Juwawu 3 - Mazu Otchena a Mulungu

Nikodemu ohodowa gumana na Yesu

¹ Ohokala muFarizewu mmohi, ali mundimuwa wa aJudewu, nzina naye eriwa Nikodemu.

² Liye ohovenyaga na mahiyu, dowa nfwanya Yesu, liye ira: <<Namafundjiha, hiyo nihiiziwa ira nyo muli Namafundjiha okumela wa Mulugu, mwasiwa kalivo unairana jionihedo jolingana na jionihedo jinairana nyo, mutuyo ahasogolrelriwaga na Mulugu.>>

³ Evale Yesu ohomuwakula, liye ira: <<Miyo nnafuna duwandele ibaribari. Mutu wenne ahanabaliwe akoka, kaza aona Umwene wa Mulugu.>>

⁴ Evale mulombwana Nikodemu agavwile mazwale, ohomuwakulaga, liye ira: <<Jinawandeya avi, mutu baliwa, liye ulukula, era eno, liye welela baliwa fendo yanembinli? Kodi inowandeya liye awelele mbani mwa mmaye ira abaliwe akoka?>>

⁵ Evale Yesu ohowakula, liye ira: <<Miyo nnafuna duwandele ibaribari. Mutu wenne ahanabaliwe mwa mahindje na mwa Munemba, kaza avolowa muUmweneni mwa Mulugu.

⁶ <<Mwasiwa ule ubaliwe mwa maningo, gwa maningo, ule ubaliwe mwa Munemba gwa Munemba.

⁷ Kutikine vawongile miyo ira: <Inafwanela mubaliwe akoka.>

⁸ <<Baliwa mwa Munemba uli nnga nipevo. Nipevo nnaomba uiziwile atu, so weyo unavwa kukuma uwa bahi. Mbwenye unakumela atu na unaya atu kunaiziwawo. Tchi imohive inaireya na mutu uli watene unabaliwa mwa Munemba.>>

⁹ Evale Nikodemu ohowongaga eraga: <<Kodi ejo jinawandeya avi?>>

¹⁰ Yesu ohomuwakula ira: <<Weyo uli namafundjiha wa aIzarayeli. Kodi kuiziwile jejo?

¹¹ Miyo nnafuna duwandele ibaribari. Hiyo nnawonga jejo jiiziwile hiyo eto nnahidedela umboni jejo jionne hiyo. Nyo mbwenye kamunawanda roromela umboni wehu.

¹² Akala dauwandelagani ja ilambo ya vati nyo kamunawanda roromela, nnga ikalele dawongaga ja ilambo ya zulu, munafuna muwande roromela avi?

¹³ Tchoira kalivo ubabihile gwela zulu, so uiziwile ja zulu gu miyo Mwana wa Mutu dikumenle wewo bahi.

Unamuroromela Yesu unokana ingumi yohomala

¹⁴ <<Eto sawasawa nnga Mozeji atukunle liye nyowa ya mukuwa muisalesaleni atomeya vaimirini, ili pama Mwana wa Mutu atukuliwe, atomeyiwe vaimirini

¹⁵ ira mutu uli watene unamuroromela akayena ingumi yohomala.

¹⁶ Tchoira Mulugu ohaziveliwa atu a mwilamboni ya vati na makalelo ohokala a masika fiyeda liye muruma Mwanaye mmohive anna liye ira mutu uli watene unamuroromela ahatolowe mbwenye akayena ingumi yohomala.

¹⁷ Tchoira Mulugu amurumaga Mwanaye azaga mwilamboni ya vati, kamurumile ira aze aamange mulandu atu, nari. Mbwenye umurumile ira aze aavulumutche.

¹⁸ Ule unamuroromela, kanna mulandu. Mbwenye ule ahanamuroromela umala gwana mulandu. Mulandu umugwenle tchoira kanaroromela nzina na Mwana mmohive wa Mulugu.>>

¹⁹ <<Mulandu unafuna atu tongiwelaga tchoira moneya uza mwilamboni ya vati, mbwenye atu kaziveliwileve isi kwaranya moneya, mwasiwa joira jiwa jali jotakala.

²⁰ Tchoira mutu unairana jabure, unotakaleliwa moneya, mwasiwa era ademule vali moneya vale, unatawa joira jaye jinaoneye.

²¹ Mbwenye ule unairana japama unodowa vomoneyani ira joira jaye jioneyege mwasiwa unairana monvwelela Mulugu.>>

Yesu ohabatiza atu

²² Nomala eno, Yesu na anamamuharaye kohovenya, aliwa dowa tatamo dafwanyeya porovinsiya ya Judeya, liye kala wewule na anamamuharaye, liye abatizaga atu.

²³ Tempu yenne eto mulombwana Juwawu afwanyeya abatizaga tatamo ya Enomi wandamelana sidadi ya Salimi, mwasiwa wohokala mahindje madjindji eto kohokalawo atu oindjivene kazetcha, aliwa batiziwaga.

²⁴ Ora yenno ali Juwawu ahanaheliwe mukadeya.

²⁵ Anamamuhara amohiwa a Juwawu kohokana madugudugu na muJudewu mmohi zela mangano ovihuwa.

²⁶ Mwa enne kohodowa nfwanya Juwawu, aliwa ira: <<Namafundjiha, mulombwana afwanyeya vamohi na nyo kombela ya Jordawu, wenne mwamuhidedele nyo umboni, eni unnana abatiza atu. Eto atu oindjiva anamutamangela liye.>>

²⁷ Evale Juwawu ohowakulaga eraga: <<Kalivo mutu unawanda watchela yengo ili yatene ahavahiwe na Mulugu zulu.

²⁸ Nyo muhumala vwa mazu dawongile miyo oira: <Miyo kadili Namatikeliwa. Mbwenye dili mutu orumiwa ira didowe sogolro waye.>

²⁹ Miyo dili nnga ha koswe. Unamuwatchela namateliwa kahi koswe mbwenye gu mamunaye. Koswe avwa jowonga ja mulombwana, unoziveliwa. Na miyene eto dihimala vwa jowonga jaye, dili oziveliwene.

³⁰ Ili yapama undimuwa waye udowege sogolro. Miyo undimuwa waga uwelelege mundulri.>>

Yesu gwenno ukumenle zulu

³¹ Juwawu ohowongagave eraga: <<Wenne ukumenle zulu gu mundimuwa oakwaranya atu atene. Mbwenye wenno ukumenle ilambo ya vati, gwa ilambo ya vati eto unawonga nnga mutu wa ilambo ya vati. Mbwenye ule ukumenle zulu gu mundimuwa oakwaranya atu atene.

³² Eto wenne ukumenle zulu unaawandela atu zela jengo jionne liye na jengo jivwile liye. Eto kalivo unafuna rumela umboni waye.

³³ Mbwenye ule unaroromela umboni waye, unorumela ira Mulugu gwa ibaribari.

³⁴ Mwasiwa wenne urumiwe na Mulugu unawonga ja Mulugu. Tchoira Mulugu avahaga Munemba waye kanahiyededa.

³⁵ Baba unomuziveliwa Mwanaye eto uhunvaheda jatene mmandani mwaye.

³⁶ <<Ule unamuroromela Mwana ukana ingumi yohomala. Mbwenye ule ahananvwelela Mwana, kanaona ingumi yenno. Mbwenye uwali wa Mulugu ulive na liye.>>