Jowandeliwa 21 - Mazu Otchena a Mulungu

Makalelo a Jeruzalemu Muxa

¹ Evale miyo dohoiona ilambo ixa ya zulu na ilambo ixa ya vati, mwasiwa ilambo ya zulu yoroma na ilambo ya vati yoroma datene dohovira. Eto ilambo ixa yaonne miyo ile kamwafwanyeya bara.

² Eto dohoiona Sidadi Yotchena, Jeruzalemu Muxa, ikumelaga zulu wa Mulugu, ititelaga ilambo ya vati, yagamanle sakanyiwa pama nnga jini namateliwa afunaga watcheliwa na mamunaye.

³ Vevale dohovwa nizu nlukulu nakumelaga mpandoni wa Umwene niwongaga ira: <<Kaing'anani, va pa vande va Mulugu, vevo vanafuna liye kalaga na atu. Tchoira Mulugu unakalege na aliwa eto aliwa anokala atwaye. Eto mwinnyiwene Mulugu unakalege na aliwa eto liye unokala Mulugu wewa.

⁴ Eto Mulugu unopuputa misodi datene nnafwanyeya mmentoni mwewa. Kuza ukala ukwa, nne nla, nne kumbanya, nne ona jopa, mwasiwa jatene ja wanle jihivira.>>

⁵ Evale wenno agaratile vampandoni va Umwene ule ohowonga ira: <<Kaing'anani. Miyo nnosakanya jatene jixa.>> Eto ohodiwandela ira: <<Ulrembe jinawonga miyo ji mwasiwa ti jengo jororomeleya eto ja ibaribari.>>

⁶ Ohodiwandelave eraga: <<Jihimala kwakwanela. Miyo vano dili <A> eto dili <Ze>. Miyo dili maromelo. Eto dili magomelo. Atu anno anafwanyeyana ntona, miyo nnoavaha vasayi mahindje a ingumi a isime yowenda.

⁷ Mutu wenne unagondjihe, unowatchela jatene eji eto miyo nnokala Mulugu waye eto liye unokala mwanaga.

⁸ <<Mbwenye aliba ova atene, atu ohororomela, atu otakala, apanga, atu oraruwa, ale analowa, aliba hara amilugu, na aliba nama atene, yotambilra yewa inaza ikale vokediwa ntiyani wewo unahinda munlo na mabwe onuka. Volowa ntiya neno ku wonga ukwa wanembinli.>>

⁹ Nomala enne, muwari mwa angelro atanu na ambinli anno kakutunle mabasiya matanu na menli mwali jabure jogomiheda, mungelro mmohi ohowonga na miyo ira: <<Kaza, nnafuna duonihe Namateliwa wenno unafuna kala mwana Nibila muhiyanaye.>>

¹⁰ Nomala enne, mungelrole ohoditukula muwari mwa Munemba, didowana vazulu va mwango mmohi olapa bure, liye dioniha sidadi yotchena Jeruzalemu, yenno yakumela wa Mulugu zulu, ititelaga mwilamboni ya vati.

¹¹ Sidadile mofwanyeya wareya wa Mulugu. Wareya wa sidadile wakala nnga jerimela wa nibwe nofuneyetchetcha nnaitaniwa jaspe eto notchena ngwilro nnga nibwe nofuneyetchetcha nnaitaniwa kiristali.

^12-13 Jeruzalemu muxa ule ohowerewerihiwa na muru mulukulu olapa, aganna milango kumi na minli. Ntchihi na wu milango miraru, ntchihi na wu milango miraru, ntchihi na wu milango miraru, ntchihi na wu milango miraru. Va kada mulango, vohokala mungelro mmohi. Eto va kada mulango voholrembiwa nzina nimohi na malogo kumi na menli a aIzarayeli.

¹⁴ Aliserisi wa muru wa sidadile amangiwe na mabwe kumi na menli. Kada nibwe voholrembiwa nzina nimohi muwari mwa mazina kumi na menli a anamarumiwa a mwana Nibila.

¹⁵ Eto mungelro wenne adionihaga sidadile ohokana yopimana yaye yasakanyiwe na oru ira apimena sidadile na milango diwa vamohi na muru awerewerile sidadile.

¹⁶ Sidadile yanna mamwendo mannayi kalaga nnga jinaira kaxa. Makalelo orambalala na makalelo olapa dowa zulu ali mamohive. Lapa uwa kuma vati dowa zulu ali kilometuru 2.200. Eto rambalala uwa ali kilometuru 2.200 mwakoka mwene.

¹⁷ Mungelrole eto ohopima indivala wa muru ule. Indivala uwa wali mameturu 65. Meturu apimana liye ali nnga meturu nnapimana hiyo tchineneva.

¹⁸ Muru awerewerile sidadile ali omangiwa na mabwe ofuneyetchetcha anaitaniwa jaspe. Eto sidadile yamangiwe na oru ohogumanihiwa na yengo imohiwa, agali oru otchena nnga viduru.

¹⁹ Aliserisi wa muru awerewerile sidadile ohokana mabwe ofuneyetchetcha oindjiva ohiyana-hiyana, anno kabandihiwevo. Voroma, kohokala mabwe ofuneyetchetcha anairiwa jaspe. Owelela, kohokala mabwe ofuneyetchetcha anairiwa safira; za mabwe ofuneyetchetcha anairiwa kalasedoniya; za mabwe ofuneyetchetcha anairiwa ejimeralda;

²⁰ za mabwe ofuneyetchetcha anairiwa saradoniyo; za mabwe ofuneyetchetcha anairiwa saridiyu; za mabwe ofuneyetchetcha anairiwa kirizolitu; za mabwe ofuneyetchetcha anairiwa berilu; za mabwe ofuneyetchetcha anairiwa topaziyu; za mabwe ofuneyetchetcha anairiwa kirizoparazu; za mabwe ofuneyetchetcha anairiwa jasintu; za mabwe ofuneyetchetcha anairiwa ametisata. Ku wonga mabwe a makalelo kumi na menli ohiyana-hiyana.

²¹ Misuwo da milango kumi na minli dile dasakanyiwe na mabwe kumi na menli a peresu yokwima. Ku wonga kada musuwo asakanyiwe na nibwe nimohi na peresu yokwima. Eto rampa nlukulu na sidadile nasakanyiwe na oru bahi agali oru ohogumanihiwa na yengo imohiwa eto rampa niwa nali nooneyela nnga viduru.

²² Musidadi mule miyo kadionnemo Nyumba ya Yehova, tchoira Nyumba ya Yehova unafwanyeya agali Nabwiya Mulugu, Mwinnya wa Kopolo Datene vamohi na mwana Nibila.

²³ Eto musidadi mule kamunafuneya wareya wa nzuwa, nne mwedi, tchoira undimuwa wa Mwinnya Mulugu unafwanyeya agali wareya wa sidadile eto mwana Nibila gunafwanyeya agali pantiwa.

²⁴ Atu a vilambo datene anerege wenda muwari mowareya wa sidadile eto amwene a mwilamboni anoza katukulege jorayela jiwa kadowegena musidadi mule.

²⁵ Eto misuwo da milango da sidadile kadiza difungeyaga mwasiwa musidadi mule kamuza mukalaga umahiyu. Ora yatenene inakalege ntanave.

²⁶ Atu a vilambo dohiyana-hiyana anerege zana jengo japama japama na jorayela kavolotchihege musidadi mule.

²⁷ Sidadi yenne kiza ivolowamo yengo yotakala nne kamuza muvolowa mutu wenno unerana jengo johofwanela, nari jonama. So mbwenye anafuna volowamo ba atu anne mazina ewa anafwanyeya kagalrembiwe muLivuru na Ingumi, neno nnafwanyeya nagali Livuru na mwana Nibila.