Lukaji 10 - Mazu Otchena a Mulungu

Yesu oharuma anamamuharaye 70

¹ Jagaireyile enne Nabwiya ohasakulra atu amohiwa 70 ira kadowe sogolro, wewo wafuna liye dowa. Aarumile ambinli ambinli ira kadowe sidadi na tatamo dedo afuna liye fiya.

² Evale Yesu ohawandelaga eraga: <<Johanda jihisimbwa indjiva eto anamalaba kohoyeva. Nona inafwanela munvepe Mwinnya wa munda ira aarume anamalaba amohiwa ira kadowe mahandelo waye.

³ Venyani mudowege. Muing'ane, miyo nnaurumani nnga mabila ira mudowe vari va anambwa a mukokolani.

⁴ Nyo mwadowaga muulrendoni mwinyu, kamutukule sartera, nne pasta, nne sapato. Eto mwadowaga kamuimele mundila ira mmulondjele mutu.

⁵ Mwadowa vande vinafiye nyo, mubabihege alondjelavo ira: <Murendele akale na nyo vande vano.>

⁶ Nyo mwagaalondjenle, mwaona ira ukalavo mutu wa murendele orumela uwatchelani, murendele wenyu unomutitela liye. Mbwenye mwaona ira kinafuna jouwatchelani, murendele unowelela wa nyo.

⁷ Vande munafiyede nyo mukaleve vevo, mudje eto mung'we yenno inauvaheni atu. Tchoira inafwanela ira namalaba akayena yotambilra yaye. Eto kamuindjivihege mokala.

⁸ Sidadi ili yatene munafiye nyo, kauwatchelani pama inafwanela mudjege yenno inauvaheni atu.

⁹ Eto inafwanela atu atene munaafwanye nyo na maurenda muwari mwa sidadi yenno, mwaavulumutche eto mwaawandele ira: <Umwene wa Mulugu uli vakwikwive na nyo.>

¹⁰ Mbwenye mwavolowa sidadi imohi mwahatambilriwe pama, inafwanela muvenye mudowege. Eto mwadowaga muwongege mundila ira:

¹¹ <Hiyo nuhutatelani nyo tumbulru nafwanyeya na manyalo ehu ira ikale ionihedo zela mulandu wenyu. Mbwenye inafwanela muiziwe ira Umwene wa Mulugu uli vakwikwive.>

¹² Miyo nnouwandelani ira siku notonga naza nifiya, sidadi yenno inafuna ukondani, goyi diwa nnokala goyi dilukulu dokwaranya goyi nnafuna za vahiwa akuda Sodoma.>>

Tembelrelreya wa sidadi dedo dahamuwatchenle Yesu

¹³ Yesu ohowongave eraga: <<Udilu wa weyo Korazimi! Udilu wa weyo Betisayida! Mwasiwa matikiniho muireliwe nyo sidadi mbinli di, ahakanlege matikiniho anna kaireliwa sidadi ya Tiru na Sidoni, adjindji mwa aliwa kogotwaruwa mwa jotega jiwa, kawarege masakwi, kagarati vati kavihelege ndora mmuruni mwiwa.

¹⁴ Nona, siku notongiwa naza nifiya, goyi denyu nnokala goyi dilukulu dokwaranya goyi nnafuna za vahiwa akuda Tiru na Sidoni!

¹⁵ Kodi weyo sidadi ya Kafaranamu unaumbuwela ira unoza ugwele zulu? Weyo unoza utatileliwe Nimburo na Anokwa.>>

¹⁶ <<Mutu wenno unauvuruwanani, unadivuruwana miyo. Mbwenye mutu wenne unaukondani, unadikonda miyo. Eto wenne unadikonda, unamukonda wenno udirumile.>>

Welawo wa atu karumiwe na Yesu

¹⁷ Nomala enne, atu 70 anne aarumile liye ale kagamanle mabasiwa, kohowelawo mohagalala, aliwa za muwandelagamo Yesu keraga: <<Nabwiya, naruma minemba dabure na nzina nenyu, minemba dabure dile nnowanda nivwelela.>>

¹⁸ Evale Yesu ohawakulaga, liye ira: <<Miyo dihimuona Satana akumaga zulu, amorelaga ilambo ya vati nnga jerima.

¹⁹ Kavuruwanani, miyo dihimala uvahani kopolo doira nyo mwanyingale nyowa nari awalruze eto mwanyingale kopolo da mwidani. Muwari monyingala, kilivo yabure inafuna ufwanyani.

²⁰ Nyo mbwenye kamuteyele zela minemba dabure dedo nnauvwelelani, nari. So mbwenye muteyele zela mazina enyu lrembiwa ilambo ya zulu.>>

²¹ Mwa ora imohive yenne Yesu muwari mwa Munemba Otchena ohagalalaga, liye roma lobelaga eraga: <<Miyo nnoutamalelani nyo Babani, Mwinnya wa ilambo ya zulu na ilambo ya vati, mwasiwa nyo muhuwanda koya jengo jeji ira aliba zelru na aliba onelramo kahawande iziwa. Mbwenye muhuwanda aiziwiha ahima ang'onong'ono. Babani na ibaribari wewo ku funa wenyu ira muirena.>>

²² Yesu eto ohowongaga eraga: <<Babaga udivaha jatene mmandani mwaga. Eto kalivo mutu mmohiwa udiiziwile miyo mwanaye ahali Baba. Eto kalivo umuiziwile Baba ahali miyo Mwanaye na anno anafuna miyo aiziwiha!>>

²³ Evale Yesu ohorungunuwa aing'ana anamamuharaye, liye awandela vewa vene eraga: <<Orelihiwa ba atu anne anaona jejo jinaona nyo!

²⁴ Na ibaribari miyo nnouwandelani ira anamafiyiheda adjindji na amwene adjindji kohofunafuna ira kaone jejo jinaona nyo, mbwenye aliwa tchaonile. Eto kohofunafuna ira kavwe jejo jinavwa nyo, mbwenye tchavwile.>>

Yofwalrafwaniha ya muSamariya mmohi wapama

²⁵ Ohokalawo namafundjiha malamulo mmohi avenyilege liye nfuka Yesu momuxixa eraga: <<Namafundjiha, dire avi ira dikayena ingumi yohomala?>>

²⁶ Evale Yesu ohomuwakula, liye ira: <<Kodi mmalamuloni mulrembiwe avi? Nnga weyo waileri, unaonelramo avi?>>

²⁷ Mundimuwole ohowakulaga ira: <<Mmalamuloni mulrembiwe ira: <Umuziveliwege Nabwiya Mulugu wawo na murimawo watene, no kalawo wawo watene, na kopolo dawo datene, no onelramo wawo watene. Eto umuziveliwege mutu uli watene nnga munaviziveliwa we wa mwinnya.> >>

²⁸ Mwa enne Yesu ohomuwakula, liye ira: <<Uhuwakula pama. Weyo inafwanela ukwakwanelihedege jejo, waira eno unokana ingumi.>>

²⁹ Evale mundimuwa wa malamulo ule mofuna vikaliha mutu okwakwanela, ohonfukaga Yesu akoka eraga: <<Kodi nfwaga bani?>>

³⁰ Evale Yesu ohomuwakulaga awongaga ira: <<Ohokalawo mulombwana mmohi akumaga Jeruzalemu adowaga Jeriko. Liye adowaga mundila, ambava kohomuhinda, aliwa mbubuda, muwungula jowara jaye, aliwa muhiya vang'ono no kwa.

³¹ Eto fwanyeya ira ohokalawo namakuta mmohi aviraga ndila imohive yenne. Liye agamuonne mulombwanole, ohomuwereweraga, liye dowaga jaye.

³² Noira eno, ohokalawo eto mulombwana mmohiwa muLevi aviraga. Agafiyile nimburo nenne, agamuonne, na liyene ohomuwereweraga, liye dowaga jaye.

³³ <<Jagaireyile enne vohokalaga muSamariya mmohi aligi muulrendoni mwaye, aviraga ndila imohive yenne. Mbwenye liye agafiyile nimburo nenne, agamuonne, ohomuwendelaga tangaranga.

³⁴ Ohowandamelaga evale, liye muhuwa jilonda jamporotchile atu jile na makura na vinyu, agairile enne liye mpota. Agampotile ohomugweliha vaburuni vaye, liye mudowana nyumba yofiyedamo alendo. Agamudowilena wewule, ohokalaga wewule amuing'anelaga.

³⁵ Mwa enne mmetcheloni muwa ohompagalrigi maliba nyumba ya alendo ule kobiri mbinli da parata, liye muwandela ira: <Mmukamihedege mutula. Kobiri datene munanonge nyo, miyo dawelagawo nnopagalri.> >>

³⁶ Yesu ohowongaga eraga: <<Moonelramo mwawo, kodi mwa atu araru ale, amusakanyile nnga nfwaye mutu afwanyiwe ambava ule guvi?>>

³⁷ Mundimuwa wa malamulo ule ohorumelaga, liye ira: <<Amusakanyile nnga nfwaye ali wenno amuwendenle tangaranga.>> Evale Yesu ohomuwandelaga, liye ira: <<Na wenne udowe wairege makalelo mamohive.>>

Yesu agali vande va Marta na mbalaye Mariya

³⁸ Yesu na anamamuharaye kadowagave muulrendoni mwiwa, kohofiyaga tatamo imohi. Mwa enne muhiyana mmohi wa tatamo yenne eriwa Marta, ohomutukula Yesu mudowana vande vaye.

³⁹ Marta ule ohomukana mbalaye aitaniwa Mariya. Yesu agafiyile vande va Marta vale, Mariya ule ohodowaga garati manyaloni wa Nabwiya, liye vuruwanaga mazu afundjihaga Yesu.

⁴⁰ Marta mbwenye liye ohokalaga okukumuwene na mabasa osapa. Evale liye ohodowaga valigi Yesu vale, liye nfuka ira: <<Nabwiya, kodi nyo kamunabalra Mariya wire liye adihiyeda mabasa meka? Kamurumeni aze adikamihede!>>

⁴¹ Evale Nabwiya ohomuwakulaga eraga: <<Marta! Marta! Weyo uli osanyeyene eto uhukukumuwa zela mabasa madjindji analaba we,

⁴² mbwenye yengo yofuneya tchi imohi bahi. Tchoira Mariya uhusakulra pandi yapama eto kalivo unawande muwaka.>>