Jowandeliwa 6 - Mazu Otchena a Mulungu

Huliwa wa jofungihana ja livuru

¹ Nomala enne, miyo dohoonaga mwana Nibila nne nitwaga yofungihana imohi yafwanyeya muwari mwa jofungihana tanu na mbinli jadindiwe valivuruni vale. Mwa enne muwari mwa vinyama nnayi da ingumi dile, mwanainyama mmohi ohowongaga na nizu nokuwa nnga ndari amuitanaga mutu dahamuonne miyo, ira: <<Kaza!>>

² Evale miyo diing'anaga, dohoonaga kavalo yotchena izaga, vakavaloni vale vagali mutu anna nifumo mmandani mwaye. Liye ohovahiwa tchapowa wa utongi. Mwa enne ohoromaga wenda adowaga nnga namagondjiha orumiwa ira adowe agondjihe.

³ Nomala eno, mwana Nibila nne nohotwavo yofungihana yanembinli yafwanyeya valivuruni vale. Nagatwile yofungihana yanembinli ile, mwanainyama wa ingumi wanembinli ule, ohowongaga ira: <<Kaza!>>

⁴ Vevale yohokumelelaga kavalo imohiwa yofila. Mwa enne mutu afwanyeya vakavaloni vale ohovahiwa supada nindimuwa, liye vahiwa utongi ira akumihemo murendele mwilamboni ya vati ira atu kapananege mmohi na nfwaye.

⁵ Nomala eno, mwana Nibila nne nohotwavo yofungihana yaneraru. Nagatwile yofungihana yaneraru ile, miyo dohovwa mwanainyama wa ingumi waneraru ule awongaga ira: <<Kaza!>> Mwa enne miyo diing'anaga, dohoonaga kavalo yodiba, vazulu va kavalo vale vagali mutu anna balansa mmandani mwaye.

⁶ Evale miyo dohovwa nizu nikumelaga vari va vinyama nnayi da ingumi dile, nikuwaga ira: <<Udowe wahele ndala ilukulu mwilamboni ira kobiri inalabela mutu siku nimohi nompumbula ikwakwanege para gulana kopo taru da utu wa tirigu bahi owu hehi mulruzi mmohi wa utu wa sevada bahi. So mbwenye makura vamohi na vinyu, kunonge.>>

⁷ Nomala enne, mwana Nibila nne nohotwavo yofungihana yanennayi. Nagatwile yofungihana yanennayi ile, miyo dohovwa mwanainyama wanennayi wa ingumi ule awongaga ira: <<Kaza!>>

⁸ Mwa enne miyo diing'anaga, dohoonaga kavalo ya madjani, vazulu va kavalo ile vagali mutu. Mutule nzina naye aitaniwa Ukwa. Eto Nimburo na Anokwa nomuhara mundulri mwaye. Aliwa kohovahiwa utongi zela pandi yanennayi ya atu kafwanyeya ilambo ya vati ira kaapege na supada, nari na ndala, nari na itukwa, nari kaapege na vinyama da mukokolani nnafwanyeya mwilamboni ya vati.

⁹ Nomala enne, mwana Nibila nne nohotwavo yofungihana yanetanu. Mwa enne miyo dohoonaga mukukusuni mwa ibuwa minemba da atu kapiwile na mwasa wa mazu a Mulugu na umboni wahidedela atu.

¹⁰ Minemba dile dokuwaga ira: <<So Nabwiya Mwinnya otonga Jatene, nyo Otchena eto wa ibaribari, kodi fiyeda alini munafuna nyo za aweliheda kunyakunya ale kanipile, katatinle sangiri nehu mwilamboni ya vati?>>

¹¹ Nomala enne, kada mutu ohoroma vahiwa bata yaye yotchena, aliwa wandeliwa ira: <<Mudedihe vang'onove fiyeda nikwakwane numero na abalinyu anafwanyeya mwilamboni ya vati anafuna piwa nnga mupiwile nyo. Numero niwa nakwakwanela, jinoza jiireye nnga munawongela nyo.>>

¹² Nomala enne, mwana Nibila nne nohotwavo yofungihana yanetanu na imohi. Mwa enne diing'anaga, wohozaga indarandara indimuwa. Nzuwa nohodibaga nnga makalra. Eto mwedi ohosanduwaga, watene kala ofila nnga sangiri.

¹³ Eto nyenyedi dafwanyeya zulu dohomala vareyela vati, nnga vareya wa jovaha jititi ja mutengo wa mufigera atekenyeyaga na nipevo nlukulu.

¹⁴ Zulu wohomala vindeya fiyeda dimela, nnga vinera mutu avindaga nipawu. Eto mwango datene nari vasuwa vatene, johomala tchikuleyamo mmamburoni mwemo mwali atu.

¹⁵ Mwa enne amwene a ilambo yatene ya vati, andimuwa atene otonga, andimuwa a anyakondo, atu orayela, atu okana utongi, azari, ahali azari, na atu atene a mwilamboni ya vati, kagaonne jiireyaga enne, atene kohotawelaga mmafukweni, na mmabweni a mmwangoni.

¹⁶ Aliwa kohoroma wonga na mwango vamohi na mabwe keraga: <<Kanikuneleni, munikoye ira wenno ugaratile vampandoni va umwene vale ahanione eto ira uwali wa mwana Nibila wahanifwanye.

¹⁷ Tchoira siku nindimuwa na uwali wewa nihimala fiya. Kodi bani unafune wanda vilela zela jatene jinafuna ireyaga?>>