Jowandeliwa 5 - Mazu Otchena a Mulungu

Livuru nofungihiwa fendo tanu na mbinli

¹ Mwa enne dagaing'anne ndanda nodjana na wenno agaratile mpando wa umwene ule, mmandani mwaye dohoonagamo livuru navindiwe, nagali nolrembeya muwari na unde eto nafungihiwe na jofungihana tanu na mbinli, jejo jaire dindiwavo.

² Mwa enne dohomuonaga mungelro wa kopolo awongaga na mazu okuwa afukaga ira: <<Bani unafwanela za twavo jofungihana jidindiwe ji ira awande hula livuru ni?>>

³ Mbwenye mungelrole agafukile eno, kavaoneyile mutu, nne wa ilambo ya zulu, nne wa ilambo ya vati, nne vati va ilambo ya vati ira awande hula livuru nne, nne ira aze awande ileri jalrembiwe mwemule.

⁴ Mwa enne, na mwasa oira kaliwo nne mutu mmohi afwanenle hula livuru nne eto nne ira aing'anemo, miyo ora yenno dohokana nla wohokala wa masika.

⁵ Mbwenye mundimuwa mmohi afwanyeya muwari mwa andimuwa 24 ale, ohodiwandelaga eraga: <<Weyo kunle. Kaing'ana, Podogoma wa nlogo na Juda, wenno ukumenle Mutchitchini wa Davi, uhumala gondjiha. Nona liye gunafuna wanda za twavo jofungihana tanu na mbinli jidindiwevo ira awande hula livuru nne.>>

⁶ Vevale miyo dagaing'anne, dohoonaga mwana Nibila nagali vari va mpando wa umwene vale, vevo vawereweriwe na vinyama nnayi da ingumi vamohi na andimuwa 24 ale. Mwana Nibila nne naoneya nnga mwana nibila napiwe amala nivenya mokwani. Mwana Nibila nne nohokana manyanga matanu na menli vamohi na meso matanu na menli anno anafwanyeya kagali Minemba mitanu na minli da Mulugu, dedo Mulugu urumile liye mwilamboni mwatene ya vati.

⁷ Mwana Nibila nne nohodowa tukula livuru neno nafwanyeya ndanda nodjana na wenno agaratile mpando wa umwene ule.

⁸ Mwana Nibila nne nagatukunle livuru nne, nagahidedile mmandani, nahanarome fugula livuru nne, vinyama nnayi da ingumi dile na andimuwa 24 kafwanyeya mmipandoni mule, kohooramihedaga kove diwa vati vamentoni va mwana Nibila nne, kanitamalelaga. Kada mutu ohokana arpa mmandani mwaye. Kohokana eto mabasiya osakanyiwa na oru, mwagazanle jengo jonukela, jejo jinafwanyeya jagali jolobela ja atu otchenihiwa.

⁹ Aliwa komuimbelaga mwana Nibila nne nyumbo ixa keraga: <<Nyo muli ofwanelela ira muwande tukula livuru no, mutwe jofungihana jidindiwevo, mwasiwa nyo mohopiwa eto muwari mwa sangiri nenyu muhuwanda awombola atu a malogo matene, a viwongelo datene, na atu a vilambo datene, na kada atu ira kakale a Mulugu,

¹⁰ eto muhavolotchiha muUmweneni mwenyu, nyo asandutcha ira kakale anamakuta na amwene a Mulugu wehu ira kaze katonge ilambo yatene ya vati.>>

¹¹ Noira enne, miyo dagaing'anne dohovwaga mazu a angelro oindjiva na makalelo ohokala a masika. Mazu a angelro ale kakumelaga vampandoni va Umwene vevo vawereweriwe na vinyama nnayi da ingumi dile vamohi na andimuwa 24 ale.

¹² Mazu a angelro davwaga miyo ale koimbaga na mazu okuwa keraga: <<Ofwanela gu mwana Nibila neno napiwe eto nihikalawo. Liyene bahi guli ofwanela kana utongi watene, no rayela watene, na zelru datene, na kopolo datene, no tamaleliwa watene, no titimihiwa watene vamohi no teteliwa watene.>>

¹³ Noira enne, dohovwaga jopandutchiwa jatene jili ilambo ya zulu, nari ilambo ya vati, nari vati va ilambo ya vati, nari mbara, jikuwaga jiiraga: <<Wenno ugaratile vampandoni va Umwene vamohi na mwana Nibila, aliwa inafwanela katamaleliwe, karihediwe, kakayena undimuwa na utongi kala no kala.>>

¹⁴ Eto vinyama nnayi da ingumi dile dowongaga diiraga: <<Ame!>> Evale andimuwa 24 ale kohokokoraga, kamutamalelaga wenno ali vampandoni vale vamohi na mwana Nibila nne.