Jowandeliwa 8 - Mazu Otchena a Mulungu

Huliwa wa yofungihana yogomiheda ya livuru

¹ Nomala enne, mwana Nibila nne nohotwavo yofungihana yanetanu na mbinli yafwanyeya valivuruni vale. Nagatwile yofungihana yanetanu na mbinli ile, ilambo ya zulu yohomiyalaga zii, fiyeda mala wandamelana metadi ya ora, wahavweyaga yengo.

² Evale miyo dohaona angelro atanu na ambinli anno anafwanyeya oimelene vamentoni va Mulugu. Kada mungelro ohovahiwa palraza yaye yaye.

³ Noira eno, ohozaga mungelro mmohiwa wa vaheno vene aganna mmandani mwaye yotumeyelamo jonukela yosakanyiwa na oru, liye dowa imela wandamelana ibuwa yosakanyiwa na oru, yenno inafwanyeya vasogolro va mpando wa umwene. Mwa enne ohovahiwa jonukela pwi ira atumeye amala agumanihe na jolobela ja atu otchenihiwa adowe avelele vaibuwani vale.

⁴ Mwa enne utchi wa jovelela jonukela jile vamohi na jolobela ja atu otchenihiwa jile johokumaga mmandani mwa mungelrole gwelaga dowaga vamentoni va Mulugu furuka.

⁵ Evale mungelrole ohotukula yengo yotumeyelamo jonukela yenno yali mmandani mwaye, liye dowa zalihamo munlo afwanyeya vaibuwani vale, liye kutulela mwilamboni ya vati. Agakutulenle munlole mwilamboni ya vati, wohokalaga ndari, kukuma undimuwa, jerima vamohi na indarandara.

Angelro atanu na ambinli kaimbaga palraza

⁶ Mwa enne angelro atanu na ambinli anno kanna palraza yaye yaye ale, kohovisakanyeda ira karome imba palraza diwa dile.

⁷ Evale mungelro murandji ohoimba yaye. Agaimbile, vohoza maralaza na munlo ogumanihiwa na sangiri, aliwa vokediwa ilambo ya vati. Mwa enne pandi yaneraru ya ilambo ya vati yohoja. Muwari mwa mitengo datene dali mwilamboni ya vati, pandi yaneraru dohojamo. Eto mpinda watene mutiti afwanyeyamo ohomala ja.

⁸ Noira eno, mungelro mmohiwa wanembinli ohoimba palraza yaye. Agaimbile, ohooneyaga munlo ohokala wa masika olingana na mwango mulukulu ohinda munlo. Evale munlole ohovokediwa mbara. Agavokediwe mbara mule, pandi yaneraru ya mahindje a mbara yohosanduwa kala sangiri.

⁹ Mwa enne pandi yaneraru ya jatene ja ingumi jali mbara johomala kwamo. Eto mwadeya dawenda mbara mule, pandi yaneraru dohomala tolowa.

¹⁰ Noira eno, mungelro waneraru ohoimba palraza yaye. Agaimbile, zulu wohokumaga nyenyedi ilukulu yohinda nnga mwendje, dowa morela mwilamboni ya vati pandi yaneraru ya mihindje datene nari pandi yaneraru ya visime datene da mahindje.

¹¹ Nyenyedile nzina niwa yaitaniwa Wawa. Yagamorenle mmahindjeni mule, mahindje kohosanduwa kala owawa. Evale kohokala atu oindjiva kakwile na mwasa ong'wa mahindjale, voira mahindjale kali owawa.

¹² Noira eno, mungelro wanennayi ohoimba palraza yaye. Agaimbile, pandi yaneraru ya nzuwa, na mwedi vamohi na nyenyedi yohobubudeya ira pandi yenne yahamoneyege. Mwa enne na ntana nzuwa namoneya pandi yoroma na pandi yanembinli mbwenye nafiya pandi yaneraru kanamoneya eto mwedi na nyenyedi dene na mahiyu jamoneya pandi yoroma na pandi yanembinli mbwenye yafiya pandi yaneraru, kajamoneya.

¹³ Nomala enne, miyo diing'anagave vamuru vaga, dohomuonaga kakozi avavaga zulu-zulu. Kakozi ule ohonla, awongaga na mazu okuwa eraga: <<Jowopiha, jowopiha, jowopiha wa nyo munafuna mufwanyeye mwilamboni ya vati! Tchoira angelro araru kahanle ale kaimba palraza diwa, jabure jinafuna kuma jinakala jowopiha.>>