbuwela atu, ohowongaga eraga: <<Umwene uli watene unavigawa, amala eto karoma wana oka oka, unagomela bwanyuliwa. Nivande nnagaweya, niroma wana oka oka, nnagomela balaleya.

¹⁸ Akala Satana unogaweya ekave, kodi umwene waye unawande limba avi? Miyo nnawongela eni mwasiwa nyo munawonga ira miyo nnatamangiha minemba dabure na kopolo da Belizebu mundimuwa osogolrelra minemba dabure.

¹⁹ Eto akala miyo nnatamangiha minemba dabure na kopolo da mundimuwa Belizebu, nnga ahiminyu anatamangiha minemba dabure na kopolo da ani? Na mwasa wenno miyo nnouwandelani ira aliwene anoza kakale anamatonga anafuna utongani nyo.

²⁰ Mbwenye akala miyo nnatamangiha minemba dabure na kopolo da Mulugu, muiziwe ira Umwene wa Mulugu uhufiya wa nyo.

²¹ <<Mulombwana mmohi wa kopolo akana jatene jowanana, aing'anelaga vande vaye, jatene ja vande vaye jinakala japama jene, kajinabiwa.

²² Mbwenye azavo mulombwana mmohiwa wa kopolo domukwaranya liye, evale amugondjiha, unomuwaka jowanana janyindela liye jile, era eno, liye roma muwaka jorayela jaye jatene, liye tukula roma gawaga na makalelo anafunela liye.

²³ <<Mutu wenne ahali na miyo gwenno unadiida. Eto wenne ahanadikamiheda gumaniha, gwenno unamwada.>>

Makalelo a munemba wabure amuwelela mutu

²⁴ Yesu ohowongagave eraga: <<Munemba mmohi otakala akuma mmaningoni mwa mutu, unawenda mwemo mwahanafwanyeya mahindje, sakaga nimburo napama ira awande vuma. Mbwenye liye asaka, ahafwanye vovuma, unowonga ira: <Nnafuna diwelele vande vevo vikumile miyo.>

²⁵ Era enne unowela, liye dowa vande vale. Afiya vande vale, unafwanya vihimala jeliwa eto vihimala sakanyediwa pama.

²⁶ Era eno unodowa tukula minemba dabure dimohi diwa mitanu na minli dokana makalelo abure omukwaranya liye, aliwa za volowa mmaningoni mwa mutule, kalaga mwemule. Era enne makalelo ogomiheda a mutule anakala abure kwaranya makalelo oroma anna liye.>>

²⁷ Yesu awongaga ejile, muhiyana mmohi aligi vari va anamwindji vale ohomukuwelaga Yesu eraga: <<Orelihiwa gu muhiyana wenno uubanleni nomala auwamwihani.>>

²⁸ Yesu mbwenye ohomuwakulaga, liye ira: <<Mofutukula orelihiwa ba atu anne anavwa mazu a Mulugu eto kairagana.>>

Yesu ohowongaga zela ionihedo ya Jonasi

²⁹ Atu adjindji kagumanagave evale, Yesu ohoromaga wonga eraga: <<Atu a malambwala ba atu abure! Tchoira aliwa anadivepa ira diirena ionihedo ira kawande roromela. Mbwenye aliwa kinaireliwa ionihedo ili yatene yahali ionihedo ya mulombwana Jonasi.

³⁰ Sawasawa na makalelo nnga Jonasi ali liye ionihedo zela atu a Ninive, Mwana wa Mutu eto na liyene unakala ionihedo zela atu a tempu ila.

³¹ Siku notonga nafiya, muhiyana atonga ilambo ya suli unoza avenye, kaumangeni mulandu nyo atu a tempu ila. Inaumangeleni liye mulandu tchoira liye ohovenya waniwa ilambo yolapa, liye dowa ira avuruwane zelru da Salomawu. Eto kaing'anani, peno ukalawo uzile mulukulu omukwaranya Salomawu wenno. Mbwenye nyo mwagavuruwanile jinawonga liye, kamunafuna vwa.

³² Siku notonga naza nifiya atu a Ninive anoza kavenye kaumangeni mulandu nyo atu a tempu ila. Mwasiwa aliwa kagavwile mazu a Jonasi kohowanda twaruwa mwa jotega jewa. Kaing'anani eto wenno uli eva umukwaranya mulombwana Jonasi, mbwenye nyo mwagavuruwanile jinawonga liye, kamunafuna twaruwa.>>

Yesu ohowonga zela panti ya maningo

³³ Yesu ohowongagave eraga: <<Kalivo mutu unahindiha panti adowa ahela nimburo nokoyeya nari adowa agudumeya na ngogoda. Mbwenye panti inaheliwa vazulu ira atu atene anavolowege, kakale mowareyani.

³⁴ Meso tchi panti ya maningo. Meso awo kakala apamene, maningo awo matene anakala ozaleliwa wareya. Mbwenye meso awo kahakale apama, maningo awo anakala ozaleliwa isi.

³⁵ Inafwanela uing'ane pama, tawiha ira wareya unafwanyeya mmaningoni mwawo unaze ukale isi.

³⁶ Tchoira akala maningwawo anafwanyeya kagali owareya, nne ikukuru imohi wahakale muisini, ku wonga ira maningo awo matene anakala ozaleliwa wareya nnga jinaireya na panti yahindaga vari vawo, yaumoneyaga.>>

Yesu ohowongaga zela makalelo a aFarizewu na anamafundjiha malamulo

³⁷ Yesu agamanle wonga, ohokalawo muFarizewu mmohi amuwongilegena ira adowe adje vande vaye. Evale Yesu agadowile vande va muFarizewu vale, ohovolowaga mmba, liye dowa vameza, roma dja ahanahambemo.

³⁸ Evale muFarizewu ule agamuonne Yesu adjaga eno ahanahambemo, ohotikiniheyaga.

³⁹ Evale Nabwiya ohomuwandelaga, liye ira: <<Nyo aFarizewu munahuwa kopo na parato undeve bahi, mbwenye muwari mwenyu muhuzala abela afwinyu na jabure.

⁴⁰ Nyo azimora nyo! Kodi mutu usakanyile unde na muwari kahi mmohive?

⁴¹ Mbwenye jinafuna nyo avaha atu osimela inafwanela mwaavahe na mmirimani mwenyu mwatene. Mwaira eno munoona jatene jene jinokala jotchena jene para nyo.

⁴² <<Udilu wa nyo aFarizewu! Tchoira nyo munovelela yanekumi ya mbewu donukela, na mbewu doziva, na matamba matene eto munolramwisa tonga mwa ibaribari eto Mulugu kamunamuziveliwa. Inafwanela muiregena jatene eji eto kamuhiyege irana jimohi jejo jinairana nyo.

⁴³ Udilu wa nyo aFarizewu! Tchoira nyo munoziveliwa garati mipando doroma munyumbani dofundjamo mazu eto munoziveliwa londjeliwa mwawendaga murampani.

⁴⁴ Udilu wa nyo! Tchoira nyo munakala nnga masiye ohoiziweya. Evale atu anoza kanyingalelegevo kahaiziwaga yengo tchivi.>>

⁴⁵ Mundimuwa mmohi ofundjiha malamulo afwanyeyaga evale, ohomuwongagana Yesu eraga: <<Namafundjiha, nyo mwawongaga eno munaniruwana na hiyene.>>

⁴⁶ Evale Yesu ohomuwakulaga eraga: <<Udilu wa nyo tambe anamafundjiha malamulo! Mwasiwa nyo munaavaha afwinyu mitolro donyemela, dedo dahanawanda atu, muiraga: <Kapwatelani.> Eto fwanyeya ira mitolro dedo nne nyo kamunawanda sakwinya na ibuno yenyu ira mupwatele.

⁴⁷ Udilu wa nyo! Mwasiwa munamanga kampa da anamafiyiheda anno makolo enyu kaapile atu wanle.

⁴⁸ Eji jinaoniha ira nyo muli amboni eto munorumela mabasa alabile makolo enyu. Tchoira aliwa kohapa anamafiyiheda. Peno nyo munamanga kampa diwa.

⁴⁹ Nona Mulugu ohowonga muwari mwa zelru daye eraga: <Miyo nnoaruma anamafiyiheda na anamarumiwa wa aliwa. Mbwenye dagaarumile, amohiwa anoapa eto amohiwa anoaharahara.> >>

^50-51 Yesu ohowongagave eraga: <<Na mwasa wenno atu a tempu ila anoza kaumangeni mulandu na mwasa wa sangiri na anamafiyiheda neno nivuvihile atu kuma mapanduwelo a ilambo romela piwa wa Abeli ante piwa wa Zakariya, wenno apiwile wu ibuwa, wu Nyumba ya Yehova, vari viwa. Mwa ibaribari miyo nnouwandelani ira atu a tempu ila anoza kamangiwe mulandu zela jabure jejo jiirilena atu.

⁵² <<Udilu wa nyo anamafundjiha malamulo! Tchoira nyo munaafungela atu unde ira aliwa kahaiziwe ibaribari. Nne na nyenne mwa annya kamunna ibaribari eto ale anafuna kana ibaribari nyo munoakameliha ira aliwa kahawande kana ibaribari.>>

⁵³ Noira eno, Yesu avenyaga evale, anamafundjiha malamulo na aFarizewu kohoromaga musanya valukulu kanfukaga zela jengo jidjindji,

⁵⁴ ira kamuwage muwano ira mwa jengo jafuna liye wonga evale kaonevo mwasa omugwihana mulandu.