Jozuwe 4 - Mazu Otchena a Mulungu

Jozuwe ohomanga ibuwa yoawumbutcheda Ana Izarayeli zela lambuwa wewa wa Jordawu

¹ Mwa enne aIzarayeli atene kagamanle lambuwa muhindje Jordawu, mahindje kahanagumanele akoka, Yehova ohowonga na mulombwana Jozuwe eraga:

² <<Waasakulre alombwana kumi na ambinli muwari mwa aIzarayeli. Kada nlogo akumegemo mulombwana mmohi.

³ Wagamanle asakulra, waawandele ira: <Mutukule mabwe kumi na menli vari va muhindje Jordawu, nimburo noumma niimenle anamakuta ale. Mwatukula mabwe ale, mwaadowegena ante nimburo nnafuna nyo kunga misasa denyu mahiyu a peno.> >>

⁴ Evale Jozuwe ohaitanaga alombwana kumi na ambinli anne aasakunlre liye muwari mwa Ana Izarayeli atene, kada nlogo mutu mmohi.

⁵ Liye ohawandelaga eraga: <<Mudowe sogolro wa Kaxa ya Yopangana ya Yehova Mulugu wenyu, muwelele vari va muhindje Jordawu vale, kada mutu atukule nibwe nimohi, ahele vanifudini vaye. Kada nlogo na Ana Izarayeli nibwe nimohi.

⁶ Mabwe anno munafuna nyo tukula anokala ionihedo zela ejo Yehova juireleni liye. Sogolro, ahiminyu kaza kaufukani ira: <Kodi mabwala anatapulela nni?>,

⁷ nyo munoza mwaawandelege ira: <Siku neno Kaxa ya Yopangana ya Yehova yalambuwaga atu muhindje Jordawu, mahindje a muhindje Jordawu kohogwadeyaga, tchawendaga.> Mwa eno, mabwe ala anakala yengo yoawumbutcheda Ana Izarayeli atene kala no kala zela jengo jiireyile.>>

⁸ Evale Ana Izarayeli kohoirana nnga mwemo Jozuwe mwawongele liye. Alombwanale kohodowa tukula mabwe kumi na menli vari va muhindje Jordawu vale, nibwe nimohi va kada nlogo na Ana Izarayeli nnga mwemo Yehova mwamurumele liye mulombwana Jozuwe. Kohodowagana nimburo neno nafuna atu kunga misasa diwa siku nenne, aliwa ahiya evale.

⁹ Mulombwana Jozuwe eto ohoimetcha mabwe kumi na menli amohiwa vari va muhindje Jordawu, nimburo neno naimenlege anamakuta anne katukunle Kaxa ya Yopangana ile. Mabwale anafwanyeya vari va muhindje evale, fiyeda siku na peno.

¹⁰ Anamakuta katukunle Kaxa ya Yopangana ale kohokalagave oimelene vari va muhindje evale fiyeda kwakwanela jatene jawongile Yehova muwari mwa Mozeji, amurumaga Jozuwe ira awonge na aIzarayeli atene. Mwa enne mulogo watene wa aIzarayeli kohobaranyaga, aliwa lambuwa muhindje Jordawu.

¹¹ Evale atu atene kagalambuwile, anamakuta ale na aliwene koholambuwagana Kaxa ya Yehova, aliwa dowa kala vasogolro va Ana Izarayeli.

¹² Alombwana a nlogo na Rubeni, Gadi, na alombwana a metadi a nlogo na Manasesi koholambuwa kagatukunle jowanana jiwa, aliwa dowa kala vasogolro va Ana Izarayeli atene nnga mwemo mwaawandenle Mozeji.

¹³ Alombwana a nlogo na Rubeni, Gadi, na alombwana a metadi a nlogo na Manasesi, indjiva uwa kali wandamelana 40.000, atene okozeya ira kawane kondo. Kohogundeyaga, mosogolrelriwa na Yehova, kadowaga pandi ya ilambo yotandeleya ya Jeriko.

¹⁴ Siku nenne, Yehova ohomuulukulihaga Jozuwe vamentoni va aIzarayeli atene eto kalawo waye watene komuriheda nnga mwemo mwamurihedetcha atu Mozeji.

¹⁵ Evale Yehova ohomuwandela Jozuwe ira:

¹⁶ <<Waawandele anamakuta anno katukunle Kaxa ya Umboni ira kakume vari va muhindje.>>

¹⁷ Noira enne, mulombwana Jozuwe oharuma anamakuta ale ira: <<Kakumani vari va Jordawu vo.>>

¹⁸ Fwanyeya ira anamakuta katukunle Kaxa ya Yopangana ya Yehova ale, kagakumile vari va Jordawu vale, kaganyinganle teya youmma, muhindje Jordawu ohoroma tamanga akoka eto mmambalo mwa muhindje mule mohozalaga kwaranya mwemo mwagomeletcha mahindje nnga mwali atu aIzarayeli kahanalambuwe.

¹⁹ Siku nalambuwa mulogo wa aIzarayeli muhindje Jordawu nali siku nanekumi na mwedi oroma. Kagalambuwile, kohodowa kunga misasa diwa Jiligali pandi ya makumelo wa nzuwa wa ilambo ya Jeriko.

²⁰ Evale mulombwana Jozuwe ohotukulaga mabwe kumi na menli anno katukunle atu vari va muhindje Jordawu vale, liye aimeliha Jiligali wewo wafwanyeya atu.

²¹ Nomala eno, mulombwana Jozuwe ohowongaga na Ana Izarayeli atene ira: <<Vasogolro ahiminyu kaufukani nyo ababi ira: <Kodi mabwala anatapulela nni?>,

²² inafwanela mwaaiziwihe ira aIzarayeli koholambuwa muhindje Jordawu voumma vene.

²³ Tchoira Yehova Mulugu wenyu ohoummiha muhindje Jordawu vamentoni venyu fiyeda hiyo atene vira voumma, molingana na makalelo Yehova Mulugu wenyu aummihile liye Bara Yofila vamentoni vehu hiyo niviraga voumma.

²⁴ Yehova ohoirana jatene eji ira malogo matene a mwilamboni ya vati kaiziwe ira ndanda naye ta kopolo eto ali ira nyo mmuovege Yehova Mulugu wenyu malambo matene.>>