Juwawu 4 - Mazu Otchena a Mulungu

Yesu ohomulaleya muhiyana mmohi nkuda Samariya

^1-2 AFarizewu kohovwa ira: <<Atu oindjiva anamuhara Yesu eto liye unoabatiza atu adjindji mukwaranya Juwawu>>, agali aabatiza atwale ali anamamuharaye, hiya Yesu. Mwa enne Nabwiya agaiziwile ira aFarizewu kohovwa ira liye oabatiza atu adjindji,

³ ohovenya na anamamuharaye porovinsiya ya Judeya, aliwa dowaga porovinsiya ya Galileya.

⁴ Muwari mwa ulrendo wewa, Yesu ohofuna ira avire muwari mwa porovinsiya ya Samariya.

⁵ Mwa enne kadowaga, kohofiyaga unde wa sidadi ya Sikari, muwari mwa porovinsiya ya Samariya, wandamelana munda wenno Jako anvahile liye mwanaye Joze.

⁶ Vevale vohokalaga isime yatimbile Jako wanle. Kagafiyile evale, nzuwa nagali vari na vari, Yesu ohogarati wandamana vaisimeni vale mwasiwa owaheyaga na mwasa wa ulrendo wannaga atu.

^7-8 Anamamuharaye kohovolowaga sidadi ira kagule jodja. Yesu agahanle evale, ohozaga muhiyana mmohi eni muSamariya ira arunge mahindje vaisimeni vale. Agafiyile evale Yesu ohonvepaga ira: <<Nnavepa udivahe mahindje ira ding'we.>>

⁹ Muhiyanole ohomuwakulaga ira: <<Jinawandeya avi nyo mwagali muJudewu divepa miyo mahindje dagali muSamariya?>> (Muhiyanole aza awongaga eno tchoira aJudewu kinavahana na aSamariya, nne vang'ono.)

¹⁰ Mwa enne Yesu ohomuwakulaga muhiyanole ira: <<Wahaiziwilege yovaha inavaha Mulugu eto wahamuiziwilege wenno unauvepa mahindje, na wenne wogonvepa eto liye ogouvaha mahindje a ingumi.>>

¹¹ Muhiyanole agavwile mazu anne, ohowakula ira: <<Andimuwa, mahindje a ingumi munawonga nyo ayo, munakumana waani? Tchoira isimela ihidiha eto nne nyo kamunna yorungana mahindje.

¹² Isimela atimbile ali mbwiyihu Jako, liye ng'wagavo na abalaye vamohi na jifuwo jaye. Na vanove hiyo nnang'wetcha veva. Kodi nyo mwawongaga eno, muli mundimuwa mukwaranya Jako?>>

¹³ Yesu ohomuwakula eraga: <<Atene ong'wa mahindje anna anowelela kana ntona akoka.

¹⁴ Mbwenye mutu ang'wa mahindje nnanvaha miyo, kanawelela kana ntona akoka. Mahindje nnanvaha miyo anomukalela nnga isime yokana mahindje owenda, ananvaha ingumi yohomala.>>

¹⁵ Evale muhiyanole ohowakulaga eraga: <<Andimuwa, divaheni mahindje anno ira dahakayena ntona akoka ira dahawelele runga mahindje vaisimeni va.>>

¹⁶ Yesu ohomuwandelaga muhiyanole eraga: <<Kadowa wamuitane mamunawo, muze vamohi.>>

¹⁷ Evale muhiyanole ohowakulaga ira: <<Miyo kadinna mamunaga.>> Evale Yesu ohomuwakula ira: <<Uhuwonga pama muwari mowakula ira kunna mamunawo.

¹⁸ Tchoira wohoteliwa na alombwana atanu. Teto mulombwana unna we peno kahi mamunawo. Iwongile we tcha ibaribari.>>

¹⁹ Muhiyanole ohowonga ira: <<Andimuwa, miyo nnauonani ira muli namafiyiheda.

²⁰ Makolo ehu a wanle kamutamalela Mulugu vamwangoni va. Mbwenye nyo aJudewu muni: <Nimburo nomutamalela Mulugu ku Jeruzalemu.> Kodi nimburo na ibaribari nomutamalela tivi?>>

²¹ Yesu ohomuwakulaga ira: <<Muhiyana we, uroromele inafuna miyo uwandela. Vasogolro atu kinamutamalelege Baba vamwangoni va, nne Jeruzalemu.

²² Tchoira nyo aSamariya, munamutamalela nyo, kamumuizi. Mbwenye hiyo unamutamalela hiyo, nihimuiziwa. Tchoira vulusiwa unazela mwa aJudewu.

²³ <<Inoza ifiye tempu eto eni na ibaribari ihimala fiya ira aliba mutamalela Mulugu a ibaribari kamutamalelege mwa Munemba eto mwa ibaribari. Tchoira Baba unaavenda atu ira kamutamalelege na makalelo anno.

²⁴ Mulugu gu munemba. Nona ule unafuna mutamalela, amutamalele muwari mwa Munemba eto na makalelo a ibaribari.>>

²⁵ Evale muhiyanole ohowongaga eraga: <<Miyo dihiiziwa ira ukala Namatikeliwa unafuna za, wenno unaromoliwa na nzina na Kiristu. Liye aza, unonionelrihedamo jatene jene.>>

²⁶ Yesu ohomuwakula ira: <<Kiristu awongiwa gu miyene unawonga na weyo peno.>>

Yesu ohalaleya aSamariya

²⁷ Kawongaga enne, anamamuharaye kohofiyaga, kakumaga sidadi. Kagafiyile, kohotikiniheyaga, kaumbuwelaga ira: <<Yesu unavenda nni awongaga na muhiyanola?>> Mwa enne eto tchanfukile yengo ili yatene.

²⁸ Noira enne, muhiyanole ohiyaga munwaye vaiko vale, liye dowa musidadi, roma awandelaga atu eraga:

²⁹ <<Ndoweni mwamuone mulombwana uli iko wu, wenno uwongile jatene jeretcha miyo malambo a mundulrimu. Kaya kaza akala Namatikeliwa wenno unadedihiwa?>>

³⁰ Kagavwile mazu anne, kohogundeyaga, aliwa dowaga wewule wafwanyeya Yesu.

³¹ Vevale anamamuharaye vahanle atu vaisimeni vale, kohonvaha Yesu jodja, aliwa ira: <<Namafundjiha, jodja iji mudje.>>

³² Mbwenye liye ohowakulaga eraga: <<Miyo dihikana jodja jaga ira didje, jejo jahaiziwile nyo.>>

³³ Vevale anamamuharaye kohoroma fukanaga oka oka keraga: <<Kodi ukala uzile anvaha jodja?>>

³⁴ Yesu ohowakulaga ira: <<Udja waga unawonga miyo ku irana jofuna ja wenno udirumile, vamohi no mariha mabasa udirumile liye.>>

³⁵ Yesu ohowongagave eraga: <<Nyo muni: <Vihala medi minnayi ira tempu yohanda ifiye.> Miyo mbwenye nnauwandelani ira muvenyihe meswinyu, muing'ane minda. Jodja jilimo jihimala umma, tempuwa yohanda ihimala fiya.

³⁶ Anamalaba anahanda anotambilra zela mabasiwa analaba atu. Eto ale anahandiwa anokana ingumi yohomala. Jejo jinalaba ira aliba zala na aliba handa, atene kaziveliwe vamohi.

³⁷ Eji jili nnga imariya ya ibaribari inawongiwetcha ira: <Mutu mmohi unozala. Eto unahanda gu mutu mmohiwene.>

³⁸ Miyo durumileni ira muhande jodja jejo jahazanle nyo. Afwinyu balabile, nyo eto munahanda mwemo mulabile atu.>>

³⁹ Mwa enne aSamariya oindjiva a sidadi yenne kohomuroromela Yesu na mwasa wa jowonga ja muhiyanole, agaawandenle ira: <<Uhudiwandela jatene jeretcha miyo malambo a mundulrimu.>>

⁴⁰ Evale aSamariya ale kagadowile nfwanya Yesu, kohonvepaga mwa ntindi ira: <<Hiyo nnafuna mukale na hiyo wewuno.>> Evale Yesu ohokalaga wewule malambo menli.

⁴¹ Mwa enne atu adjindji amohiwa kagavwile jowonga jaye, kohomuroromela.

⁴² Mwa enne kohowongaga na muhiyanole ira: <<Na hiyene peno nnomuroromela. Mbwenye kannamuroromela na mwasa oira nihivwa jowonga jawo bahi, nari. Tchoira hiyo annya nagavwile jowonga jaye, nihikana ibaribari ira gu Nvulusi wa atu a ilambo ya vati.>>

Yesu ohomuvulumutcha mwana wa mundimuwa mmohi

⁴³ Vagavirile malambo menli, Yesu ohovenyihana, liye dowa Galileya.

⁴⁴ Tchoira Yesu mwinnya ohowonga ira: <<Namafiyiheda kanarihediwa ilambo ya waniwa.>>

⁴⁵ Mwa enne agafiyile Galileya, akuda Galileya kohomuwatchela pama mwasiwa aliwa kohoona matikiniho aira liye tempu yali liye vapwandoni Jeruzalemu. Tchoira na aliwene kohodowaga pwandoni ule.

⁴⁶ Noira eno, Yesu ohodowa akoka tatamo ya Kana, porovinsiya ya Galileya wewo wasandutchile liye mahindje kakala vinyu. Wewule wohokala mundimuwa mmohi amulaba mwene. Ndimuwole ohokana mwanaye wa mwanapongwe afwanyeya agali murenda sidadi ya Kafaranamu.

⁴⁷ Mwa enne ndimuwole agavwile ira: <<Yesu ukumile Judeya, uhufiya muGalileya muno>>, ohodowaga nfwanya, liye nvepa ira: <<Mwanaga unafwanyeya agali murenda, uhanle vang'ono ira akwe. Nnauvepani ira mudowe mwanvulumutche.>>

⁴⁸ Evale Yesu ohomuwakula, liye ira: <<Nyo ira mudiroromele munafuna muone jionihedo jinera miyo. Mbwenye mwahaone, kamunadiroromela.>>

⁴⁹ Vevale mundimuwole ohonvepagave eraga: <<Mbwiyeni, baranyani ndoweni vande mwanaga ahanakwe.>>

⁵⁰ Evale Yesu ohomuweliheda mazu, liye ira: <<Kadowaga. Mwanawo uhumala vulumuwa eni.>> Mundimuwole ohororomela mazu Yesu awongile liye. Liye venyihana, dowaga.

⁵¹ Mobaranya liye adowaga, ohagumanagana anamalabaye kamuharelaga. Evale kohomuwandela atu kwi: <<Mwaninyu uvulumuwa.>>

⁵² Evale babaye ule ohafuka ira: <<Uvulumuwile ora nni?>> Aliwa kohowakulaga keraga: <<Febiri imanle nzilo pandi ya 13 ora.>>

⁵³ Evale mundimuwole ohoroma umbuwela ira: <<Na ibaribari mwanaga uvulumuwile nzilo ora imohive yawonga Yesu ira: <Mwanawo uhumala vulumuwa eni.> >> Mwa enne liye na atu a vande vaye kohoroma muroromela Yesu.

⁵⁴ Ila yali ionihedo yanembinli yasakanyile Yesu agakumile Judeya awelelaga Kana muwari mwa Galileya.