Jozuwe 5 - Mazu Otchena a Mulungu

¹ Evale amwene atene a aAmore anno kakaletcha pandi ya mavirelo wa nzuwa wa muhindje Jordawu, vamohi na amwene atene a akuda Kana anno kakala wandamelana tcherela ya bara Mediteraniyo, kohovwa ira: <<Yehova ohoummiha muhindje Jordawu ira Ana Izarayeli kawande lambuwa fiyeda atene koholambuwa.>> Mwa enne kohoroma ova valukulu eto limba wewa murima wohomala na mwasa wa Ana Izarayeli.

Jozuwe ohainela Ana Izarayeli

² Ora yenno Yehova ohowonga na mulombwana Jozuwe, liye kwi: <<Usakanye mimbene da mabwe ira waainelena alombwana atene a Ana Izarayeli kali kahanaineliwe ira atene kakale oineliwa nnga babiwa.>>

³ Mwa enne mulombwana Jozuwe ohosakanya mimbene da mabwe eto ohainelana alombwana a Ana Izarayeli mwango Haraloti, ku wonga Mwango Oineliwawo.

⁴ Ira mulombwana Jozuwe aainele alombwana a aIzarayeli, mwasiwa goira alombwana atene a idadi yodowa kondoni anno kakumile ilambo ya Ijipitu kohomala kwa mundila, muisalesaleni mwali atu.

⁵ Agali alombwana atene kakumile ilambo ya Ijipitu kohomala ineliwa, ahimiwa anno kaabala atu mundila kagakumile Ijipitu, kali kahanaineliwe.

⁶ Tchoira Ana Izarayeli kohomala yaka 40 kawendaga muisalesaleni fiyeda alombwana atene anno kanna idadi yodowa kondoni kakumaga Ijipitu, aliwa mala kwamo, na mwasa ohovwelela mazu awongile Yehova. Banno Yehova alumbenle liye ira aliwa kiza kavolowa ilambo yenno yalumbenle liye na makolo ewa ira aavahe, yenno munafwanyeya mukaka na nuwi pwi pwi.

⁷ Mwa enne Mulugu ohavenyiha ahimiwa ira kavolowe ilambo yenno vamalroni va ababiwa. Eto banne Jozuwe aainenle liye na mwasa oira aliwa kazaga mundila, tchaineliwe.

⁸ Alombwana atene kagaineliwe, aliwa kohokalagave vamisasani vafwanyeya atu vale fiyeda ale kaineliwe jilonda jiwa aliwa vola.

⁹ Noira enne, Yehova ohowonga na mulombwana Jozuwe eraga: <<Peno dihimala kumihamo manyazo enyu mwanna nyo ilambo ya Ijipitu.>> Nona roma evale fiyeda siku na peno nimburo nne nnaitaniwa na nzina na Jiligali [ku wonga kumihamo].

¹⁰ Mwa enne Ana Izarayeli kagalive vamisasani viwa Jiligali wewule, nagafiyile siku nanekumi na nnayi mwedi oroma wa yaka, tempu ya tchiguwoni kohosakanyaga Pwando ya Mavirelo vali atu ilambo yotandeleya yenno yafiyile ante sidadi ya Jeriko.

¹¹ Kagadjile Pwando ya Mavirelo, mmetcheloni muwa, aIzarayeli kohodjaga jovaha jimohi ja mmindani na pawu dohosakanyiwana leverina vamohi na jodja jowaringiwa.

¹² Mwa enne kagaromile dja ja mwilamboni mule, mmetcheloni muwa mana kohomiyalaga. Kuma yaka yenna dowagave sogolro, Ana Izarayeli kadja jodja ja ilambo ya Kana. Mana tchaoneyile akoka.

Mundimuwa wa anyakondo a Yehova ohoza mulimbiha mulombwana Jozuwe

¹³ Mulombwana Jozuwe ohowandamelaga sidadi ya Jeriko. Againg'anne nnga ha vale, ohomuona mulombwana mmohi agaimenle sogolro waye agahidedile supada mmandani mwaye. Evale Jozuwe ohomukwivelaga, liye nfuka ira: <<Kodi weyo uli ani? Uli wa pandi yehu owu uli wa pandi ya amwidanihu?>>

¹⁴ Evale mulombwanole ohomurumelaga Jozuwe eraga: <<Miyo kadili wa pandi yawo nne kadili wa pandi ya amwidanawo. So mbwenye ira dize wa weyo, tchoira dili mundimuwa wa anyakondo a Yehova.>> Noira enne, Jozuwe ohokokoraga, aoramihedaga kove yaye ante fiyiha vati, liye mutamalela. Noira enne, ohonfuka eraga: <<Mbwiyeni kodi mwazela diwandela nni miyo namalaba wenyu?>>

¹⁵ Mundimuwa wa anyakondo a Yehova ule ohomurumelaga Jozuwe, liye ira: <<Kawungula xineli dawo do. Mwasiwa nimburo nili we ni ti nimburo notchena.>> Mwa enne Jozuwe ohowungulaga xineli daye.