Jowandeliwa 20 - Mazu Otchena a Mulungu

Fungeliwa wa Satana yaka 1.000 vamohi no tonga wa Kiristu na atwaye

¹ Nomala enne, miyo dohomuona mungelro akumaga zulu, aganna mmandani mwaye kurenti mundimuwa na xavi na mulango wa muliha odiha ohokana magomelo.

² Vevale liye ohomuhinda daragawu, wenno unaitaniwa nyowa ya wanle nari Diyabo, nari Satana, liye mmanga ira akale omangiwene yaka 1.000.

³ Agammangile, ohonvokeda muliha odiha ohokana magomelo, liye fungawo, liye dinda na karimbu yaye ira Satana ahawande kuma dowa anyenga atu akoka, fiyeda yaka 1.000 dimale. Mbwenye yaka 1.000 damala, inofuneya ira Satanole atapuliwe tempu ya vang'onove.

⁴ Nomala enne, miyo dohoonaga mipando da umwene, mmipandoni mule mwagagaratile atu. Atwale kagaratile mmipandoni mule kohovahiwa utongi ira katonge. Nomala enne, miyo dohoonaga minemba da atu anno kagwadiwe makohi na mwasa owonga ibaribari zela Yesu vamohi no wonga mazu a Mulugu. Aliwa banno kahamutamalenle besta nne ikwamutu yosema yaye eto nne tchawatchenle sinale ya besta vakoveni nari mmandani mwiwa. Aliwa kohovenyihiwa mokwani, aliwa roma tonga na Kiristu fiyeda yaka 1.000.

⁵ Wu ku venyihiwa mokwani woroma. Mbwenye atu amohiwa, tchavenyile. Aliwa kohokalave okwene fiyeda yaka 1.000 dile mala.

⁶ Orelihiwa na otchena banno anavenya, venya woroma. Atu anno ukwa wanembinli kunna kopolo dowanda agondjiha. Mbwenye aliwa anaza kakale anamakuta a Mulugu na anamakuta a Kiristu eto anoza katonge na Kiristu yaka 1.000.

Goma wa Satana

⁷ Yaka 1.000 dile damala, Satana unoza akumihiwemo mukadeya mwafungeliwe liye.

⁸ Akuma unoza adowe aanyengege Gogi na Magogi, ku tapulela aanyengege atu atene anafwanyeya pandi dannayi dene da ilambo ya vati. Liye unoza aanyenge atu oindjiva nnga miseva da mutcherelani mwa bara, aagumanihe ira kadowe kawanege kondo.

⁹ Aliwa kagamanle gumana muwari moira kawane kondo, anoza kakume ilambo yotandeleya ya ilambo ya vati ira karindje nimburo neno nnafuna kala atu otchenihiwa a Mulugu, sidadi yoziveliwiwa. Mbwenye aliwa kahanairena yengo ili yatene, zulu unoza ukume munlo, aze aatolotche atene.

¹⁰ Eto Diyabo, wenno aanyengetcha atwale, unoza avokedeliwe ntiyani wa munlo vamohi na mabwe onuka, wewo wavokediwe besta na namafiyiheda onamole. Evale aliwa anoza kaonihiwege goyi wewule ora datene ntana na mahiyu fiyeda mukalakala watene wa sogolro.

Tongiwa wogomiheda wa atu atene

¹¹ Vevale dohoona mpando mundimuwa otchena wa Umwene eto dohomuona mundimuwa agaratilevo. Agamanle vioneyiha, ilambo ya vati na zulu wene johomutawa eto kavaoneyile nimburo ira jikalevo akoka.

¹² Evale miyo dohaonaga atu atene okwa, roma andimuwa nari atu a vaheno vene, kagaimenle vasogolro va mpando wa umwene. Evale dohaonaga malivuru kahuleyaga. Mmalivuruni mule moholrembiwa joira jatene ja atu. Kagahuliwe malivuru arandjale, nohooneya eto livuru nimohi niwa nahuliwe. Livuru neno nali Livuru na Ingumi. Vevale atu atene kakwile wanle kohotongiwa zela jolremba jalrembiwe mmalivuruni arandji mule. Kada mutu ohotongiwa molingana na mabasa ahinda liye.

¹³ Eto Bara yohakumiha atu okwa atene aakoyile liye. Eto Ukwa vamohi na Nimburo na Anokwa kohakumiha atu okwa atene kaakoyile atu. Evale kada mutu ohotongiwa molingana na mabasa ahinda liye.

¹⁴ Eto Ukwa vamohi na Nimburo na Anokwa jambinli jene johotatileliwa ntiya na munlo. Ntiya na munlo nne nnafwanyeya nagali ukwa wanembinli.

¹⁵ Evale mutu wenno nzina naye nahalrembiwe muLivuru na Ingumi nne, otukuliwa, liye tatileliwa ntiya na munlo.