Jowandeliwa 22 - Mazu Otchena a Mulungu

Upama unafwanyeya muwari mwa Jeruzalemu Muxa

¹ Evale mungelrole ohodioniha muhindje okana mahindje a ingumi, ojerimela nnga nibwe notchena nofuneyetchetcha nnaitaniwa kiristali. Muhindjele akumela vampandoni va Umwene wa Mulugu na mwana Nibila

² eto avirile vari va rampa nlukulu na sidadile. Mutcherelani mwa muhindje mule, wu na wu, mohokala Mutengo Ovaha Ingumi, wenno unavaha jovaha ja mitundu kumi na minli va kada yaka, kada mwedi avahaga jovaha ja mutundu mmohi. Eto matakuru a mitengo dile anafwanyeya kagali murombwe ira atu a vilambo datene kavulumuwegena.

³ Muwari mwa Jeruzalemu Muxa kamuza mufwanyeyaga yengo yotembelrelreya. Mpando wa Umwene wa Mulugu na wa mwana Nibila unoza afwanyeyege musidadi mule eto atene anamuhara Mulugu anerege mulabela.

⁴ Aliwa anerege muona kove na kove eto vakoveni vewa vinoza vilrembiwe nzina naye.

⁵ Umahiyu kuza ukalawo. Ale anakalege emule kiza kasauwelaga moneya wa panti nari wa nzuwa mwasiwa Nabwiya Mulugu gunaza akale moneya wa sidadile. Eto aliwa anoza kasogolrelrege kala no kala.

Mazu ogomiheda

⁶ Mungelrole ohodiwandelaga eraga: <<Jinawonga miyo ji ti jengo jororomeleya eto ja ibaribari. Tchoira Nabwiya Mulugu wenno unaawandela anamafiyiheda aye ibaribari muwari mwa Munemba waye, gumurumile mungelro waye ira aze aawandele anamalabaye zela jengo jinafuna ireya tchineneva.>>

⁷ [Yesu ohowonga ira:] <<Kavwani pama. Miyo nnoza tchineneva. Orelihiwa gwenno unaharihamo mazu ofiyiheda ala anafwanyeya mulivuruni mu.>>

⁸ Miyo vano dagali Juwawu dili wenno uvwile eto uonne jatene jeji. Dagavwile eto dagaonne jatene jeji, dohogwelaga vati, miyo kokora vati va manyalo a mungelrole wenno udionihile jengo jeji ira dimutamalele.

⁹ Mungelrole mbwenye ohodihiyiha, liye ira: <<Nari, ejo kwirena. Mwasiwa miyo dili namalaba wa Mulugu nnga weyo na abalawo atene anno anafwanyeya kagali anamafiyiheda, na atu atene anaharihamo jengo jilrembiwe mulivuruni mu. Mbwenye inafwanela umutamalele Mulugu.>>

¹⁰ Evale mungelrole ohodiwandela ira: <<Kukoye mazu ofiyiheda anafwanyeya muwari mwa livuru ni. Inafwanela waawandele atu kavwe. Mwasiwa tempuwa ihanle vang'ono.

¹¹ Atu kagavwile, ule unafuna iranave jabure, airegena. Ule unafuna iranave jotakala, airegena. Eto ale kali apama, kairegenave japama jiwa. Ale kali otchena, kavitchenihegeve.>>

¹² [Yesu kwi:] <<Kavwani pama, miyo nnoza tchineneva. Dazaga, nnozana jotambilriha jaga mmandani ira dinvahege kada mutu molingana na mabasa alabile liye.

¹³ Miyo vano dili <A> eto dili <Ze>. Miyo dili oroma. Dili ogomiheda. Miyo dili maromelo eto dili magomelo.>>

¹⁴ <<Orelihiwa banno anafulra bata diwa musangirini mwa mwana Nibila ira kawande dja jovaha ja Mutengo Ovaha Ingumi eto ira kawande volowa musidadi muwari movira mmilangoni.

¹⁵ Mbwenye anambwa atene, ale analowa, aliba gonihana na makalelo abure, apanga, aliba hara amilugu amohiwa na atene anaziveliwa jengo jonama, aliwa kiza kavolowa. Atene anno anaza kakale unde.

¹⁶ <<Miyo vano Yesu gumurumile mungelro waga ira aze auwandeleni nyo makuru matene odiroromela ira muvwe ibaribari. Miyo dili Mutchitchi na mutu okumela mwa Davi eto dili nyenyedi yohindetchetcha inaitaniwa Nikoroxo.>>

¹⁷ Munemba vamohi na muhiyana wenno unafuna teliwa, anawonga ira: <<Muze.>> Eto wenno unavwe mazwala inafwanela na liyene aaitane afwaye ira: <<Muze.>> Eto wenno unna ntona aze. Wenno unafuna ng'wa, aze ang'we vasayi mahindje a ingumi.

¹⁸ Miyo nnoawendjeliha atu atene anavwa mazu a livuru ni. Mazwala ba mazu ofiyiheda. Mutu wenne unawendjede mazwala, Mulugu unomuwendjeda jowopiha jabure jinafwanyeya mulivuruni mu.

¹⁹ Eto mutu wenne unavungule mazwala, Mulugu unomuvungula ira ahawande volowa sidadi yotchena eto ira ahawande dja jovaha ja Mutengo Ovaha Ingumi jejo jilrembiwe mulivuruni mu.

²⁰ Ule unahidedela umboni zela jatene jeji unawonga ira: <<Na ibaribari miyo nnoza tchineneva.>> Ame! Muze Nabwiya Yesu!

²¹ Sayi da Nabwiya Yesu dikale na nyo atene. Ame! Kukala mazu a livuru na Jowandeliwa jejo Juwawu awandeliwe liye na Yesu.