Koloso 3 - Mazu Otchena a Mulungu

Inafwanela mutu omuroromela Yesu awendege na ingumi ixa Mulugu unvahile liye

¹ Akala nyo muhuiziwa ira hiyo nihivenyihiwa vamohi na Kiristu, inafwanela muvendege jengo ja zulu jinafwanyeya wewo Kiristu uli liye ogaratene muwononi odjana wa Mulugu.

² Inafwanela mutukule joumbuwela jenyu, muumbuwelege jengo ja zulu hiya jengo ja ilambo ya vati.

³ Tchoira nyo mohokwa. Peno ingumi ixa inna nyo imala koyeya vamohi na Kiristu muwari mwa Mulugu.

⁴ Kiristu gu ingumi yenyu. Liye aza aoneya, tchi tempu yenno inafuna nyo za oneya mwagali vamohi na liye na undimuwa unna liye.

⁵ Nona inafwanela mukwihe jofuna ja ilambo ya vati jinafwanyeya muwari mwa nyo. Jofuna ja ilambo jinafuna nyo kwiha ti ji: joraruwa, irana jotakala, irana jofuna jenyu, kana jofuna jabure no funa kana jorayela pwi. Funa kana jorayela pwi eto tchi imohive no hara ikwamutu yosema.

⁶ Uwali wa Mulugu unoazela atu na mwasa wa ejo.

⁷ Wanle tempu yali nyo muwari mwa jabure, jabure jatene ejo moiretchana.

⁸ Mbwenye va mutatile jabure jatene: jojamo, ja uwali, idana, luluvihana, kumihaga mazu abure wanoni wawo.

⁹ Kamuwongege jonama mmohi na nfwaye mwasiwa nyo muhumala wungula mawendelo enyu a wanle oirana jabure.

¹⁰ Nyo eto muhutukula mawendelo maxa, muhuwara. Mawendelo maxa ayo aneregeve sandutchiwa muwari mwa zelru da Mulugu ira kakale olingana na Mulugu wenno upandutchile mawendelo maxale.

¹¹ Peno mbwenye zela wenno uli muwari mwa Kiristu, kuli hiyana ira ula gu muGerego, ula muJudewu, ula uineliwa, ula kaineliwe, ula ohofundja, ula unakala nnga mwanainyama, ula muzari, ula kahi muzari. Peno zela atu anne, atene anafwanyeya muwari mwa Kiristu eto Kiristu uli muwari mwa atene.

¹² Voira jili eno eto voira nyo muli atu Mulugu uusakunlreni liye, muli atu otchenihiwa, atu oziveliwiwa, inafwanela mwawendaga, muwarege makalelo oawendela afwihu tangaranga na upama, mukale atu oviyeviha, opwaseya, ovilela,

¹³ okurumuwelana. Eto mwaona ira ukala uupudjileni, inafwanela mukale atu olevelelana na makalelo nnga Nabwiya unilevelenle liye.

¹⁴ Vazulu va jatene jeji, inafwanela muware makalelo ozivelana. Tchoira zivelana tchi yengo yogumaniha japama jatene ira nikayena vwanana wokwakwanela.

¹⁵ Murendele wa Kiristu agarateye mmirimani mwenyu. Tchoira Mulugu uniitanne ira niwendege na murendele nnga maningo mamohive. Vamohive vevo inafwanela muirege mutamalela Mulugu na mwasa wa jatene ejo jinaniirela liye.

¹⁶ Inafwanela muselu wa Kiristu amale unyowelani. Ira muselu wa Kiristu aunyoweleni, inafwanela mufundjihegena, mulimbihegena na zelru daye datene. Inafwanela eto ira muimbege masalimu na mainu na makorasi a Mulugu momutamalela zela jinera liye na mmirimani mwenyu mwatene.

¹⁷ Inafwanela eto jowonga jenyu, joira jenyu, jatene jene muirege na nzina na Nabwiya Yesu eto muiregena muwari momutamalela Mulugu Baba movira mwa Yesu.

Makalelo ofwanela ira mavande a atu omuroromela Yesu kaharege

¹⁸ Nyo ahiyana inafwanela murumele tongiwa na amamuninyu. Tchoira muhiyana uli watene muwari mwa Nabwiya ifwanela ira arumele tongiwa na mamunaye.

¹⁹ Nyo alombwana mwaaziveliwege ahiyaninyu eto kamwaawendena muwari mwa pora pora.

²⁰ Nyo ahima, inafwanela mwaavwelelege ababinyu na amminyu muwari mwa jatene jinawonga atu. Mwasiwa yenno tchi yengo Nabwiya inaziveliwa liye.

²¹ Eto nyo ababi a alombwana, kamwaairelege ahiminyu jengo jofuna atakaleliwiha, tawiha ira anaze kawaheyena uvwelelani.

²² Nyo azari, inafwanela muvwelelege jatene jinawonga apatarawinyu a ilambo ya vati. Nyo mwalabaga, kamulabege japama patarawinyu akalavo mofuna muziveliha, mbwenye avenyavo, nyo labaga jovuza. Mulabege na mmirimani mwenyu muwari momuova Nabwiya.

²³ Muwari mwa mabasinyu matene, mulabege na mmirimani mwenyu mwatene nnga munamulaba Nabwiya hiya mulaba mutu nfwinyu.

²⁴ Tchoira nyo muhumala iziwa ira mabasa matene apama munalaba nyo, unafuna utambilrihani rayela wenyu gu Nabwiya. Mwamulabaga patarawinyu, nyo munamulaba eto Nabwiya wehu Yesu Kiristu.

²⁵ Mbwenye ule unairana jabure unoza atambilre zela jabure jiirile liye eto muwari motonga kavanakala nsakulro.