Juwawu 2 - Mazu Otchena a Mulungu

Yesu ohosandutcha mahindje kala vinyu

¹ Vagavirile malambo mararu, kohokalawo matelo tatamo ya Kana, porovinsiya ya Galileya. Yesu Mmaye afwanyeya vamateloni evale.

² Eto Yesu na anamamuharaye na aliwene kohoitaniwaga, kafwanyeyaga evale.

³ Kagaromile dja pwando ya matelo, vinyu kang'waga atu ohomalaga. Vinyu ule agamanle, Yesu mmaye ohozaga liye muwongana eraga: <<Vinyu umala!>>

⁴ Evale Yesu ohomuwakulaga mmaye ule, liye ira: <<We muhiyana we, kodi miyo dinna nni na weyo? Miyo ora yaga kinakwakwane.>>

⁵ Vevale Yesu mmaye ohawongagana anamalaba kafwanyeya vamateloni vale, liye ira: <<Muvwelelege yenno inafuna liye uwandelani.>>

⁶ Vamateloni vale vohokala jombwe tanu na imohi jasakanyiwe na mabwe, jejo aJudewu kaheletchamo atu mahindje kavihuwaga mohariha mangano ewa. Jombwe jile ulukula uwa, kada yombwe mwaya vari va mabidawu mannayi owu matanu na nimohi.

⁷ Evale Yesu ohawandela anamalaba a matelo ale eraga: <<Kazalihani jombwe jo mahindje.>> Evale anamalabale kohozalihaga datene ante vamulomoni.

⁸ Kagamanle zaliha, Yesu ohawandela eraga: <<Karunganimo, mudowe mwanvahe mundimuwa osogolrelra matelo, alawihe.>> Vevale kohorungamo, dowana wa mundimuwole, aliwa nvaha.

⁹ Mundimuwa wa matelo ule agavahiwe, alawihaga kaiziwile ira ali mahindje osandutchiwa kala vinyu. Anamalabale mbwenye baiziwile. Liye agalawihile, ohofiyeda mwezo omuitaniha muteli wa mulombwana,

¹⁰ liye kwi: <<Kodi muirele nni jeji? Afwinyu anababiha gawa vinyu wapama, era eno, magomelo uwa aliwa zana vinyu wa ulraka, atu kagamanle ng'wa. Nyo eto mwamukoyile vinyu wapama kalaga ogomiheda.>>

¹¹ Yenne yali ionihedo yoroma yairilena Yesu tatamo ya Kana, porovinsiya ya Galileya. Muwari mwa ionihedo yerile liye, ohooneyiha undimuwa waye eto anamamuharaye kohomuroromelaga.

¹² Nomala eno, Yesu na mmaye na abalaye na anamamuharaye kohovenyavo, dowa sidadi ya Kafaranamu, aliwa garati wewo malambo mangasi mangasi.

Yesu ohatamangiha aliba malronda vatando va Nyumba ya Yehova

¹³ Tempu ya Pwando ya Mavirelo ya aJudewu yagawandamenle, Yesu ohodowaga Jeruzalemu.

¹⁴ Agadowile vatando va Nyumba ya Yehova, ohafwanya atu adjindji kagulihaga ng'ombe, mabila, na kangayiwa. Ohafwanyaga eto anamatchindja kobiri katchindjaga kobiri diwa evale.

¹⁵ Mwa enne Yesu ohotukula mingohi, liye sakanyana yowaxulana, liye roma abalaletchela atwale unde, liye atamangihagavo vamohi na mabila ewa na ng'ombe diwa dene. Ohofutukulaga eto mameza a aliba tchindja kobiri, kobiri diwa da gwindji gwindji mala morela vati.

¹⁶ Agaafwannye aliba guliha kangayiwa, ohawandela ira: <<Kakumihanivo eji nimburo neni! Kamusandutche Nyumba ya Babaga kala nyumba ya malronda.>>

¹⁷ Mwa enne anamamuharaye kagamuonne Yesu eraga ejile, kohoumbuwela mazu kalrembiwe wanle oira: <<Miyo nnoza dijemo na mwasa wa sandje inna miyo zela Nyumba yenyu.>>

¹⁸ Mwa enne andimuwa a aJudewu kafwanyeyaga evale kohonfukaga Yesu, aliwa ira: <<Kodi ionihedo nni inafuna we irana ira hiyo nikayena ibaribari ira weyo uhukana utongi oirana jatene jinaira we ji?>>

¹⁹ Evale Yesu ohawakula ira: <<Mubwanyule nyumbela, miyo nnoivenyiha akoka muwari mwa malambo mararu.>>

²⁰ Vevale aJudewu kagavwile eno, kohowonga keraga: <<Nyumbela imanle yaka 46 imangiwagave. Kodi weyo unowanda ivenyiha muwari mwa malambo mararu?>>

²¹ Yesu mbwenye nyumba yawonga liye, awonga zela maningo aye.

²² Agavennye mokwani, anamamuharaye kohoumbuwela ira liye ohowonga jejile. Mwa enne kohororomela jejo jafwanyeya mMazuni vamohi na jejo jawongile Yesu.

Yesu ohoiziwa joumbuwela ja atu

²³ Mwa ora yenno yali liye Jeruzalemu tempu ya Pwando ya Mavirelo, Yesu ohoirana matikiniho vamentoni va atu. Kagaonne jionihedo jairile liye, atu oindjiva kohomuroromela.

²⁴ Yesu mbwenye kaaroromela atwale mwasiwa ohoiziwa joumbuwela ja atene anne.

²⁵ Eto kavali yofuneya ira mutu aze amuwandelege zela joira ja atu, tchoira liye mwinnya ohomala iziwa joumbuwela ja mmirimani mwa kada mutu.