Koloso 1 - Mazu Otchena a Mulungu

Malondjelo a Pawulo

¹ Unalremba gu miyo Pawulo, mutu osakulriwa mofuna mwa Mulugu ira dikale namarumiwa wa Yesu Kiristu. Dili na mbalihu Timoteyo.

² Nnoulrembelani nyo muli atu otchenihiwa, muli abalihu ororomeleya muwari mwa Kiristu, munafwanyeya Koloso. Malondjelo anaurumihedani hiyo ba ala. Nifunne ira sayi na murendele okumela wa Mulugu Babihu, jatene ejo jikale na nyo.

Mazu omutamalela Mulugu no alobelela akuda Koloso

³ Naulobelelagani nnomutamaleletcha Mulugu, Baba wa Nabwiya wehu Yesu Kiristu na mwasa wa nyo.

⁴ Tchoira nihimala vwa zela nroromelo ninna nyo, mmuroromelaga Yesu Kiristu eto nihimala vwa makalelo munaaziveliwa nyo atu atene otchenihiwa

⁵ mwasiwa nyo muhukana ibaribari zela yoing'anela inafuna nyo vahiwa ilambo ya zulu. Yoing'anela yenno muromile vwa muwari mwa mazu a ibaribari anno anafwanyeya kagali Muselu Wapama.

⁶ Muselu Wapama wenno uhufiya wewo uli nyo wo. Eto mwilamboni ya vati mwatene Muselu Wapama unavaha misapo dapama eto unaulukula nnga vinaireya muwari mwa nyo kuma siku noroma mwavwile nyo eto muromile nyo kana ibaribari zela sayi da Mulugu.

⁷ Nyo mwaromile fundja Muselu Wapama na mulombwana Epafaraji wenno nnamuziveliwa hiyo, wenno unalaba vamohi na hiyo mabasa amohive. Liye eto gu namalaba ororomeleya wa Kiristu ovahiwa mabasa oulabani nyo.

⁸ Mulombwana Epafaraji eto gwenno uniwandenle zela zivelana munna nyo muwari mwa Munemba Otchena.

⁹ Nagavwile zela nroromelo nenyu, kanihiyile ulobelelani. Muwari moulobelelani, nnanvepa Mulugu ira auiziwiheni pama pama jofuna jaye ira mukayena zelru datene no onelramo watene okumela wa liye

¹⁰ ira muwande wenda na makalelo ofwanela vamentoni va Nabwiya, mmuziveliwihaga mwa jatene, muvahaga misapo dapama zela irana japama eto makalelo enyu omuiziwa Mulugu kadowagave sogolro.

¹¹ Mulugu na kopolo dilukulu dinna liye aulimbiheni ira mukayena kopolo datene ira muwari mwa jatene jinaufwanyani, muwandege kana vilela watene no pwaseya watene mwaganna hagalala,

¹² mmutamalelaga Baba zela jatene jinera liye. Baba wenno usakanyile ira nyo muwande vahiwa upama unafuna vahiwa atu atene otchenihiwa anno anafwanyeya mmoneyani.

¹³ Mulugu uhunivunela, anikumihagamo muwari mwa utongi wa muisini mwali hiyo. Uhunitukula, nihela muUmweneni mwa Mwanaye wenno unamuziveliwa liye.

¹⁴ Yesu uhuniwombola muwari mwa sangiri naye, anilevelelaga jotega jehu.

¹⁵ Kiristu gu nlandaniho na Mulugu wenno ahanawanda oneya eto gu Mwana Murandji wa jatene jipandutchiwe.

¹⁶ Tchoira jengo jatene jipandutchiwe muwari mwa liye. Nari jengo jinafwanyeya ilambo ya zulu, nari ja ilambo ya vati, jengo jooneya na meso, johooneya na meso, mipando da umwene, andimuwa, anamatonga, nari utongi watene, jatene jene jipandutchiwe muwari mwa Kiristu eto jipandutchiwe ira Kiristu ateteliwe.

¹⁷ Kiristu ohokalawo jengo jatene jahanakalewo. Eto Kiristu gunakalihawo jatene jene ira jikalewove.

¹⁸ Kiristu gu muru wa maningo anno anafwanyeya kagali nikuru na atu anno anamuroromela. Liye goroma eto gu Mwana Murandji muwari mwa atu okwa ira liye akale mwinnya wa jatene jene.

¹⁹ Tchoira Mulugu mofuna mwaye, afunne makalelo matene aye kakale muwari mwa Mwana.

²⁰ Eto afunne ira muwari mwa sangiri naye navuvihiwe vamuradini, awandanihe jatene na liye, azagana murendele. Nari jengo jili ilambo ya zulu, nari jengo jili ilambo ya vati, Mulugu ohowandaniha jatene na liye muwari mwa Mwanaye.

²¹ Na nyenne wanle mwali olapela wene na Mulugu. Nyo eto moidana na Mulugu na mwasa wa joumbuwela na joira jabure jaira nyo.

²² Mbwenye peno Mulugu uwanda uwandanihani na liye muwari mwa ukwa Yesu ukwile liye na maningo aye ira awande uvelelani vamentoni va Mulugu mwagali atu otchenihiwa, atu ohokana yotega, atu ohokana imanya.

²³ Ira Yesu awande uvelelani mwagali apamene siku nenne, inofuneya muwendegeve na nroromelo nenyu, mukale atu olimba eto ovilela, kamuhiye yoing'anela yenno ikumile muwari mwa Muselu Wapama muvwile nyo, wenno ulaleyiwe ilambo yatene ya vati. Miyo Pawulo divahiwe ira dikale namalaba wa Mulugu olaleya muselu wenno.

Pawulo ohowonga zela mabasa Mulugu anvahile liye

²⁴ Miyo nnohagalala na mwasa wa goyi nnaona miyo muwari moulimbihani. Eto dihalawo goyi dimohi diwa nnga goyi dedo dafwanyeyana Kiristu nnafuna miyo onihiwa mmaningoni mwaga muwari molimbiha maningo a Kiristu, anno anafwanyeya kagali nikuru na atu omuroromela aye.

²⁵ Mulugu udivahile izo ira dikale namalaba oulimbihani nyo eto ovweyiha mazu a Mulugu mwapama eto mokwakwanela.

²⁶ Dihikana mabasa ovweyiha yengo yokoyeya, yengo yenno afwihu a wanle yahawandile atu iziwa. Mbwenye peno Mulugu utukula yengo yenne yahaiziwile afwihu a wanle, liye aoniha atwaye otchenihiwa.

²⁷ Mulugu ohosakulra ira aaonihe atwaye otchenihiwa yengo yokoyeya yagali upama ulukulu wohokala wa masika unaawendela liye atwaye kagali atu ohokala aJudewu. Upamiwa gu ula. Kiristu uli mmirimani mwenyu, nona muhukana ibaribari zela undimuwa unafuna hiyo za kana.

²⁸ Hiyo nneretcha awandela atu ibaribari zela Kiristu, naawendjelihaga atene eto naafundjihaga atene na zelru datene da Yesu ira vasogolro niwande avelela atene vamentoni va Mulugu kagali olimba nroromelo muwari mwa Kiristu.

²⁹ Tchoira miyo dalabaga, dazuzumaga muwari mwa kopolo dilukulu dedo Kiristu unalaba liye muwari mwa miyo, ili ira atene kakale olimba nroromelo.