Jozuwe 2 - Mazu Otchena a Mulungu

Anamawendelela kohofiya vande va Rahabi

¹ Evale Jozuwe mwana Numi oharuma alombwana ambinli ira kadowe kawendelele ilambo ya Kana mozemba, makamaka sidadi ya Jeriko. Aliwa kohokuma ilambo ya Sitimi valigi atu, aliwa dowa fiyeda volowa Jeriko. Kagavolowile, kahayilege vande va puta eni eriwa Rahabi.

² Mwa enne mwene wa sidadi ya Jeriko ile ohowandeliwa ira: <<Kohokala alombwana a Ana Izarayeli kafiyile mahiyu evano, kazela wendelela ilambwela. Kafiyedile vande va Rahabi.>>

³ Evale mwene wa Jeriko ule oharuma atu eraga: <<Muvenye, mudowe wa mwana muhiyanole Rahabi. Mwamuwandele ira: <Waakumihe atu kafiyedile vande vawo, tchoira aliwa kazela wendelela ilambwela.> >>

⁴ Mbwenye mazwale kahananfwanye Rahabi, liye ohatukula alendo ambinli ale, atawiha. Evale atu karumiwe kagafiyile, kaganfukile, Rahabi ohowongaga ira: <<He, alendove, kohofiya vano. Wakumile atu eto miyo kadaiziwilewo.

⁵ Mbwenye itchiguwo tchiguwo yenna kafunaga funga mulango wa sidadi, aliwa kohokuma, aliwa dowaga. Mbwenye kadiiziwile udowile atu. Mwatamangela mobaranya, afwase munoafwanya.>>

⁶ Fwanyeya eto tempu yawonga liye eno, alombwana ale kafwanyeya kagali nimburo notandeleya nafwanyeya vazulu va nyumba ya Rahabi. Tchoira atu karumiwe na mwene kahanafiye, Rahabi ohatawiheda vazulu va nyumbaye, liye tukula mitati da yomela imohi nnga ha mavila datandile liye, liye mala akunelana pama ira kahaoneyege.

⁷ Evale atu karumiwe na mwene ale kagavwile yowonga ya Rahabi, aliwa kohovenyihana, roma asakasakaga. Aliba avenda ale no kuma muJeriko, aliba mulango kohofunga mulangole akoka. Aliwa kohavenda kaharaga ndila fiyeda vanalambuwela atu muhindje Jordawu mbwenye tchaaonne.

⁸ Anamawendelela kafwanyeya vande va Rahabi ale kahanagone, muhiyanole ohogwela vazulu va nyumba vali atu vale,

⁹ liye awandela ira: <<Miyo dihiiziwa ira Yehova uhumala uvahani ilambwela. Hiyo atene nnakala muJeriko muno nnouovani eto atu atene anakala mwilamboni muno anongurumela mouovani.

¹⁰ Tchoira nihivwa ira Yehova ohoummiha Bara Yofila nyo mulambuwaga, mukumaga Ijipitu. Eto nihivwa zela jejo jaairilena nyo amwene ambinli a aAmore, mwene Seyoni na mwene Oge anno kafwanyeya kombela ya ule ya Jordawu anno mwatolotchile nyo.

¹¹ Hiyo nagavwile ejo, nihigomiwa niso eto kalivo unalimbiha murima zela wa nyo. Tchoira Yehova Mulugu wenyu gu Mulugu wenno unafwanyeya ilambo ya zulu na ilambo ya vati ila.

¹² Nona nnauvepani ira nyo mulumbele na nzina na Yehova ira munoza mudiirele miyo na atu a muibalini mwaga upama nnga duireleni miyo. Inavepa miyo, nnafuna mudivahevo ibaribari ira diiziwege

¹³ ira nyo mwazaga, kamunadipa miyo, nne baba nne mma nne arongolaga nne adibilaga atenene na abalihu atene.>>

¹⁴ Alombwanale kohomuwakulaga keraga: <<Weyo wahala, wahaawandele atu izele hiyo, Yehova anivahaga ilambwela, nnouirelani makalelo apama, ororomeleya. Mwaniwombola hiyo ingumi yehu, na hiyene nnouwombolani nyo.>>

¹⁵ Noira enne, muhiyanole ohotukulaga ngohi ira atitihedena anamawendelela ale vajanelani. Tchoira nyumba ya Rahabi, kamangile muwari mwa muru mulukulu awerewera sidadi yenne, liye kala muwari mwa muru mule.

¹⁶ Rahabi ohawongana ira: <<Mwakuma eva, mudowe mwavitale mwangoni tawiha ira atu orumiwa na mwene anoza kaufwanyeni. Mumalewo malambo mararu fiyeda aliba uvendani ale kawelele musidadi mu. Era eno nyo mudowege ndilinyu.>>

¹⁷ Evale alombwanale kohowakulaga keraga: <<Hiyo nnoirana nnga mwemo unilumbelihele we, malringana ukwakwanelihede inauwandela hiyo ila.

¹⁸ Hiyo naza nizaga mwilamboni muno, utukule ngohi ofila ula, umangelele vajanelani veva vinanititiheda we. Waatukule abalawo atene, babawo na mmawo, na arongolawo vamohi na atu atene a muibalini mwawo, waahele mmba mwawo emuno.

¹⁹ Akalawo eto mutu unakumele unde siku neno, apiwa, jayeve, mulandu wenno kahi wehu. Mbwenye apiwa mutu uli watene unafuna fwanyeya mmba mwawo, unafuna rumelela sangiri naye gu hiyo.

²⁰ Eto weyo, wera wamuwandele mutu uli watene izele hiyo, nihambamo zela yenno unilumbelihile we.>>

²¹ Evale Rahabi ohowakulaga eraga: <<Ikale eno nnga muwongele nyo.>> Noira enne, ohalanyaga, aliwa tukula ndiliwa dowaga. Vahanle liye, ohotukulaga ngohi ofila ule, liye mangelela vajanelani vale.

²² Alombwanale kagakumile, kohodowaga mwangoni, aliwa malawo malambo mararu. Aliba avenda ale kosaka ndila datene, aliwa welela musidadi mwakoka mwene kahaaonneve.

²³ Evale alombwana ambinlale kohomaruwaga katitaga mwangoni ule, aliwa lambuwa muhindje, aliwa fiya wa mulombwana Jozuwe mwana Numi, aliwa muwandelamo jatene jaireyile.

²⁴ Eto kohomuwandela ira: <<Na ibaribari Yehova uhunivaheda ilambo yatene yenna mmandani mwihu. Atu atene anakala mwilamboni muno anongurumela moova na mwasa wehu!>>