Juwawu 5 - Mazu Otchena a Mulungu

Vulumutchiwa wa mulombwana mmohi ohowenda

¹ Nomala eno, vagavirile malambo, Jeruzalemu wohokalaga pwando ya aJudewu. Evale Yesu na liyene ohodowaga Jeruzalemu ule.

² Fwanyeya ira Jeruzalemu ukala tanki imohi eni ya mahindje wandamelana va mulango ovolowela sidadile, mulango wenno unaitaniwa Mulango wa Mabila. Ntiya nne nnaitaniwa Beteseda na iwongelo ya iEberewu. Wandamelana vatankini vale vihikala maramada matanu ira atu kavumegemo.

³ Mwa tempu yenne mmaramadani mule mohomalaga zala arenda adjindjene, amohiwa aliba haona, aliba rangala na aliba howenda.

⁴ Tchoira mungelro wa Mulugu vamohi vuwa oza, liye wendihaga mahindjale. Mungelrole asakwinya mahindjale, mutu wenno akala murandji bwina mutankini mule ovulumuwa malringana urenda wanna liye.

⁵ Mwa tempu yenne muwari mwa arenda kafwanyeya evale, ohokala mulombwana mmohi ohowanda wenda, amanle yaka 38 agalive eno, ahawandaga wenda.

⁶ Yesu agafiyile evale, agamuonne ogonantene evale, ohoiziwaga ira: <<Mutula uromile bulela wanle>>, mwa enne ohonfuka ira: <<Kodi weyo unofuna vulumuwa?>>

⁷ Murendole ohomuwakula ira: <<Andimuwa, vulumuwave miyo nnofuna. So mahindje kawendihiwaga, kadinna mutu odikamiheda ira dibwine mutankini mule. Mahindje kawendihiwaga, tempu inavenya miyo didowaga ira dabwine, ukala nfwaga mmohiwa unabaranya, liye bwinamo miyo dahanafiye.>>

⁸ Evale Yesu ohomuwandela ira: <<Kavenya, utukule makawo, udowege.>>

⁹ Mobaranya mutule ohovayela vulumuwa. Liye venya, tukula makaye, dowaga. Fwanyeya ira siku nenne naligi siku na sabado.

¹⁰ Mwa enne andimuwa a aJudewu kagamuonne, kohonfuka, aliwa ira: <<We unawanda avi irana yenno inakameliha malamulo, tukulaga maka wendagana peno siku na sabado ni?>>

¹¹ Liye ohawakula eraga: <<Mulombwana wenno udivulumutchile, gwenno udirumile ira: <Utukule makawo, udowege.> >>

¹² Aliwa kohonfuka ira: <<Kodi wenno bani uuvulumutchile, auruma ira: <Utukule makawo, udowege.>?>>

¹³ Fwanyeya ira mwa tempu yenne mulombwanole kamuiziwile anvulumutchile. Mwa enne kawakunlege yengo, tchoira Yesu agamanle nvulumutcha, ohokwaranyagavo na mwasa oira vohokalaga atu adjindji.

¹⁴ Ora imohiwene Yesu agali Nyumba ya Yehova, ohongumanana mulombwana anvulumutchile liye ule. Evale ohomuwongana ira: <<Weyo uhumala vulumuwa! So kuwelele irana jotega tawiha ira inauireyele yengo yabure yokwaranya makalelo wanna we.>>

¹⁵ Mwa enne mulombwanole pawandile liye iziwa ira anvulumutchile ali Yesu. Evale ohovira dowa awandela aJudewu ale ira: <<Mulombwana udivulumutchile gu Yesu.>>

Andimuwa a aJudewu kohovenda jompa Yesu

¹⁶ Mwa enne andimuwa a aJudewu komuharaharetcha Yesu na mwasa oavulumutcha atu siku na sabado.

¹⁷ Mbwenye kaganfwannye Yesu, liye ohawandela ira: <<Babaga unalabave ante peno eni. Na miyene eto nnalaba eni.>>

¹⁸ Mwa enne na mwasa wa jowakula jaye, aJudewu ale yofuna yewa yoira kampe yohosimbwagave wendjededeya. Tchoira para aliwa, yoviringaniha ya Yesu tchali zela viringaniha nlamulo na sabado bahi. Imohiwa yatakaleliwa atu ali na mwasa oira Yesu awonga ira: <<Mulugu gu Baba>>, liye vikalihaga sawasawa na Mulugu.

¹⁹ Yesu mbwenye ohawakulaga ira: <<Miyo nnafuna duwandeleni ibaribari. Mwana mwa liye ekave kanawanda irana yengo mwa kopolo daye. Mbwenye jatene jinairana liye ti jejo jimohive jinamuonana liye Babaye. Tchoira jatene jinera Babaye, Mwana na liyene unairana jimohive.

²⁰ <<Tchoira na mwasa oira Baba unomuzivela Mwanaye, unomuoniha jatene jinaira liye. Eto Baba unomuoniha matikiniho amohiwa malukulu kwaranya anna munaona nyo ala ira nyo muwande tikiniheya.

²¹ Tchoira na makalelo amohive nnga Baba unaavenyiha liye mokwani atu kakwile, aavahaga ingumi, Mwanaye na liyene unoavaha ingumi anno unaafuna liye ira kakayena ingumi.

²² <<Baba kanamutonga mutu. So utongi watene unvahedile Mwanaye,

²³ ira atu atene kamutetelege Mwanaye ule na makalelo nnga anamutetela atu Babaye. Mbwenye ule ahanamutetela Mwanaye ule, na Babayene umurumile kanamutetela.

²⁴ <<Miyo nnafuna duwandeleni ibaribari. Ule unavwa mazu aga eto amuroromelaga wenno udirumile, ukana ingumi yohomala. Mutuyo kaza atongiwa, mbwenye mofutukula liye umala kuma mokwani mwali liye, uvolowa muingumini.

²⁵ <<Miyo nnafuna duwandeleni ibaribari. Inoza ifiye tempu eto tempuwa ihimala fiya eni yoira atu okwa kavwe nizu na Mwana Mulugu. Eto ale anavwe anokana ingumi.

²⁶ Tchoira sawasawa nnga Baba gu namavaha wa ingumi, Baba eto unvahedile Mwanaye ira akale mwinnya ovaha ingumi.

²⁷ Mulugu eto unvaha ira akayena utongi ira atongege mwasiwa liye gu Mwana wa Mutu.

²⁸ <<Kamutikiniheye zela yenno inafuna miyo wonga. Ikala ora inafuna za fiya ira atu atene anafwanyeya masiyeni kaze kavwe nizu naga.

²⁹ Kagavwile, anoza kavenye mokwani. Ale kairana japama, anavenyege ira kakayena ingumi eto ale kairana jabure anavenyege ira kadowe katongiwe.

Yesu ohowonga zela ale anamuhidedela umboni

³⁰ <<Miyo kannawanda irana yengo mwa miyo meka. Miyo nnatonga nnga munawandeliwa miyo. Eto matongelo aga ba matongelo apama mwasiwa miyo kannatonga mofuna mwaga, mbwenye nnatonga mofuna mwa wenno udirumile.

³¹ <<Miyo davihidedela umboni meka, umboni waga kunakala wa ibaribari.

³² Mbwenye ukala mutu mmohiwa unadihidedela umboni. Eto miyo dihiiziwa ira umboni waye gu umboni wa ibaribari.

³³ Nyo moharuma atu, aliwa dowa nfuka Juwawu. Aliwa kaganfwannye, liye uhudihidedela umboni wa ibaribari.

³⁴ Eto miyo dawongaga eno, kahi ira nnafuna umboni wa atu a mwilamboni, nari. So nnawongela umboni wa Juwawu ira muroromele umboni waye ira muvulusiwe.

³⁵ <<Juwawu ali panti yahinda imoneyaga pama. Eto nyo muhuwanda hagalala ora ya vang'onove zela moneya wewo wavaha liye.

³⁶ Miyo mbwenye dihikana odihidedela umboni omukwaranya Juwawu. Umboni nnawonga miyo ti joira jejo jidivahedile Baba ira diiregena. Joira jinera miyo jinodihidedela umboni ira udirumile gu Baba.

^37-38 Baba wenno udirumile, liye uhudihidedela umboni. Nyo mbwenye na mwasa oira kamunafuna diroromela dagali wenno umurumile liye, nona kamunababihege vwa nizu naye eto kamunababihege ona makalelo aye eto mmirimani mwenyu kamunna mazu aye. Mbwenye ahakale nnga mudiroromela miyo, jatene ejo mogoona.

³⁹ <<Nyo munolimbiheda fundja Mazu muwari moumbuwela ira: <Mazwala banafuna nivaha ingumi yohomala.> Eto fwanyeya ira Mazu anafundja nyo banno anadihidedela umboni.

⁴⁰ Mbwenye nyo munokonda za wa miyo ira mukayena ingumi.

⁴¹ <<Miyo kannavenda titimihiwa na atu.

⁴² Mbwenye dihiiziwa ira mmirimani mwenyu, muziveliwa Mulugu kulimo.

⁴³ Miyo dizile na nzina na Baba, nyo mbwenye kamudiwatchenle. Mbwenye mutu mmohiwa aza na nzina naye, munomuwatchela.

⁴⁴ Kodi munawande diroromela avi agali nyo muli atu ovenda teteliwa na atu, hiya teteliwa wa ibaribari okumela wa Mulugu bahi?

⁴⁵ <<Kamuumbuwele ira miyo vano gunafuna ugwihanani mulandu vamentoni va Baba. Unafuna ugwihanani mulandu kahi miyo, gu Mozeji wenno munamuroromela nyo.

⁴⁶ Tchoira ahakale muwanda muroromela Mozeji mwa ibaribari, mogodiroromela miyo. Mwasiwa jejo Mozeji jalrembile liye, jawonga zela miyo vano.

⁴⁷ Kodi muwari mohowanda roromela ja Mozeji jilrembile liye, munawande avi roromela jinawonga miyo?>>