Jozuwe 23 - Mazu Otchena a Mulungu

Jokokomeza ja Jozuwe agamanle ulula

¹ Yehova ohavaha aIzarayeli vuma zela amwidaniwa atene anno kaawandamannena atu. Dohovira yaka didjindji eto mulombwana Jozuwe ohomala ulula, liye kana yaka didjindji.

² Evale Jozuwe ohaitaniha mulogo watene wa aIzarayeli vamohi na andimuwa, asogolrelri, anamatonga vamohi na andimuwa amohiwa. Kagazile, Jozuwe ohowongaga eraga: <<Miyo dihimala ulula, dihikana yaka didjindji.

³ Nyo eto muhumala ona jatene Yehova Mulugu wenyu jaairele liye malogo matene kafwanyeya emuno na mwasa wenyu. Tchoira Yehova Mulugu wenyu gwawanetcha vamalroni venyu.

⁴ Muing'ane eto, miyo dihimala ugawelani nyo malogo matene ilambo yatene romela muhindje Jordawu fiyeda mavirelo wa nzuwa wewo unafwanyeya bara Mediteraniyo. Muwari mwa ilambo yatene yenno dugawenleni miyo, vilambo dimohi miyo dihimala atamangihamo annya kafwanyeyamo. Vilambo dimohi anamurala kohalamove.

⁵ Yehova Mulugu wenyu unoza asakanye makalelo ira atu atene kahanle mwilamboni mwenyu kautawegeni nyo eto unoza asakanye makalelo ira aatamangihe ante kafiyede kala olapela wene na nyo. Nyo munoza mutukule vilambo diwa nnga mwemo mwapanganile Yehova Mulugu wenyu.

⁶ Na mwasa wenno inafwanela mulimbihede harihamo jatene jene jilrembiwile mulivuruni mwa malamulo a Mozeji ira mwahaperuwe para muwononi odjana nne para muwononi oromana

⁷ eto ira mwahagumanele na atu anno kahanle muwari mwa nyo, nne kamuromolege mazina a amilugu ewa, nne kamulumbelege na maziniwa, nne kamwaaharege amilugu ewa, nne kamwaakokorelege.

⁸ <<Mmuhidedeve Yehova Mulugu wenyu nnga munaira nyo fiyeda peno.

⁹ Tchoira Yehova uhatamangiha malogo mandimuwa a kopolo vari va nyo ante aliwa fiyeda kala olapela wene na nyo eto fiyeda peno eni kalivo uwandile ugondjihani.

¹⁰ Mutu mmohi wa nyo unoatamangiha amwidani 1.000 mwasiwa Yehova Mulugu wenyu unawana vamalroni vehu nnga mwemo mwapanganne liye.

¹¹ Na mwasa wenno inafwanela muzuzumelege ira mukale atu omuziveliwa Yehova Mulugu wenyu.

¹² Tchoira nyo mwamuhiya Yehova eto mwabandana na malogo anno kahanle mwilamboni muno, mwatelanaga, mwawendaga na aliwa eto aliwa kawendaga na nyo,

¹³ inafwanela muiziwege ira Yehova unoza ahiye atamangiha atu anno anakala muwari mwa nyo. Eto mofutukula, aliwa banafuna kala nnga ratuwero unafuna umangani, nari nnga kwege ira nyo mumorelemo, nari nnga axamboko obubuda mitana dinyu, nari nnga minga doulatani mmentoni mwinyu. Makatamiho anna anerege dowave sogolro ante nyo mufiyede dimela ilambo yapama yenna Yehova Mulugu wenyu yuvahileni liye ira mukalegemo.>>

¹⁴ Jozuwe ohowongagave eraga: <<Miyo tchineneva eni nnodowa wewo unadowa atu atene a mwilamboni ya vati. Eto nyo muhuiziwa na mmirimani mwenyu mwatene no kalawo wenyu watene ira Yehova Mulugu wenyu uhukwakwaneliheda mapangano matene apanganne liye zela nyo. Nne nimohi kanihanle.

¹⁵ Eto sawasawa nnga Yehova Mulugu wenyu umala uvahani jatene japama jalumbenle liye, mwaviringaniha yopangana yapanganne Mulugu na nyo, liye unouirelani jengo jabure johokala ja masika fiyeda mutolotchiwe muwari mwa ilambo yapama yenna yuvahileni Yehova Mulugu wenyu.

¹⁶ Mwera mwaroromelege eto mwakokorela amilugu amohi, Yehova unoza atakaleliwe na makalelo ohokala a masika, aze autolotcheni. Mohodibeliwa munodimela muwari mwa ilambo yapama yenna yuvahileni Yehova Mulugu wenyu.>>