Jozuwe 7 - Mazu Otchena a Mulungu

Ana Izarayeli kohogondjihiwa na akuda Ayi

¹ Fwanyeya ira Ana Izarayeli tchakwakwanelihedile zela jejo jafuna veleliwa wa Yehova muwari motolotchiwa. Ohokala mulombwana mmohi aitaniwa Akani atukunle mwa jengo jejile jafuna veleliwa muwari motolotchiwa, liye koya. Na mwasa wenne, Yehova ohotakaleliwa na makalelo ohokala a masika zela Ana Izarayeli. Akani ali mwana Karimi, Karimi ali mwana Zabidi, Zabidi ali mwana Zera, eto Zera ali wa nlogo na Juda.

² Siku nimohi Jozuwe oharuma alombwana angasi angasi ira kakume Jeriko wewo wafwanyeya atu, kadowe kawendelele sidadi ya Ayi inafwanyeya wandamelana Bete-Aveni pandi ya makumelo wa nzuwa wa sidadi ya Beteli. Evale alombwanale kohomaruwaga, aliwa dowa iwendelela sidadi ya Ayi ile.

³ Nomala eno, kohowelaga, aliwa dowa muwandela Jozuwe ira: <<Ilambo nifwanyile hiyo wewule, kinafuneya ira atu atene kadowe wewule. So yapamiwa inafwanela naarumeni alombwana okwakwana 2.000 owu 3.000 ira kadowe kawane na akuda Ayi. Kamwaazuzumihe atu atene, nari. Mwasiwa atu anafwanyeya sidadi yenne kahi anene.>>

⁴ Mwa enne kohomaruwaga wandamelana alombwana 3.000. Mbwenye kagadowile wana, aIzarayeli kohofiyeda atawa akuda Ayi.

⁵ Eto akuda Ayi kohoroma atamangiha kuma va mulango wa sidadi yewa, titelaga ipedipedi eni fiyeda Sebarimi. Kaatamangihaga vanipedini vale, kohoromaga aporotcha, aliwa apa aIzarayeli okwakwana 36. Mwa enne, aIzarayeli kohokagana ova.

Yehova ohawandela aIzarayeli makalelo owelela wa liye

⁶ Evale mulombwana Jozuwe ohokawula jowara jaye eto liye vamohi na andimuwa atene a aIzarayeli kohokokoraga, aliwa fiyiha miru diwa vati kaing'anaga sogolro wa Kaxa ya Yehova fiyeda tchiguwo. Aliwa eto kovihela teya mmuruni mwiwa.

⁷ Mulombwana Jozuwe oholobelaga eraga: <<Dihikwa miyo! Nabwiya Yehova, kodi mwasiwa gwa nni mwaalambutchaga mulogo wa Izarayeli muhindje Jordawu? Kodi ali ira munivahede mmandani mwa aAmore, aliwa kanitolotche? Kodi mwahanihiyilege nikala kombela ya Jordawu wewule hiyo kanaziveliwa?

⁸ Nabwiya, miyo nnafuna diwonge nni, vire aIzarayeli kaatawa amwidaniwa?

⁹ Mwasiwa akuda Kana na atu atene anakala ilambo yenna kavwa, anoza kanirindje hiyo atene kamale nipa. Hiyo atene vamohi na nzina nehu na aIzarayeli nnotimihiwa mwilamboni ya vati. Nnga jaireya eno nzina nenyu nindimuwa nnafuna nigomele avi?>>

¹⁰ Mwa ora yenne Yehova ohomuwakulaga mulombwana Jozuwe eraga: <<Kavenya we. Mwasiwa gwa nni ukalele we vevo wagaoramihedile kove yawo vati?

¹¹ AIzarayeli kohotega. Aliwa kohotwa yopangana yenno daarumile miyo. Aliwa kohotukula jejo jafuna veleliwa wa miyo muwari motolotchiwa. Aliwa na ibaribari kohoba eto kohonama, aliwa gumaniha jejo jakondihile miyo na mitolro diwa.

¹² Na mwasa wenno Ana Izarayeli kinawanda agondjiha amwidaniwa. Anerege atawa mwasiwa inofwanela ira aliwa katolotchiwe. Mwahabwanyule jengo jibile nyo, miyo kadiza dikala na nyo akoka.>>

¹³ Yehova ohowongagave na mulombwana Jozuwe eraga: <<Kavenya we. Udowe waatchenihe mulogo watene wa aIzarayeli. Waawandele ira: <Inafwanela muvitchenihe ira metchelo mukale apamene. Mwasiwa Yehova Mulugu wa aIzarayeli gunawonga na nyo aIzarayeli ira muwari mwa nyo munofwanyeya jengo jejo jaurumileni miyo ira mutolotche. Nyo tukula dowa koya. Mwahavitule jejo jikoyile nyo mutolotcha, kamuza mwaagondjiha amwidaninyu.

¹⁴ Nona metchelo na mabebehe nyo munoza ira mugumane vamentoni vaga eto za unazege nyo, munerege za nlogo nlogo. Nlogo neno Yehova unatonye liye muwari mwa jogu ya ngari, nnerege za ziza ziza. Eto ziza neno Yehova unatonye liye, aliwa anazege nivande nivande. Eto nivande neno Yehova nnatonye liye, anazege mulombwana mmohi mmohi.

¹⁵ Mulombwana wenno unatonyiwe ira ubile jengo jafuna tolotchiwa gwenna, liye unotumeyiwa na munlo, romela liye vamohi na vande vaye na jatene jili jaye. Mwasiwa liye uhutwa yopangana ya Yehova. Liye uhusakanya yotakaletchetcha muwari mwa aIzarayeli.> >>

Mulombwana Akani ohotumeyiwa na mwasa otukula jengo jakondihile Yehova

¹⁶ Mulombwana Jozuwe ohovenya na mabebehene, liye aitana aIzarayeli ira kazege nlogo nlogo. Kagasakanyile jogu ya ngari, atonyiwe ali nlogo na Juda.

¹⁷ Mowelela ohawandela atu a nlogo na Juda ira kazege ziza ziza. Evale atonyiwe ali ziza na Zera. Evale atu a ziza na Zera kohoromaga za mbwiyamutu mmohi mmohi, evale atonyiwe ali vande va Zabidi.

¹⁸ Vogomiheda Jozuwe ohaitana atu a vande va Zabidi, aliwa zaga mutu mmohi mmohi. Evale mulombwana Akani gwatonyiwilege. Akani ali mwana Karimi, muzula wa Zabidi, wa ziza na Zera, munlogoni mwa Juda.

¹⁹ Jagaireyile eno, mulombwana Jozuwe ohowonga na Akani eraga: <<We mwanaga Akani, umutitimihe Yehova Mulugu wa aIzarayeli. Ulrape vamentoni vaye jiirile we. Eto udiwandelemo jatene jiirile we, kukoye yengo.>>

²⁰ Evale mulombwana Akani ohomurumela Jozuwe eraga: <<Na ibaribari miyo dihimutegela Yehova Mulugu wa aIzarayeli, nnafuna diwongemo jiirile miyo.

²¹ Mwa jengo jatene jaawakile hiyo amwidani, miyo dohoonavo kapa yoriya ya ilambo ya Babiloniya eto dohoonavo kilu mbinli na metadi da parata na oru okwaranya meyu kilu. Miyo muwari moing'ana ejile, dohosilrilra, miyo tukula. Eni dire timbela vati mmusasani mwaga eto parata ule, dihiyile vati viwa.>>

²² Nomala enne, mulombwana Jozuwe oharuma alombwana amohi ira kadowe vamusasani va mulombwana Akani. Alombwanale kohotamangelaga vamusasani va Akani, aliwa fwanya jatene mmba mule, parata agali vati viwa.

²³ Evale alombwanale kohokumihamo ejile mmusasani mule, aliwa zana vamentoni va Jozuwe na Ana Izarayeli atene eto kohela vamentoni va Yehova.

²⁴ Evale mulombwana Jozuwe vamohi na aIzarayeli atene kohomutukula mulombwana Akani mwana Zera na parata, na kapa ile, na oru vamohi na ahimaye a anapongwe na a anavihiyana, ng'ombe daye, aburu aye, mabilaye, musasaye na jatene janna liye. Aliwa adowana ndabo nnaitaniwa Akori.

²⁵ Mwa enne mulombwana Jozuwe ohowonga eraga: <<Kodi mwasiwa gwa nni we nizuzumihaga? Voira weyo uhunizuzumiha, na wenne Yehova unouzuzumiha peno.>> Jozuwe agamanle wonga enne, aIzarayeli atene kohotukulaga mabwe, aliwa mpana mulombwana Akani eto aliwa apa na mabwe atu atene a vande vaye. Noira enne, kohatukulaga atu atene kapiwile ale, aliwa dowa atumeya vamohi na jatene janna atu.

²⁶ Kagamanle eno, kohotukula mabwe, aliwa agudela vazulu va mulombwana Akani. Mabwe anne na vanove anafwanyeya evo. Na mwasa wa jatene jene jaireyile, ndabo nenne nnaitaniwa ndabo na Akori [ku wonga zuzuma]. Akani agamanle piwa, uwali ulukulu wanna Yehova wohomala.