Jowandeliwa 7 - Mazu Otchena a Mulungu

Dindiwa wa aIzarayeli 144.000

¹ Nomala enne, dohaona angelro annayi kagaimenle pandi dannayi dene da ilambo ya vati, mmohi wu, mmohi wu, mmohi wu, mmohiwa wu. Angelro ale kahidedile nipevo pandi dannayi dene da ilambo ira mwilamboni mwatene mwahawombe nipevo, nne mbara, nne ira nahawande tikinya mutengo uli watene.

² Eto dohomuonaga mungelro mmohiwa akumelaga makumelo wa nzuwa, aganna mmandani mwaye karimbu ya Mulugu Okalawo. Evale mungelrole agazile ohowongaga aakuwelaga angelro annayi anno kavahiwe utongi oira kanonge ilambo ya vati vamohi na mbara, liye ira:

³ <<Kadedihani. Kamubaranyede nonga ilambo, nne mbara, nne mitengo. Mudedihe ira nibabihe adinda azari a Mulugu vakoveni viwa.>>

⁴ Mwa enne miyo dohovwa numero na atu kafuna dindiwa. Kafuna kadindiwe atu 144.000 okumela malogo matene a Ana Izarayeli.

⁵ Nlogo na Juda 12.000, nlogo na Rubeni 12.000, nlogo na Gadi 12.000,

⁶ nlogo na Azeri 12.000, nlogo na Nafitali 12.000, nlogo na Manasesi 12.000,

⁷ nlogo na Simeyawu 12.000, nlogo na Levi 12.000, nlogo na Isakari 12.000,

⁸ nlogo na Zebuloni 12.000, nlogo na Joze 12.000, nlogo na Benjami 12.000.

Anamwindji a atu kamutamalela Mulugu

⁹ Jagamanle ireya ejile, miyo dagaing'anne dohoonaga mwindji wa atu oindjiva ohowanda kontareya, okumela vilambo datene na malogo matene, kada atu, na iwongelo yatene. Aliwa kafwanyeya kagaimenle vasogolro va mpando wa umwene eto vasogolro va mwana Nibila, kagawarile bata dotchena eto kaganna tambi da minazi mmandani mwiwa.

¹⁰ Aliwa kowongaga na mazu okuwa keraga: <<Vulusa wehu unakumela wa mwana Nibila na Mulugu wehu wenno ugaratile mpando wa umwene.>>

¹¹ Eto mwa tempu yenne angelro atene kafwanyeya kagaimenle mowerewera mpando wa umwene eto kagaawerewerile andimuwa 24 ale vamohi na vinyama nnayi da ingumi dile, kohodowaga oramiheda kove diwa vati kaing'anaga mpandole, aliwa mutamalelaga Mulugu keraga:

¹² <<Ame! Mulugu wehu gofwanela tamaleliwa, titimihiwa, gofwanela kana zelru, goteteliwa, gorihediwa, gunna utongi vamohi na kopolo datene kala no kala. Ame!>>

¹³ Mwa enne mundimuwa mmohi afwanyeya muwari mwa andimuwa 24 ale, ohodifuka eraga: <<Kodi atu atene anna kawarile bata dotchena ala, bani? Nnga kakumile waani?>>

¹⁴ Miyo dohoira: <<Andimuwa nyo guiziwile. Miyo kadizi.>> Evale ndimuwole ohodiwandela ira: <<Atwala banno kawandile gondjiha, kawanda vira tempu ya goyi yohokala ya masika yafwanyeya mwilamboni ya vati. Aliwa banno kawandile fulra no tcheniha bata diwa muwari mwa sangiri na mwana Nibila.

¹⁵ Nona aliwa peno anafwanyeya vampandoni va Umwene wa Mulugu, kamulabaga Mulugu muNyumbani mwaye ntana na mahiyu. Eto Mulugu wenno unafwanyeya ogaratene vampandoni va Umwene unerege akumbarela.

¹⁶ Aliwa kiza kakagana ndala, nne ntona, nne kiza kaona kaha wa nzuwa, nne kaha undimuwa uli watene.

¹⁷ Tchoira mwana Nibila neno nnafwanyeya vevo vili mpando wa umwene nnoza nikale namakumbuza wewa. Eto liye unerege asogolrelra, aadowegena visime dovaha mahindje a ingumi. Mulugu eto unoza apupute misodi datene nnafwanyeya mmentoni mwewa.>>