Jozuwe 24 - Mazu Otchena a Mulungu

Jozuwe ohalanya aIzarayeli aawumbutchedaga makalelo matene aairele Yehova

¹ Evale mulombwana Jozuwe ohaitanihaga malogo matene a aIzarayeli, aliwa dowa gumana sidadi ya Sikemu. Liye eto ohaitaniha andimuwa, asogolrelri, anamatonga vamohi na andimuwa amohiwa a aIzarayeli. Evale atu atene aaitanihile liye kohozaga vamentoni va Mulugu.

² Mwa enne Jozuwe ohoromaga wonga na atu atene eraga: <<Yehova Mulugu wa Izarayeli unawonga ira: <Malambo a mundulrimu makolo enyu vamohi na mbwinyu Tera wenno ali Abarahamu na Nahori babiwa, kakalaga kombela ya ule ya muhindje Eufarati, aliwa kali atu oakokorela amilugu amohiwa.

³ Mwa tempu yenno miyo dohomukumihamo babinyu Abarahamu ilambo yali liye, kombela ya muhindje Eufarati, miyo dohomuwendiha ilambo yatene ya Kana. Eto dohonvaha ahima adjindji. Dohonvaha Abarahamu mwana aitaniwa Izaki.

⁴ Eto dohonvaha Izaki ahimaye anno Jako na Ezawu. Dohonvaha mulombwana Ezawu ilambo yatenene yakala mwango wa Seyire ira ikale yaye. Mbwenye Jako vamohi na ahimaye kohodowa kalaga ilambo ya Ijipitu.

⁵ Noira eno, dohomuruma Mozeji vamohi na Arawu ira kadowe Ijipitu. Kagadowile ilambo ya Ijipitu, miyo dohobwanyula ilambo ya Ijipitu na jabure jowopiha ante miyo fiyeda akumihamo makolo enyu mwilamboni mule.

⁶ Mwa eno, miyo dagaakumihile makolo enyu vamohi na nyo ilambo ya Ijipitu, nyo mohofiya Bara Yofila. Mbwenye aIjipitu kohomaruwa na aaterelado ewa vamohi na aliba wendiha kavalo, aliwa aharaga ante Bara Yofila.

⁷ Makolo enyu kagadivepile miyo dagali Yehova ira daakamihede, dohozihawo isi vari va nyo na aIjipitu. Evale dohakunela aIjipitu na mahindje, aliwa mala kwa. Eto nyo muhumala ona jatene jairele miyo ilambo ya Ijipitu. Nomala eno, nyo mohomala yaka didjindji muisalesaleni.

⁸ Mukumaga muisalesaleni, miyo dohoudowanani ilambo ya aAmore anno kakala makumelo wa nzuwa wa muhindje Jordawu. Mbwenye mwagafiyile ilambo ya aAmore, aliwa kohoza wana na nyo eto miyo dohatukula, miyo uvahedani mmandani mwenyu, nyo agondjiha roma kala mwilamboni mwewa. Miyo dohatolotcha aliwa sogolro wenyu ira mukalemo.

⁹ Evale mwene atonga ilambo ya Mowabe, wenno aitaniwa Balaki, mwana Zipori, ofuna wana na aIzarayeli. Ohomuruma mulombwana Balawu, mwana Beyori ira aze, autembelrelreni nyo.

¹⁰ Balawu agazile, afunaga utembelrelrani, miyo jowonga jaye kadavwile. Evale miyo dosakanya ira liye aureliheni. Mwa enne miyo dohouvunelani mmandani mwaye.

¹¹ Vagavirile yaka didjindji, moholambuwa muhindje Jordawu ante nyo fiya sidadi ya Jeriko. Mwagali Jeriko, annya a ilambo ile kohoza ira kawane na nyo. Muwari mofuna wana na nyo eto kohozaga aAmore, aFerizi, akuda Kana, aEti, aJirigazi, aEvi na aJebuzi ira kawanege na nyo. Mbwenye miyo dohouvahedani atu atene anne mmandani mwenyu.

¹² Eto miyo dohorumiha manyefu vasogolro venyu, aliwa atamangiha na makalelo nnga daatamangihile miyo amwene ambinli a aAmore ale. Muwari moatamangiha mule, miyo kadaatamangihile na masupada enyu nne na maurwa enyu.

¹³ Miyo duhuvahani ilambo yenno yahalabenle nyo eto duhuvahani sidadi dedo dahamangile nyo, nyo kalaga emo, nyo djaga jovaha ja uva na jovaha ja mitengo da azeti, dedo dahazanle nyo.> >>

Jozuwe na aIzarayeli kohosakulra hara ndila ya Yehova

¹⁴ Jozuwe ohowonga ira: <<Yapama inafwanela mmuove Yehova eto mmuharege na mmirimani mwenyu mwatene na makalelo ororomeleya. Ule unnave amilugu anno kaaroromeletcha ababinyu a malambo a mundulri, kombela ya muhindje Eufarati eto kagali muIjipitu, aatukule amilugu anne, aatatile. Mmuharege Yehova bahi.

¹⁵ Mbwenye ule uni: <Miyo muhara Yehova, kondi>, asakulre peno amilugu anafuna liye ahara. Mwafuna nnga mwaaharege amilugu anno kaaroromeletcha ababinyu kahanalambuwe para kombela ya muhindje Eufarati, owu hehi, mwafuna nnga mwaaharege amilugu a akuda Amore anno anafwanyeya kagali anamurala a uno, muiregena mofuna mwenyu. Mbwenye zela miyo na vande vaga, hiyo nnamuharege Yehova.>>

¹⁶ Evale aIzarayeli kohomurumelaga Jozuwe keraga: <<Kavinawandeya ira hiyo nnomuhiya Yehova ira nidowe naaharege amilugu amohiwa.

¹⁷ Mwasiwa Yehova Mulugu wehu gunikumihilemo hiyo na ababihu mwilamboni mwa Ijipitu, muuzarini mwafwanyeya hiyo. Liye guirilena jionihedo johokala ja masika vamentoni vehu eto gunikoyile ndila datene dene navira hiyo muwari mwa malogo ohiyana-hiyana mwilamboni mwewa mwemo mwavira hiyo.

¹⁸ Tempu yawenda hiyo, Yehova ohatamangiha atu atene kakala sogolro wehu ira nikalemo. Eto Yehova ohatamangiha aAmore annya kakala ilambo yenna. Mwa eno, na hiyene nnamuharege Yehova, mwasiwa liye unafwanyeya agali Mulugu wehu.>>

¹⁹ Evale mulombwana Jozuwe ohawakulaga eraga: <<Nyo kamunawanda muhara Yehova. Mwasiwa liye gu Mulugu otchena, gu Mulugu okana sandje. Liye kanaulevelelani joviringaniha jenyu na jotega jenyu.

²⁰ Nyo mwamuhiya Yehova, muroma ahara amilugu amohiwa, Yehova unorungunuwa, unouirelani ubure eto unoutolotchani, agali voroma vene auirelani upama.>>

²¹ Atu atene kagavwile mazu a mulombwana Jozuwe, kohomurumelaga keraga: <<Nari, hiyo so nnafuna nimuharege Yehova.>>

²² Evale Jozuwe ohowakulaga eraga: <<Nyo mwa annya muli amboni ira muhumusakulra Yehova ira mmuharege.>> Atu atene kohorumelaga keraga: <<He, nili amboni.>>

²³ Jozuwe ohowongagave akoka eraga: <<Akala ti eno, mwaatukule amilugu a atu a unde munna nyo, mwaatatile, mwamala muhele murima wenyu wa Yehova Mulugu wa Izarayeli.>>

²⁴ Atu atene kohomurumelaga Jozuwe keraga: <<Hiyo so nnamuharege Yehova Mulugu wehu eto nnavwelelege inawongege liye.>>

²⁵ Siku nenne, Jozuwe ohosakanyaga yopangana na aIzarayeli eto ohavaha malamulo na mangano kagali Sikemu wewule.

²⁶ Evale Jozuwe oholrembaga mazu matene anne muLivuruni mwa Malamulo a Mulugu. Noira eno, ohotukulaga nibwe nlukulu, liye imetcha vati va mutengo wa karvaliyo wenno awandamenle na nimburo notchena na Yehova.

²⁷ Jozuwe agamanle imetcha nibwe vati va mutengo vale, ohowongaga na atu atene eraga: <<Kaing'anani nibwe ni. Nibwe ni nnakala umboni zela nyo. Mwasiwa nibwe ni nihivwa mazu matene Yehova uwongile liye na hiyo. Nona nibwe nimohive neni nnakala umboni zela wa nyo tawiha ira munaze mmuhiye Mulugu wenyu.>>

²⁸ Evale Jozuwe ohagunya, kada mutu dowaga ilambo yavahiwe liye.

Kwa wa Jozuwe

²⁹ Jagamanle ireya jatene eji, Jozuwe mwana Numi, namalaba wa Yehova ohokwa aganna yaka 110.

³⁰ Agakwile, kohomukoya ilambo yenno yavahiwe liye ya Timinati-Sera, ilambo yenno yafwanyeya pandi ya mwango didjindji ya Efarayimi, pandi ya norti ya mwango Gaji.

³¹ AIzarayeli kohomuhara Yehova malambo matene aliwo mulombwana Jozuwe vamohi na malambo matene a andimuwa atene anno kaliwove Jozuwe agakwile, anno kaiziwile mabasa matene alabile Yehova muwari mwa aIzarayeli.

Koyiwa wa makuva a Joze

³² Zela makuva a Joze anno Ana Izarayeli katukunle atu kakumaga ilambo ya Ijipitu, kohodowa akoya ilambo ya Sikemu tereno yagunle mulombwana Jako wanle na kobiri dokwakwana 100 da parata na Sikemu abalaye anno kali ahima a Amori. Ilambo yenno yavahiwe ira ikale ya ahima a mulombwana Joze.

Kwa wa namakuta Eliyazare

³³ Mwa tempu yenne Eliyazari mwana Arawu na liyene ohokwa. Agakwile, kohomukoya pandi ya mwango didjindji muwari mwa Efarayimi, sidadi ya Jibeya, yenno mwanaye Fineyasi yavahiwe liye. Kukala mazu a livuru na Jozuwe.