Jowandeliwa 3 - Mazu Otchena a Mulungu

Mazu a Yesu para nikuru na atu omuroromela Yesu a sidadi ya Sardeji

¹ Liye ohowongagave na miyo adilanyedaga ira: <<Umulrembele mungelro wa nikuru na atu omuroromela Yesu a Sardeji mazu oira: <Wenno unna Minemba mitanu na minli da Mulugu vamohi na nyenyedi tanu na mbinli gudiwandenle mazwala. Liye unawonga ira: Miyo dihiiziwa joira jenyu. Atu anauonani nnga muli angumi, mbwenye muli okwene.

² Inafwanela mukale tchendjewa. Mulimbihe ingumi yenno ihanlewo vang'ono ira yahakwe. Tchoira dapima joira jenyu tchineneva, nnaona ira joira jenyu kahi jokwakwanela vamentoni va Mulugu waga.

³ Inafwanela muumbuwele mazu mwawatchenle nyo na mazu mwavwile nyo malambo a mundulri, mutwaruwe, muiregena jejo. Mwahawande rurumuwa gona unagona nyo, miyo nnoza moururumutchani nnga mbava, mwahaiziwaga siku niwa.

⁴ <<Mbwenye muwari mwa sidadi ya Sardeji mmohive, muhukala atu a vang'onove kahatakalihile jowara jiwa. Aliwa ba atu apama, ofwanela. Nona anoza kawende na miyo kagawarile jowara jotchena.

⁵ Mutu wenno unagondjihe, unowarihiwa jowara jotchena eto miyo kadiza ditimiha nzina naye muwari mwa Livuru na Ingumi. Eto nnoza dimurumelele vamentoni va Baba na angelrwaye ira: <<Na ibaribari mutula gwaga!>>

⁶ Ule unna mabaru, avwe jejo Munemba unaawandela liye makuru a atu omuroromela Yesu.> >>

Mazu a Yesu para nikuru na atu omuroromela Yesu a sidadi ya Filadelifiya

⁷ Liye ohowongagave na miyo adilanyedaga ira: <<Umulrembele mungelro wa nikuru na atu omuroromela Yesu a Filadelifiya mazu oira: <Mutu otchena wa ibaribari, wenno unna xavi na Davi, wenno uni afunga mulango ahakalagavo mutu ohula eto ahula mulango ahakalagavo mutu ofunga, gudiwandenle mazwala.

⁸ Liye unawonga ira: Miyo dihiiziwa joira jenyu. Kaing'anani, miyo dihimala uhulelani mulango ira muvolowe. Mulango duhulenleni miyo kalivo unawanda funga. Miyo dihiiziwa ira nyo munna kopolo da vang'onove. Mbwenye masiki munnave kopolo da vang'ono, munokoyave jofuna jaga eto kamuhiyile nzina naga.

⁹ <<Kaing'anani, miyo nnosakanya ira anno anafwanyeya kagali nyumba dofundjamo mazu da Satana, anno anaviitana aJudewu kahali, keraga nama, miyo nnosakanya ira aliwa kaze kakokore vamanyaloni venyu, kafiyedaga iziwa ira miyo duhuzivelani.

¹⁰ Voira nyo muhukoya mazwaga ira mukale ovilela muwari mwa makatamiho, nona siku na makatamiho nnafuna za ira atu atene a ilambo ya vati kaxixiwe, siku neno naza nifiya, na miyene nnoza dukoyeni.

¹¹ <<Miyo nnoza tchineneva. Nona inafwanela muimeleve na nroromelo nenyu ira mwahawakiwe tchapowa unafuna nyo za vahiwa.

¹² Mutu wenno unagondjihe, miyo nnomutimbela ira akale nimbozo muNyumbani mwa Mulugu waga. Liye muNyumbani mule kaza akumamo. Miyo nnoza dimulrembe mazina mararu. Nzina noroma, nzina na Mulugu waga. Nzina nanembinli, nzina na sidadi ya Mulugu waga, sidadi ya Jeruzalemu Muxa yenno inafuna kumela zulu wa Mulugu. Nzina naneraru nnakala nzina naga.

¹³ Ule unna mabaru, avwe jejo Munemba unaawandela liye makuru a atu omuroromela Yesu.> >>

Mazu a Yesu para nikuru na atu omuroromela Yesu a sidadi ya Layodiseya

¹⁴ Liye ohowongagave na miyo adilanyedaga ira: <<Umulrembele mungelro wa nikuru na atu omuroromela Yesu a Layodiseya mazu oira: <Wenno unaitaniwa Ame, unafwanyeya agali mboni owonga ibaribari na makalelo ororomeleya eto wenno uromihile jatene Mulugu upandutchile liye, gudiwandenle mazwala.

¹⁵ Liye unawonga ira: Miyo dihiiziwa joira jenyu. Nyo kamuli odidila eto nne kamuli okaha. Mbwenye muli vari na vari. Yohofwanela mukala odidila owu hehi okaha.

¹⁶ Mbwenye voira nyo muli vari na vari, kamuli odidila, nne kamuli okaha, miyo nnafuna duwumuleni wanoni waga.

¹⁷ Tchoira nyo mwagarati muni: <<Hiyo kanili a masika. Nihimala rayela, nihimala pa jehu, kilivo inihalenle.>> Mbwenye kamunaiziwa ira nyo muli atu ohokana mabasa, atu owendiha tangaranga, atu osimela, atu ohoona eto muli mandave dimbwiri.

¹⁸ <<Miyo mbwenye nnouwelruzani ira inafwanela mugule oru na miyo, oru wapama, opiyiwa vaparani ira mukale atu orayela. Eto inafwanela mugule na miyo jowara jotchena, muware ira manyazo enyu zela kala mandave kamale eto mugule na miyo murombwe, muzolihe meso enyu ira muwande ona.

¹⁹ Miyo atu anne nnaaziveliwa miyo, nnoasumulula eto nnoalanga. Nona inafwanela mutwaruwe, mukale atu ozuzumela irana japama.

²⁰ <<Kaing'anani. Miyo dili va mulango, nnagogoda. Ule unavwa nizu naga, ahula mulango, miyo nnovolowa mmba mwaye ira didje na liye eto liye unodja na miyo.

²¹ Miyo voira dihigondjiha, dihivahiwa utongi ira digarati mpando wa umwene wa Baba. Nona mutu wenne unagondjihe, nnonvaha ira agarati na miyo vano mpando wa umwene mmohive digaratile miyo.

²² Ule unna mabaru, avwe jejo Munemba unaawandela liye makuru a atu omuroromela Yesu.> >>