Jozuwe 22 - Mazu Otchena a Mulungu

Annya a ilambo ya makumelo wa nzuwa wa Jordawu kohowelela mwilamboni mwiwa

¹ Evale Jozuwe ohagumaniha atu a munlogoni mwa Rubeni, Gadi, na metadi ya nlogo na Manasesi.

² Agaagumanihile ohowongaga na aliwa eraga: <<Nyo muhusakanya jatene jene nnga mwemo mwawongele Mozeji muzari wa Yehova eto munoharihamo jatene jene jinawonga miyo.

³ Romelave wanle fiyeda siku na peno nyo kamunaahiye abalinyu aIzarayeli. Nyo muhuharihamo mwapama jejo jurumileni Yehova Mulugu wenyu.

⁴ Mwa eno, Yehova Mulugu wenyu uhavaha abalinyu aIzarayeli vuma nnga mwemo mwalumbenle liye na aliwa. Nona inafwanela muwelele mmisasani mwenyu, ilambo yenyu, yenno inafwanyeya kombela ya muhindje Jordawu, yenno Mozeji muzari wa Yehova auvahileni liye.

⁵ Mbwenye nyo inafwanela muharihegemo mwapama mangano na malamulo anno Mozeji muzari wa Yehova auvahileni liye. Liye ohowonga ira: <Mmuziveliwege Yehova Mulugu wenyu eto muwendege na ndila datene nnafuna liye eto muharihegemo mangano aye. Nyo inafwanela mukale omuhidedene liye eto mmulabege na mmirimani mwenyu mwatene no kalawo wenyu watene.> >>

⁶ Nomala eno, Jozuwe ohareliha, nomala areliha, ohalanyaga. Mwa enne atwale kohowelela mmisasani mwewa.

⁷ Fwanyeya ira wanle Mozeji aavahile atu a metadi ya nlogo na Manasesi ilambo yafwanyeya muwari mwa Bazani. Eto metadi ya nlogo na Manasesi yohala ile, Jozuwe ohavaha kombela ya abaliwa mavirelo wa nzuwa wa muhindje Jordawu. Jozuwe aagunyaga ira kadowe waniwa, ohareliha eraga:

⁸ <<Nyo munawelela mmisasani mwinyu no rayela wohokala wa masika, na jifuwo johokala ja masika, na parata, oru, mukuwa, momba na jowara johokala ja masika. Mutukule jatene mwaawakile nyo amwidaninyu, mudowe mwagane na abalinyu.>>

⁹ Evale atu a nlogo na Rubeni, Gadi, na metadi ya nlogo na Manasesi kohahiya Ana Izarayeli amohiwa Silo ilambo ya Kana, aliwa welela ilambo yewa ya Jileyadi yavahiwe atu kombela ya muhindje Jordawu nnga mwemo Yehova mwawongele liye muwari mwa Mozeji.

Ibuwa ya umboni yamangile ale kakala makumelo wa nzuwa wa Jordawu

¹⁰ Atu a nlogo na Rubeni, Gadi na metadi ya nlogo na Manasesi, kagafiyile tcherela ya muhindje Jordawu, kahanalambuwe, kagalive muwari mwa ilambo ya Kana, kohosakanya ibuwa ilukulu yohokala ya masika.

¹¹ Evale Ana Izarayeli amohiwa kohovwa ira: <<Muvuruwane pama. Eni atu a nlogo na Rubeni, Gadi na metadi ya nlogo na Manasesi kohosakanya ibuwa yokutavo mukuto ikukuru ya hiyo Ana Izarayeli muwari mwa Kana muno tcherela ya muhindje Jordawu.>>

¹² Atu a nlogo na Ana Izarayeli kagavwile eno, atene kohogumanela ilambo ya Silo ira kadowe kawane kondo na anne kasakanyile ibuwele.

¹³ Mbwenye Ana Izarayeli kahanadowe wana, karomile muruma Fineyasi, mwana namakuta Eliyazari ira adowe ilambo ya Jileyadi awonge na atu a nlogo na Rubeni, Gadi na metadi ya nlogo na Manasesi.

¹⁴ Koharuma eto andimuwa kumi ira kadowe vamohi na Fineyasi ule. Kada mundimuwa ali musogolrelri wa nlogo nimohi muwari mwa malogo kumi a aIzarayeli kagumanne.

¹⁵ Kagafiyile ilambo ya Jileyadi, kagaafwannye atu a nlogo na Rubeni, Gadi na metadi ya nlogo na Manasesi, kohowongaga na aliwa keraga:

¹⁶ <<Mulogo watene wa Yehova kohogumanela, aliwa niruma ira nize niwonge na nyo ira: <Kodi muirele nni jotakala ha jeji vamentoni va Mulugu wa Izarayeli? Kodi murungunuwele nni mmuhiyaga Yehova musakanyaga ibuwa ira mulabe jenyu muwari monkonda Yehova?

¹⁷ Yotega yasakanyile hiyo ilambo ya Peyori na vanove ilive na hiyo, kannawande vitcheniha. Na mwasa wa yotega yenno yohoza itukwa nifwanya hiyo atu a Yehova. Kodi yotega yenne tchakwakwanne para nyo, yali yofwanela ira muiregenave yotega imohiwa?

¹⁸ Kodi munafuna muhiye muhara Yehova? Inafwanela muiziwe ira akala peno nyo muhukonda tongiwa na Yehova, metchelo liye unotakaleliwa na mulogo watene wa aIzarayeli.

¹⁹ Akala munaona nnga ilambo muli nyo tchotakala, inafwanela mudowe ilambo ya Yehova, wewo unafwanyeya Musasa wa Yehova, mukayena ilambo yenyu wewo, mukalege vamohi na hiyo. So mbwenye kamukonde tongiwa na Yehova nne kamunikalihe hiyo nnga atu ohovwelela muwari momanga ibuwa imohiwene, hiyaga ibuwa ya Yehova Mulugu wehu.

²⁰ Inafwanela muumbuwele zela Akani, mwana Zera wenno aviringanihile muwari motukula jejo jafuna veleliwa wa Yehova muwari motolotchiwa. Fwanyeya ira liye agaviringanihile, aIzarayeli atene kohoonihiwa uwali wa Yehova na mwasa waye bahi. Tchoira muwari moviringaniha wa Akani, atu adjindji kohokwa vamohi na liye.> >>

²¹ Mwa enne, atu a nlogo na Rubeni, Gadi na metadi ya nlogo na Manasesi kagavwile jatene ejo, kohawakulaga andimuwa a malogo a aIzarayeli keraga:

²² <<Yehova gu Mulugu wa kopolo datene! Yehova gu Mulugu wa kopolo datene! Liye uhuiziwa mwasiwa umangele hiyo ibuwele. Na nyenne inafwanela muiziwe. Akala hiyo nimangele ibuwele muwari momutegela, nari muwari mohonvwelela, nnafuna ira munipe peno.

²³ Akala nimangele ibuwele muwari monkonda Yehova eto akala nimangele ira ikale ibuwa yovelelavo mikuto dotumeya, owu yovelela ya jodja owu para jovelela ja murendele, Yehova mwinnya anitonge.

²⁴ Mofutukula eto hiyo nisakanyele ibuwele mwasiwa hiyo nohokana ova ira siku nimohi ahiminyu anoza kawonge na ahimihu ira: <Kodi nyo munna pandi nni na Yehova Mulugu wa Izarayeli?

²⁵ Tchoira Yehova ohela muhindje Jordawu ira akale madilre zela wa nyo malogo menli a Rubeni na Gadi vamohi na hiyo. Nyo kamunna pandi na Yehova!> Yaireya eno ahiminyu anerege ahiyiha ahimihu mutamalela Yehova.

²⁶ Nona hiyo nohokana youmbuwela yoira: <Ndoweni nisakanyeni ibuwa. Mbwenye ibuwa inafuna hiyo sakanya kahi para helavo mikuto dotumeya nne para helavo mikuto domutamalela Yehova.

²⁷ So mbwenye, inalaba ira ikale umboni zela hiyo na nyo na ahimihu na ahiminyu anafunege baliwa nagakwile. Yengo yenna yafuna ikale umboni ira hiyo nili atu omutamalela Yehova mMusasani mwaye nivelelaga mikuto dihu dotumeya na mikuto dehu dimohi diwa vamohi na jovelela jehu ja murendele.> Nisakanyele tawiha ira siku nimohi ahiminyu anaze kawonge na ahimihu ira: <Nyo kamunna pandi na Yehova.>

²⁸ Hiyo naumbuwela ira siku nimohi jaza jiireya jengo nnga ha jeji, hiyo owu hehi ahimihu nnoza niwonge ira: <Kaing'anani eto, ababihu kohosakanya ibuwa yolingana na ibuwa ya Yehova. Ibuwela tchasakanyiwe ira nikutegevo mikuto dotumeya, nari mikuto dimohi diwa, nari. So ibuwela isakanyiwe ira ikale umboni wa nyo na hiyo.>

²⁹ Hiyo kannakayenamo youmbuwela ira nnokonda jinafuna Yehova nne kannakayenamo ira: <Ndoweni nimuhiyeni, kanimuharegeni.> Hiyo kanimangele ibuwele ira nidowegenavo mikuto dotumeya nari jovelela ja jodja nari mukuto uli watene, nari. Hiyo kannasakanya ibuwa imohiwa ahali ya Yehova Mulugu wehu yenno inakala sogolro wa Musasa wa Yehova.>>

³⁰ Namakuta Fineyasi na andimuwa andimuwa a malogo a aIzarayeli kagavwile jatene ejile jawongile akuda Rubeni, akuda Gadi na akuda Manasesi, andimuwale kohoona ira tchapama.

³¹ Mwa ora yenne mulombwana Fineyasi mwana namakuta Eliyazari ohowonga na akuda Rubeni, akuda Gadi na akuda Manasesi eraga: <<Hiyo peno nihiiziwa ira Yehova uli na hiyo atene mwasiwa nyo kammuhiyile Yehova muwari mwa eji, munamuharave liyene. Nyo muhavunela Ana Izarayeli goyi dafuna atu kana mmandani mwa Yehova.>>

³² Nomala enne, Fineyasi mwana namakuta Eliyazari na andimuwa andimuwa kazile na liye kohalanyaga akuda Rubeni na akuda Gadi ilambo ya Jileyadi, aliwa welela ilambo ya Kana, wewo wakumile atu. Kagafiyile, kohawandelamo Ana Izarayeli jatene jene.

³³ Kagawongile enne, Ana Izarayeli atene kohoona ira tchapama. Aliwa kohoroma mutamalela Mulugu eto joumbuwela janna atu ira kadowe kawane na akuda Rubeni na akuda Gadi, katolotche ilambo yewa, joumbuwela jejo johomala.

³⁴ Atu a nlogo na Rubeni na nlogo na Gadi vahanle atu, ibuwa yamangile atu kohovaha nzina na Ibuwa ya Umboni, mwasiwa aliwa kohowonga ira: <<Ibuwela tchi yengo yohidedela umboni muwari mwa hiyo ira Yehova gu Mulugu wehu.>>