Koloso 2 - Mazu Otchena a Mulungu

¹ Miyo eto nnafuna muiziwe ira dihikana zuzuma undimuwa zela wa nyo na atu omuroromela Yesu a sidadi ya Layodiseya vamohi na atu omuroromela Yesu atene dahaagumannena miyo kove na kove

² ira mulimbiheye mmirimani mwenyu mwagali atu oluweya vamohi muwari mozivelana. Ili ira muwande kana rayela wewo ozela kana ibaribari no onelramo mohokayikela zela Kiristu. Fwanyeya ira Kiristu wanle ali nnga yengo yohoiziweya burebure Mulugu aiziwile liye ekave.

³ Muwari mwa Kiristu eto punafwanyeya rayela watene ozela zelru no onelramo wa ibaribari.

⁴ Miyo nnouwandelani eji ira mwahawande nyengiwa na atu anno anawonga mazu amohiwa oriyela baruni eto kahali a ibaribari.

⁵ Tchoira masiki maningo aga kakale olapela wene na wewo uli nyo wo, mmirimani mwaga, miyo dili vamohi na nyo. Miyo eto nnohagalala zela makalelo apama munna nyo eto nnohagalala zela nroromelo nolimba munna nyo mmuroromelaga Kiristu.

Unna mabasa gu Yesu Kiristu hiya sanganiko da ilambo ya vati

⁶ Nona sawasawa nnga mwamuwatchenle nyo Yesu Kiristu kala Nabwiya wenyu, inafwanela muwendege na liye nnga Nabwiya wenyu.

⁷ Muwari mowenda na Kiristu, mitchitchi denyu didowegeve vati muwari mwa Kiristu. Eto mumangiwegeve vazulu va aliserisi unafwanyeya agali Kiristu. Mukaleve olimbene na ibaribari inahara hiyo nnga mwemo mwafundjihiwe nyo. Eto inafwanela muiregeve mutamalela Mulugu valukulu vene zela jatene jinaniirela liye.

⁸ Polre polre tawiha ira munaze mukalihiwe azari na atu owonga zelru da ilambo ya vati na jonyenga jimohi jiwa johokana mabasa. Tchoira jonama ejo kajinakuma mwa Kiristu. Jinakumela muwari mwa sanganiko da atu eto jinakumela mwa minemba dabure nnafwanyeya mwilamboni ya vati.

⁹ Kamunyengiwe na ejo, mwasiwa makalelo matene a Mulugu anofwanyeyamo muwari mwa maningo maxa Mulugu anvahile liye anvenyihaga mokwani.

¹⁰ Na nyenne muwari mogumanihiwa na Kiristu, muhumala vahiwa makalelo matene a wenno uli mwinnya wa utongi na undimuwa watene.

¹¹ Vamohive vevo muwari mogumanihiwa na Yesu Kiristu, Kiristu ouinelani. Ineliwa wewo kahi ineliwa na manda a atu. Ineliwa na Kiristu ku wonga Kiristu uhumala uwungulani kopolo da jofuna jenyu ja maningo dawara nyo.

¹² Hiyo nibatiziwaga, yafwalrafwaniha nnga nikoyiwe vamohi na Yesu. Eto muwari mobatiziwa, fwanyeya hiyo nihivenya vamohi na Kiristu muwari mororomela kopolo dilukulu da Mulugu wenno uwandile nvenyiha Yesu mokwani.

¹³ Nyo wanle mwawenda okwene na jotega jenyu na jofuna jenyu ja maningo jawendana nyo. Mbwenye Mulugu uuvahani ingumi vamohi na Yesu. Liye ohonilevelela jotega jehu jatene.

¹⁴ Nilevelela uwa, malambo a mundulrimu nohofwanela tongiwa zela mangawa nanna hiyo onimanga mulandu zela hiyo viringaniha ja Mulugu. Mulugu eto uhumala timiha mangawa anno, muwari motukula, liye komela vamuradini.

¹⁵ Mulugu ohawaka jowanana jiwa andimuwa abure na aliba utongi wabure, aanyaswihaga vatando. Anyaswiha uwa, Mulugu ohagondjiha muwari mwa Yesu Kiristu.

Kaniholowe na jengo ja vaheno vene

¹⁶ Na mwasa wenno kakalevo unafuna utongani zela mangano a jodja na jong'wa nari zela harihamo pwando dimohi diwa nari ja pwando da mwedi muxa nari ja sabado.

¹⁷ Tchoira jatene jejo jinakala nnga nfulri wa jengo jinafuna za. Hiyo nihiiziwa ira nfulri kahi yengo ya ibaribari, mbwenye ya ibaribari unafwanyeya agali Kiristu mwinnyiwene.

¹⁸ Nyo mbwenye kamwahiye atu ugwadani sogolro wenyu. Tchoira kohokalamo atu anavenda jougwadani sogolro wenyu ira mwahavahiwe yenno Mulugu inafuna liye uvahani. Tchoira anaukanyihedani ira mukayena upama vamentoni va Mulugu muwari motunda jengo ja ilambo ya vati, funaga nnga mwaatamalelege angelro, aliwa wongaga jengo pwi jionne atu morohani. Aliwa bovitukulela mokana joumbuwela ja maningo agali kinna mwasa ofuna vitukulelana.

¹⁹ Mwa eno, aliwa komuhiya Kiristu wenno unafwanyeya agali muru wa maningo. Maningo anadjihiwa muwari mwa muru eto maningo analuweya muwari mwa mafarafadju na misepa dinigumanihile hiyo jano vamohive. Muwari modjihiwa na muru, maningo matene anaulukula na makalelo anavaha Mulugu.

²⁰ Akala nyo muhumala kwa vamohi na Kiristu zela ja minemba dabure nnafwanyeya mwilamboni ya vati, kodi mwasiwa gwa nni nyo wendaga nnga muli atu a mwilamboni, nyo harihagamo sanganiko da ilambo ya vati doira:

²¹ <<Jeji, kuhinde. Jeji, kudje. Jeji, kumexeri.>>?

²² Mwasiwa gwa nni nyo harihagamo sanganiko dedo nnawonga zela jengo ja ilambo ya vati jinalabiwana amala jigomela tolotchiwa? Nyo munawanda avi harihamo sanganiko dedo nnakuma mwa zelru da atu na mafundjihelo a atu?

²³ Mutu aona sanganiko dedo, nnaoneya nnga ti zelru. Mwasiwa sanganiko dedo nnawonga zela makalelo ovilimbiheda irana ja Mulugu, roma vitundihaga jengo, fiyeda onihaga goyi maningo aye. Mbwenye jatene ejo kajinalaba ira mutu awande gondjiha jofuna jabure ja maningo.