Jozuwe 8 - Mazu Otchena a Mulungu

Yehova ohomuwandela Jozuwe makalelo ogondjiha sidadi ya Ayi

¹ Mwa enne Yehova ohomuwongana mulombwana Jozuwe eraga: <<Kuove eto kurendjeye. Uvenye waatukule alombwana atene owanda wana ira mudowe mwawane na atu a sidadi ya Ayi. Miyo dihimala uvahedani mmandani mwenyu mwene wa Ayi vamohi na atwaye na sidadi inatonga liye vamohi na ilambo inatonga liye.

² Sidadi ya Ayi vamohi na mweniwene munodowa mwairena nnga jairilena nyo sidadi ya Jeriko vamohi na mweniwene. Mbwenye fendo ila ihiyana na fendo yoroma, mwasiwa nyo mwagamanle atolotcha atu atene, nyo podi tukula jengo jinafuna nyo vamohi na jifuwo jiwa. Nyo mwadowa wewule, mudowe mwaavitalele unduli wa sidadile.>>

³ Mwa eno, Jozuwe na anyakondwaye kohomala kozeya ira kadowe kawane na atu a sidadi ya Ayi. Jozuwe ohasakulra alombwana a kopolo owanda wana kondo okwakwana 30.000. Nomala eno, oharumaga na mahiyu,

⁴ liye awandela eraga: <<Muvwe pama. Mwadowa, mwavitale unduli wa sidadiyo. Eto kamusimbwe lapela na sidadiyo, mukale ovisakanyedene ira muwane.

⁵ Miyo na anyakondo anafuna hala na miyo nnomaruwa ira nifiye sidadi ule. Aliwa kaniona, kakuma ira kawane na hiyo nnga vere atu fendo yoroma, hiyo nnoroma tamanga kalaga nnga nnatawa.

⁶ Aliwa anoroma nihara hiyo ante kafiye olapela wene na sidadi momeziwa na hiyo. Tchoira anaumbuwelege ira: <Anatawa nnga vere atu fendo yoroma.>

⁷ Mwa ora yenno inaniharege atu, nyo mukume mwemo mwavitanle nyo, mudowe mwatukule sidadile. Tchoira Yehova Mulugu wenyu unouvahedani sidadi ya Ayi mmandani mwenyu.

⁸ Mwavolowa musidadi mule, muhindihe sidadi na munlo, nnga mwemo mwawongele Yehova. Inafwanela muirena jatene jeji juwandenleni miyo.>>

⁹ Nomala eno, Jozuwe oharuma, aliwa dowa vitala. Aliwa kadowilege vitala wu Beteli, wu mavirelo wa nzuwa wa sidadi ya Ayi, vari viwa. Mbwenye Jozuwe vamohi na atu amohiwa ohala ale, mahiyu anne kahanlege vamisasani viwa.

¹⁰ Na mabebehene, Jozuwe ohovenya, liye agumaniha alombwana atene ohala. Evale liye vamohi na andimuwa a Izarayeli, kohasogolrelraga, aliwa roma wenda kadowaga Ayi.

¹¹ Anyakondo kafwanyeya na mulombwana Jozuwe ale kawandamelaga sogolro wa sidadi ya Ayi ile, kohodowaga, aliwa kunga misasa diwa pandi ya norti ya Ayi. Vakungile atu misasa diwa vale na sidadi ya Ayi ule, vari viwa vohokala ndabo.

¹² Noira enne, Jozuwe ohavitaliha alombwana amohiwa okwakwana 5.000 wu Beteli, wu mavirelo wa nzuwa wa sidadi ya Ayi, vari viwa.

¹³ Mwa enne alombwana oindjiva kakungile misasa diwa pandi ya norti ya sidadile, alombwana amohiwa a vang'ono kavitanle mavirelo wa nzuwa wa sidadile. Mbwenye mahiyu anne mulombwana Jozuwe avireliwege vari va ndabo nne.

¹⁴ Evale mwene wa sidadi ya Ayi agaonne ejile, mobaranya liye vamohi na anyakondwaye kohomaruwa na mabebehene ira kadowe kawane na aIzarayeli nimburo neno nawanile atu fendo yoroma, pandi ya Araba. Mbwenye tempu yakuma akuda Ayi ale, tchaiziwile ira eni aIzarayeli amohiwa kohovitala unduli wa sidadi.

¹⁵ Jozuwe vamohi na aIzarayeli atene anna liye kohoromaga welela mundulri kalaga nnga anagondjihiwa, aliwa roma tawelaga ndila yodowa mukokolani.

¹⁶ Mwa enne akuda Ayi kohoitaniwa ira atene kafwanyeya musidadi kakume kadowe kaatamangihe aIzarayeli. Evale kohomutamangihaga Jozuwe vamohi na afwaye ale, aliwa roma ihiya sidadile olapela wene.

¹⁷ Mwa tempu yenne yatamangiha atu aIzarayeli ile, musidadi ya Ayi vamohi na Beteli kamwahanle nne mulombwana mmohi. Musuwo wa sidadi ya Ayi ule kahiyile ohuleyene, aliwa dowa ira kaatamangihe aIzarayeli.

AIzarayeli kohagondjiha akuda Ayi

¹⁸ Evale Yehova ohowonga na mulombwana Jozuwe eraga: <<Utukule mwanangwawo uli mmandani mwawo, utonye pandi unafwanyeya sidadi ya Ayi, tchoira miyo nnouvaheda sidadi ya Ayi mmandani mwawo.>> Mwa ora yenne mulombwana Jozuwe ohotonya sidadi ile.

¹⁹ Jozuwe agatonyihedile mwanango waye sidadi ya Ayi, alombwana anne kavitanle mmambalo mwa sidadi, aliwa kohovenya mobaranya, volowa musidadi mule, aliwa mala igondjiha eto mobaranya aliwa kohohindihamo munlo.

²⁰ Kagahindihile sidadile, alombwana a Ayi kagaing'anne mundulri, kohoonaga utchi atuwelaga agwelaga zulu. Muwari mwa enne aIzarayeli ale katawelaga muisalesaleni kohorungunuwaga, aliwa za wanaga na akuda Ayi. Evale akuda Ayi tchanna kopolo dotawela wu nne wu.

²¹ Mulombwana Jozuwe na alombwana a aIzarayeli anna liye kagaonne utchi agwelaga zulu, kohoona ira afwihu kohovolowa musidadi mule eto kohotumeyamo. Mwa enne, kohoroma wela, aliwa apaga alombwana a sidadi ya Ayi.

²² Eto aIzarayeli anno kahindiha sidadile, na aliwene kohokumaga musidadi mule, aliwa dowa roma wanaga na alombwana a Ayi. Evale alombwana a Ayi ale koheliwaga vari, ala kazaga wu, amohiwa kazaga wu. Mwa enne aIzarayeli kohomala apa atene, kalivo avuluwile eto kalivo atawilege.

²³ Mbwenye kohomuhindaga mwene wa Ayi wa meswene, aliwa mudowana wa Jozuwe.

²⁴ AIzarayeli kagamanle apa amwidaniwa a sidadi ya Ayi mukokolani mwemo mwaahara atu, akuda Ayi ale kagamanle piwa na supada, aIzarayeli ale kohorungunuwaga, aliwa dowa musidadi mule, roma apa na masupadiwa atu atene kahanle mwemo.

²⁵ Evale akuda Ayi atene alombwana na ahiyana kakwile siku nimohive nenne, kali okwakwana 12.000.

²⁶ Fwanyeya ira tempu yaapa aIzarayeli akuda Ayi atene, mulombwana Jozuwe afwanyeya aganna mwanango waye mmandani mwaye agali ovenyihene atonyagana sidadi ya Ayi fiyeda aliwa atolotcha atene.

²⁷ Evale aIzarayeli kohotukulaga anavinyama na jengo jafwanyeya musidadi mule nnga mwemo Yehova mwamurumile liye Jozuwe.

²⁸ Jozuwe ohoihindiha sidadile fiyeda aliwa kala ndebe fiyeda siku na peno eto dowaga sogolro.

²⁹ Evale mulombwana Jozuwe ohomutukula mwene wa Ayi, liye dowa mmangelela muzulu, liye kwa. Kohomuhiya evale ante tchiguwo. Mbwenye nzuwa nifunaga bwinelamo, Jozuwe oharuma atu, aliwa dowa mutapulavo, mudowana va mulango wa sidadile, aliwa mutatilela evale. Evale kohotukula mabwe madjindji, aliwa gudela vazulu va mutembo wa mwenole. Ante siku na peno mabwe anno anafwanyeya nimburo nenne.

Ana Izarayeli koumbutchediwa malamulo

³⁰ Noira enne, Jozuwe ohomangaga ibuwa ya Yehova Mulugu wa Izarayeli mwango Ebali

³¹ nnga mwemo Mozeji muzari wa Yehova mwaawandenle liye Ana Izarayeli, nnga mwemo mulrembiwele atu mulivuruni mwa malamulo a Mozeji zela makalelo omanga ibuwa ya Yehova ira ibuwa ya Yehova ikalege ibuwa ya mabwe ompumbulene eto ohobubudiwa na yengo ya momba. Jozuwe agasakanyile ibuwele, kohovelelaga mikuto dotumeya eto kohokutaga jovelela ja murendele.

³² Kagali evo, Ana Izarayeli atene kaing'anaga, mulombwana Jozuwe ohotukula mabwe, liye lrembavo malamulo Mozeji alrembile liye.

³³ Evale aIzarayeli atene, roma anamurala obaliwa aIzarayeli, dowa atu oza vamohi na andimuwiwa atene, asogolrelri ewa, na anamatonga ewa, kohoimela makuru menli. Amohi pandi ya wu, amohi pandi ya wu, anamakuta anno anafwanyeya kagali aLevi, anno katukula Kaxa ya Yopangana ya Yehova, aliwa kala vari viwa. Eto atu a metadi kakala sogolro wa mwango Jerizimi, atu amohiwa a metadi kakala sogolro wa mwango Ebali, nnga mwemo aawandenle mulombwana Mozeji muzari wa Yehova zela makalelo oareliha aIzarayeli.

³⁴ Noira eno, Jozuwe ohoileri mazu matene a malamulo na mazu matene a mareliho na matembelrelro, nnga mwemo jalrembiwile atu muwari mwa Livuru na Malamulo.

³⁵ Mulombwana Jozuwe ohoileri mazu matene nnga mwarumiwele liye na mulombwana Mozeji ira aIzarayeli atene kavwe romela alombwana, ahiyana, ahima, na atu oza anno kakala na aliwa. Kilivo mazu alupile liye ahaileri.