Jozuwe 1 - Mazu Otchena a Mulungu

Mulugu ohomulimbiha mulombwana Jozuwe

¹ Mozeji, namalaba wa Yehova agakwile, Yehova ohowonga na Mozeji sempurwaye, Jozuwe mwana Numi,

² ira: <<Namalaba waga Mozeji umala kwa. Nona inafwanela uvenye na aIzarayeli atene ala, mulambuwe muhindje Jordawu, mufiye ilambo yenno inaavaha miyo Ana Izarayeli.

³ Miyo dihimala uvahani ilambo yatene yenno munanyingale nyo nnga mwemo mwawongele miyo na mulombwana Mozeji.

⁴ Ilambo yenno inafuna miyo uvahani madilriwa anafuna karome pandi ya muisalesaleni dowa ante mwango dinaitaniwa Libano ante dowa muhindje mulukulu wa Eufarati vamohi na ilambo yatene yenno inakala aEti, dowa ante bara Mediteraniyo pandi ya mavirelo wa nzuwa.

⁵ Kalawo wawo watene unoagondjiha amwidanawo atene anafuna wana na weyo. Miyo nnakalave na weyo na makalelo nnga dali miyo na Mozeji. Miyo kadiza duhiya, nne kadiza dunyanyala.

⁶ Ukale olimba kopolo eto ukale olimba murima mwasiwa weyo unoza waasogolrelre atwala ira kavahiwe ilambo yenno ilumbenle miyo na makolo ewa ira daavahe.

⁷ So weyo ukale olimba kopolo eto ukale olimba murima pama. Uing'anele pama ira uharihemo malamulo matene namalaba waga Mozeji uurumile liye. Kuperuwe nne para muwononi odjana nne para muwononi oromana ira jawo juwendele pama mwatene mwene munayege we.

⁸ Weyo kuhiye wonga zela jengo jinafwanyeya mulivuruni mwa malamulo. Inafwanela ntana na mahiyu uumbuwelege jengo jinafwanyeya mulivuruni mu ira uwandege harihamo na makalelo apama jatene jilrembiwe emu. Era eno jengo jawo jatene jinerege wenda pama eto unerege dowa sogolro na makalelo apama.

⁹ Uumbuwelege ira durumile ira ukale olimba kopolo eto ukale olimba murima! Kukayena ova eto kurendjeye, mwasiwa miyo Yehova Mulugu wawo, nnakalege na weyo watene wene unayege we.>>

AIzarayeli kohovisakanyeda ira kalambuwe muhindje Jordawu

¹⁰ Evale mulombwana Jozuwe oharuma andimuwa a aIzarayeli ira:

¹¹ <<Mudowe mwavirege mmisasani muwari mwa aIzarayeli, mwaarume atu atene ira: <Musakanye jodja jenyu mwasiwa muwari mwa malambo mararu munovenya ira mulambuwe muhindje Jordawu ira muvolowe, mutukule ilambo yenno inafuna uvahani Yehova Mulugu wenyu ira ikale yenyu.> >>

¹² Nomala enne, Jozuwe ohowongaga eto na nlogo na Rubeni, Gadi na atu a metadi a nlogo na Manasesi, eraga:

¹³ <<Muumbuwele mazu anno uurumileni mulombwana Mozeji, namalaba wa Yehova ira: <Yehova Mulugu wenyu, unouvahani ilambwela eto unouvahani ira muvumegemo.>

¹⁴ Ahiyaninyu na ahiminyu na jifuwo jenyu jatene jinohala kombela ya Jordawu uno, muwari mwa ilambo yenna ivahiwe nyo na Mozeji. Mbwenye nyo alombwana owanda wana kondo inafwanela mutukule jowanana jenyu, mudowe mwalambuwe muhindje Jordawu, mwakale sogolro wa abalinyu a aIzarayeli ira mwaakamihede wana kondo,

¹⁵ fiyeda Yehova aavahe abalinyu ira katukule ilambo yenno Yehova Mulugu wenyu unaavaha liye ira kakalegemo eto kavumegemo nnga munavuma nyo. Jagaireyile eno, nyo munoza muwelele ilambo yenno Mozeji muzari wa Yehova auvahileni liye, pandi ya makumelo wa nzuwa wa muhindje Jordawu.>>

¹⁶ Evale kagavwile mazu a mulombwana Jozuwe, aliwa kohomurumelaga keraga: <<Jatene jene jinirumile nyo, na ibaribari nnoirana. Eto watene munafune nyo niruma, nnoyawo.

¹⁷ Hiyo nnerege uvwelelani nyo na makalelo nnga nanvweleletcha hiyo mulombwana Mozeji mwa jatene. Eto Yehova Mulugu wenyu akaleve na nyo na makalelo nnga ali liye na Mozeji.

¹⁸ Mbwenye mutu wenne unarunihe nlamulo nenyu eto ahavwelelaga jowonga jenyu mwa jatene jinamurume nyo, mutu wenno unopiwa. So nyo inafwanela mukale olimba kopolo eto mukale olimba murima.>>