Jowandeliwa 4 - Mazu Otchena a Mulungu

Joonihiwa ja Juwawu ja ilambo ya zulu

¹ Nomala eno, dagaing'anne, dohoonaga mulango mmohi ahuleyile ilambo ya zulu. Muwari mwa mulango mule, mohoza nizu nimohive navwa miyo voroma nikuwaga nnga palraza. Nizu nne nohowongaga ira: <<Kagwela uze uno. Miyo nnafuna duonihe jengo jinafuna za ireya sogolro.>>

² Mobaranya dohotukuliwa muwari mwa Munemba Otchena. Mwa enne dagaing'anne, dohoonaga mpando eni wa Umwene afwanyeya zulu. Eto vampandoni va Umwene vale ohokalavo agaratilevo.

³ Wenno agaratilevo ali ojerimela nnga mabwe ofuneyetchetcha anaitaniwa jaspe na saradoniyo. Eto ohokala muzirilimbo arungunuwa mpando wa umwene ule. Muzirilimbole ali ojerimela nnga nibwe nofuneyetchetcha nnaitaniwa ejimeralda.

⁴ Mpando wa Umwene ule, mmambalo mwiwa mule mokala mipando 24 darungunuwa mpando mulukulule. Mmipandoni 24 mule mohokala andimuwa 24 kagaratilemo, kagawarile jowara jotchena eto kada mundimuwa ohokana vamuru vaye tchapowa osakanyiwa na oru.

⁵ Eto vampandoni va Umwene vale, vokumaga jerima wohokala wa masika no kukuma undimuwa na ndari didjindji. Eto sogolro wa mpando wa umwene ule dohoonaga mendje mitanu na minli dohinda, dedo nnafwanyeya dagali Minemba mitanu na minli da Mulugu.

⁶ Eto sogolro wa mpando wa umwene umohive wewule wohokalaga yengo nnga ntiya nojerimela nagali na viduru eto yengwele yali yotchena nnga nibwe nofuneyetchetcha nnaitaniwa kiristali. Eto mmambalo mwa mpando wa umwene ule muhukala vinyama nnayi da ingumi, imohi wu, imohi wu, imohi wu, imohi wu, jozaleliwa meso maningo ewa matene, sogolro na mundulri.

⁷ Mwanainyama wa ingumi oroma unaoneya nnga podogoma. Mwanainyama wa ingumi wanembinli unaoneya nnga ng'ombe ya mulombwana. Mwanainyama waneraru wa ingumi wintoni waye unakala nnga wintoni wa mutu. Mwanainyama wa ingumi wanennayi unaoneya nnga kakozi avavaga.

⁸ Vinyama nnayi da ingumi dile dihikana mapepelo matanu na nimohi. Maningwiwa matene kazanle meso ve kuma zulu ante vati va mapepelo ewa. Eto ora ili yatene ntana na mahiyu vinyama dile dinnana imba mohomiyala, diiraga: <<Otchena, Otchena, Otchena gu Nabwiya, Mulugu wa Kopolo Datene, wenno aliwo wanle, uliwo peno eto unaza akalewo!>>

⁹ Eto jengo ja ingumi jile jamutitimihaga wenno ugaratile vampandoni va Umwene vale, jimutetelaga Mulugu Okalawo malambo a mukalakala zela jinaira liye, jiiragave enne,

¹⁰ andimuwa 24 anafwanyeya mmipandoni ale na aliwene anokuma mmipandoni mule, aliwa mukokorelaga wenno ugaratile mpando wa umwene ule, aliwa mutamalelaga wenno unakalawo kala no kala, aliwa wungulaga atchapowa a oru ale, tatilelaga vasogolro va mpando vale, kawongaga keraga:

¹¹ <<Nyo Nabwiya wehu, vamohi na Mulugu wehu, muhufwanela titimihiwa, no rihediwa, vamohi no teteliwa zela kopolo denyu. Mwasiwa nyo gupandutchile jengo jatene eto jatene jiwandile panduwa vamohi no kalawo muwari mofuna mwenyu.>>