Juwawu 8 - Mazu Otchena a Mulungu

Yesu ohomulevelela muhiyana mmohi afwanyiwe araruwaga

¹ Yesu ohodowaga Mwango wa Mitengo da Azeti.

² Mmetcheloni muwa na mabebehene ohokumaga mwangoni ule, liye dowa muNyumbani mwa Nabwiya. Evale anamwindji a atu kohoza wa liye, liye garati, roma afundjiha.

³ Mwa tempu yenne, anamafundjiha malamulo vamohi na aFarizewu kohomuzana muhiyana mmohi kamuhindilena atu muselu oraruwa, aliwa muzana vamentoni va anamwindji atene.

⁴ Evale kohonfukaga Yesu, aliwa ira: <<Namafundjiha, muhiyanola uhindiwe araruwaga.

⁵ Mbwenye muwari mwa malamulo anivahile Mozeji, oniwandela ira muhiyana okala nnga ha wenna inafwanela avokiwe mabwe pakana afiyede kwa. Nnga nyo munawonga avi zela jeji?>>

⁶ Aliwa kanfukaga enne, ali ira kamuxixe ira kawande mugwihana mulandu Yesu. Kaganfukile eno, Yesu mbwenye kabaranyedile wakula. Liye ohoworamaga, liye roma lremba vati na ibuno yaye.

⁷ Mbwenye voira aliwa komukanyihedagave yofuka imohive, liye ohoinuwaga, liye aing'ana anamwindjale, awandela ira: <<Akala muwari mwa nyo ukalavo mutu mmohi uli ahanatege, wenno arome nvoka muhiyanoyo mabwe.>>

⁸ Agawongile eno ohowelela woramela vati vale, liye lrembagave.

⁹ Mwa enne aliba muzana ale kagavwile mazu anne, kohoromaga venyavo mmohi mmohi, romana andimuwa arandji baliwa dowa gomiheda azombwe. Mbwenye Yesu aligi oworamene evale.

¹⁰ Yesu vofuna inuwa akoka, so anfwannyevo muhiyanole bahi. Noira enne, ohonfuka, liye ira: <<Nnga ale kauzilena kali uvi? Kalivo uumangileni mulandu?>>

¹¹ Muhiyanole ohowonga ira: <<Nari Nabwiya, kalivo udimangile mulandu.>> Evale Yesu ohowonga ira: <<Na miyene eto kannaumanga mulandu. Dowaga. Mbwenye kuwelele tega akoka.>>]

Yesu unafwanyeya agali moneya

¹² Yesu ohowelelagave wonga na aJudewu eraga: <<Miyo dili moneya wa ilambo ya vati. Ule unadihara, kanawenda na isi, unokana moneya wewo unavaha ingumi.>>

¹³ AFarizewu kagavwile enne kohoiraga: <<We unavihidedela umboni wekave, nona umboni wawo kahi wa ibaribari.>>

¹⁴ Yesu ohawakula, liye ira: <<Masiki davihidedelaga umboni mekave, umboni waga gwa ibaribari. Tchoira unakumela miyo dihiiziwawo eto unafuna miyo dowa dihiiziwawo. Nyo mbwenye ukumenle miyo, kamuiziwilewo. Nne eto unadowa miyo, kamuiziwilewo.

¹⁵ <<Nyo mwatongaga, munatonga na matongelo anaumbuwela nyo mofuna mwenyu. Miyo mbwenye kannamutonga mutu meka.

¹⁶ Miyo datongaga, matongelo aga ba matongelo a ibaribari, tchoira kannatonga mekave. Miyo nnatonga vamohi na Baba wenno udirumile.

¹⁷ <<Masiki mwavenda mmalamuloni anno munahara nyo, munofwanya ira umboni wa ibaribari unahidedeliwa na atu ambinli.

¹⁸ Miyo nnavihidedela umboni damwinnya eto Baba wenno udirumile, na liyene unodihidedela umboni.>>

¹⁹ Evale atwale kohonfuka ira: <<Weyo Babawo uli waani?>> Yesu ohaweliheda mazu eraga: <<Ahakale mudiiziwa miyo, na Babene mogomuiziwa. Mbwenye voira nyo kamudizi, na Babene kamumuiziwile.>>

²⁰ Mazu anna Yesu awongilege afundjihaga muNyumbani mwa Nabwiya vatando vene, nimburo naveleletcha atu kobiri. Eto agawongile enne, kalivo amuhindile mwasiwa ora yaye yali yahanakwakwane.

Ule ahanamuroromela Yesu unagomela kwa na jotega jaye

²¹ Evale Yesu ohawandela fendo imohiwa mazu amohive oira: <<Miyo nnadowa. Dadowa munerege divenda eto munagomela kwa na jotega jenyu. Tchoira unadowa miyo nyo kamunawanda diharawo.>>

²² Evale aJudewu kohowonga oka oka keraga: <<Kodi mutula jinawonga liye ji eraga: <Unadowa miyo, kamunawanda fiyawo.> ku tapulela nni? Kodi unafuna avipe eka?>>

²³ Mbwenye Yesu ohawandelagave eraga: <<Nyo muli atu a ilambo ya vati. Mbwenye miyo dikumenle zulu. Nyo muli a ilambwela, miyo mbwenye kadili wa ilambo ya vati ila.

²⁴ Nona duwandelagani ira munokwa na jotega jenyu. Tchoira mwaharoromele ira MIYO DILI, munagomela kwa na jotega jenyu.>>

²⁵ Evale atwale kohonfuka, aliwa ira: <<Weyo uli ani?>> Yesu ohawakula kwi: <<Kuma varomile miyo ufundjihani, dinnana uwandelani zela miyo.

²⁶ Miyo dahafune, derege wanda wonga jengo jidjindji joumangani mulandu. Mbwenye miyo kannatamangela wonga joumangani mulandu. Nnauwandelani nyo atu a ilambo ya vati jengo ja ibaribari jejo jiwandeliwe miyo na wenno udirumile.>>

²⁷ Mbwenye Yesu agawongile enne, adjindji tchawandile onelramo ira Yesu awongaga zela wenno amurumile, amuwonga Mulugu Baba.

²⁸ Evale Yesu ohawandelaga eraga: <<Nyo mwaza mmutomeya Mwana wa Mutu pa evo vanafuna nyo iziwa ira MIYO DILI eto panafuna nyo iziwa ira miyo kannairana yengo na utongi waga mbwenye nnawonga nnga Baba mudifundjihele liye.

²⁹ Eto wenno udirumile unnana disogolrelra. Liye kadihiyile meka mwasiwa miyo dinnanave irana jejo jinaziveliwa liye.>>

³⁰ Yesu awongaga eno, kohokalawo atu oindjiva karomile muroromela.

Yesu ohowonga ira: <>

³¹ Evale Yesu ohowonga na aJudewu anno kamuroromela, liye ira: <<Nyo mwakalave muwari mwa mazu aga, na ibaribari muli anamadiharaga,

³² eto munoiziwa ibaribari. Ibaribari yenno tchinafuna ukutchani.>>

³³ Evale [ale kahamuroromenle], kagavwile jowonga ja Yesu, kohomuweliheda keraga: <<Hiyo nibaliwe muzizani mwa Abarahamu. Kalivo uromile nisakanya hiyo uzari romela wanle. Nnga weyo unawanda avi wonga ira: <Munoza mukutchiwe.>?>>

³⁴ Yesu ohawakulaga, liye ira: <<Miyo nnafuna duwandeleni ibaribari. Mutu uli watene unatega unafwanyeya agali muzari mmandani mwa yotega.

³⁵ Fwanyeya ira muzari kanakalave vande kala no kala. Mbwenye mwana wa vande gunakala vande vale kala no kala.

³⁶ Nona Mwana aukutchani, na ibaribari munomala kutchiwa mukutchiwelo.

³⁷ <<Miyo dihiiziwa ira mubaliwe muzizani mwa Abarahamu. Mbwenye masiki eno nyo munovenda jodipa mwasiwa mmirimani mwenyu kamunarumela mazwaga.

³⁸ Miyo nnawonga jionne miyo na Baba. Nyo mbwenye munairana jivwile nyo na babinyu.>>

³⁹ Atwale kohomuwakula ira: <<Hiyo mbwenye nili ana Abarahamu.>> Yesu ohowakula kwi: <<Mwahakale ana Abarahamu, mwerege laba jejo jalaba Abarahamu.

⁴⁰ Nyo mbwenye kamunairana nnga jerana Abarahamu. Munavenda jodipa agali miyo nnauwandelani ibaribari ivwile miyo na Mulugu. Abarahamu mbwenye jejo kairilena.

⁴¹ Nyo munairana mabasa a babinyu.>> Evale atwale kohomuwakula ira: <<Hiyo kanibaliwe muwari mwa uputa, nari. Nihimukana Babihu wenno unafwanyeya agali Mulugu.>>

⁴² Evale Yesu ohawakula eraga: <<Babinyu ahakale Mulugu, mwerege diziveliwa miyo. Tchoira za uzile miyo mwilamboni muno, dikumile wa Mulugu. Tchoira miyo kadizile mofuna mwaga mekave bahi. Mulugu gudirumile.

⁴³ <<Nyo kamunawanda onelramo inawonga miyo mwasiwa nyo kamunafuna vwa jowonga jaga. Mwahafunege vwa, mwerege onelramo.

⁴⁴ Mutukunle makalelo a babinyu Diyabo. Funa wenyu ku irana jofuna jaye. Tchoira liye gu mpanga kuma voroma vene. Liye kanafuna vwa ibaribari mwasiwa liye ibaribari mmirimani mwaye kinafwanyeyamo. Liye awongaga, unawonga jonama jejo jili mmirimani mwaye mwasiwa liye eto gu namanama eto gu baba wa jonama.

⁴⁵ Mbwenye nyo kamunawanda diroromela mwasiwa miyo nnauwandelani ibaribari.

⁴⁶ <<Kodi muwari mwa nyo mwatene muli eva, ukala udifwannye diiragana yotega? Akala miyo kannairana jotega eto nnauwandelani ibaribari, nnga mwasiwa gwa nni nyo hawandaga diroromela?

⁴⁷ Ule uli wa Mulugu unovwa mazu a Mulugu. Nyo mbwenye mwahanafunela nyo vwa mazu a Mulugu mwasiwa kamuli aye.>>

Yesu ohowonga ira Abarahamu ahanakalewo liye ohokalawo

⁴⁸ AJudewu kohomuwakula ira: <<Hiyo nawongaga ira weyo uli muSamariya eto ukana munemba wabure, kodi kannawonga ibaribari?>>

⁴⁹ Yesu ohawakula eraga: <<Miyo kadinna munemba wabure. So mbwenye dihikana unamutetela miyo, wenno unafwanyeya agali Baba. Nyo eto kamunaditetela.

⁵⁰ Mbwenye miyo kannavenda titimihiwa na atu. Ukala unadititimiha, liye eto gu Namatonga.

⁵¹ <<Miyo nnafuna duwandeleni ibaribari. Ule unakoya mazwaga, kaza akwa.>>

⁵² Evale aJudewu kohomuwakula ira: <<Peno mbwenye nihiiziwa ira weyo ukana munemba wabure! Tchoira Abarahamu vamohi na anamafiyiheda atene kohomala kwa. Eto weyo unawonga ira: <Ule unakoya mazwaga, liye mbwenye kaza akwa.>

⁵³ Kodi weyo uli mundimuwa mukwaranya babihu Abarahamu wenno ukwile? Nne anamafiyiheda na aliwene kohokwa wanle. Nnga weyo unaviona nnga uli ani?>>

⁵⁴ Yesu ohowakula ira: <<Miyo davititimihaga meka, vititimiha waga kunna mabasa. Mbwenye unawanda dititimiha gu Baba wenno munamuwonga nyo ira gu Mulugu wenyu.

⁵⁵ Mbwenye eto wenno unamuira nyo Mulugu wenyu, nyo kamumuiziwile. Miyo mbwenye dihimuiziwa. Tchoira dahairilege ira kadimuiziwile, dakala namanama nnga nyenne. Mbwenye miyo dihimuiziwa eto nnokoya mazwaye.

⁵⁶ <<Babinyu Abarahamu ohagalala modediha ira aone za waga. Evale liye ohoona za waga. Nomala ona za waga, liye ohoziveliwa.>>

⁵⁷ Yesu agawongile enne, aJudewu kohomuwakula keraga: <<Weyo nne yaka 50 kunakayena. Nnga Abarahamu, umuonne ora nni?>>

⁵⁸ Yesu ohawakula eraga: <<Miyo nnafuna duwandeleni ibaribari. Abarahamu ahanakalewo, MIYO DILI.>>

⁵⁹ Evale kohoroma doda mabwe ira kampena. Mbwenye Yesu ovikoya, liye kuma Nyumba ya Yehova vali liye, dowaga jaye.