Jowandeliwa 2 - Mazu Otchena a Mulungu

Mazu a Yesu para nikuru na atu omuroromela Yesu a sidadi ya Efezo

¹ Liye ohowongagave na miyo adilanyedaga ira: <<Umulrembele mungelro wa nikuru na atu omuroromela Yesu a Efezo mazu oira: <Wenno unna nyenyedi tanu na mbinli mmandani mwaye modjana, unawenda vari va jogoromeyavo panti tanu na mbinli jejo jisakanyiwe na oru, gudiwandenle mazwala. Liye unawonga ira:

² Miyo dihiiziwa jatene japama munaira nyo, dihiiziwa mabasa munalaba nyo, no vilela munaira nyo. Dihiiziwa ira nyo kamunaaziveliwa atu abure. Nyo eto munowanda axixa atu anne ananama kawongaga ira: <<Hiyo vano nili anamarumiwa>>, kahali. Eto nyo mwagaaxixile muhufiyeda aona ira aliwa ba anamarumiwa onama.

³ Dihiiziwa eto ira nyo muli oharahariwa na mwasa wa nzina naga, mbwenye munnave vilela eto kamunagoma.

⁴ <<So mbwenye ikala yengo imohi yohodizivela munairana nyo. Zivelana mwanna nyo voroma vene muhiya.

⁵ Inafwanela muumbuwele makalelo ozivelana mwanna nyo wanle ira muwande iziwa gwa mugwile nyo. Mutwaruwe, muwelele akoka zivelana mwanna nyo voroma. Mbwenye mwahatwaruwe, miyo nnoza wa nyo dikumihevo yogoromeyavo panti munna nyo.

⁶ <<Eto yengo imohiwa yapama munairana nyo tchoira munoida joira ja akuda Nikolawu, jejo na miyene nnaida miyo. Vo mbwenye muhusakanya pama.

⁷ Ule unna mabaru, avwe jejo Munemba unaawandela liye makuru a atu omuroromela Yesu. Mutu wenno unagondjihe, miyo nnonvaha ira adje Mutengo wa Ingumi wenno unafwanyeya ilambo ya ibaribari ya Mulugu zulu.> >>

Mazu a Yesu para nikuru na atu omuroromela Yesu a sidadi ya Ejimirina

⁸ Liye ohowongagave na miyo adilanyedaga ira: <<Umulrembele mungelro wa nikuru na atu omuroromela Yesu a Ejimirina mazu oira: <Wenno uli Oroma na Ogomiheda eto wenno akwile awelela kana ingumi, gudiwandenle mazwala. Liye unawonga ira:

⁹ Miyo dihiiziwa makatamiho malukulu munna nyo, no simela wenyu. Eto simela musimenle nyo, kamusimenle. Nyo muhurayela. Dihiona eto ira munnave luluvihiwa na anno anaviitana aJudewu eto kahali. Aliwa anafwanyeya kagali nyumba yofundjamo mazu ya Satana.

¹⁰ <<Tchineneva nyo munoonihiwa goyi. Kavuruwanani, Diyabo uli vakwikwi vene ira aze, autukuleni, auvokedeni nyo amohiwa mukadeya ira muxixiwe. Xixiwa wenyu unafuna ukale wa malambo kumi. Mbwenye kamukukumuwe, inafwanela mudiroromele miyo fiyeda mukwele nzina naga. Tchoira mwafiyeda kwela nzina naga, miyo nnouvahani tchapowa wa ingumi.

¹¹ Ule unna mabaru, avwe jejo Munemba unaawandela liye makuru a atu omuroromela Yesu. Mutu wenno unagondjihe, ukwa wanembinli kunanfwanya.> >>

Mazu a Yesu para nikuru na atu omuroromela Yesu a sidadi ya Perigamo

¹² Liye ohowongagave na miyo adilanyedaga ira: <<Umulrembele mungelro wa nikuru na atu omuroromela Yesu a Perigamo mazu oira: <Wenno unna supada noirwa wu na wu, nosayiheya pama, gudiwandenle mazwala.

¹³ Liye unawonga ira: Miyo dihiiziwa vinakala nyo. Dihiiziwa ira munakala vevo vili mpando wa umwene wa Satana. Mbwenye mulive ohideda nzina naga eto nne kamudirunile, masiki mwagaonneve piwa wa nfwinyu Antipaji, wenno afwanyeya agali mutu ororomeleya odihidedela umboni, wenno upiwele nzina naga wewo unakala Satana munafwanyeya nyo.

¹⁴ <<So mbwenye jikala jengo johodizivela munairana nyo. Yengo yoroma tchi ila. Muwari mwa nyo kohokalamo amohiwa anafundjihave jengo johokala pama nnga jaira mulombwana Balawu. Liye anfundjiha mulombwana Balaki makalelo ira awande ategiha Ana Izarayeli. Ategiha uwa, Balawu amuwandenle Balaki ira adowe aawandelege aIzarayeli ira kadjege jengo jopeliwa vikwamutu josema eto ira kararuwege.

¹⁵ <<Yabure imohiwa tchoira muwari mwa nyo kohokalamo atu ohara jofundjiha johokala pama ja akuda Nikolawu.

¹⁶ Nona inafwanela mutwaruwe. Tchoira mwahatwaruwe, mwakalelave irana ejo, miyo nnoza tchineneva diwane kondo na atu anne anairana jejo, daakase na supada neno nnafwanyeya wanoni waga.

¹⁷ <<Ule unna mabaru, avwe jejo Munemba unaawandela liye makuru a atu omuroromela Yesu. Mutu wenno unagondjihe, miyo vasogolro nnonvaha ira adje mana anno kakoyiwe, eto nnoza dinvahe mwana nibwe notchena vagalrembiwe nzina nixa, nzina neno nahaiziweyile na mutu mmohiwa. So unaiziwa gwenno unafuna vahiwa.> >>

Mazu a Yesu para nikuru na atu omuroromela Yesu a sidadi ya Tiyatira

¹⁸ <<Liye ohowongagave na miyo adilanyedaga ira: Umulrembele mungelro wa nikuru na atu omuroromela Yesu a Tiyatira mazu oira: <<Mwana Mulugu, wenno unna meswaye nnga nlumi na munlo eto unna manyalo aye nnga mukuwa ojerimela gudiwandenle mazwala.

¹⁹ Liye unawonga ira: Miyo dihiiziwa ira muli atu owanda irana jengo japama, muli atu owanda aziveliwa afwinyu, muli atu a nroromelo, muli atu okamihedana, muli atu owanda vilela muwari mwa makatamiho. Eto dihiiziwa ira joira jenyu, ti joira japama kwaranya joira japama mwaira nyo mundulri.

²⁰ <<So mbwenye ikala yengo imohi yohodizivela munairana nyo. Nyo munorumela joira jinafuna Jezabeli, muhiyana wenno unawonga ira: <Miyo dili namafiyiheda>, wenno unafundjiha jengo jabure eto hiya fundjihave bahi unaanyenga anamalabaga ira kararuwege eto kadjege vinyama dipeliwe vikwamutu josema.

²¹ Miyo dohonvaha tempu ira awande twaruwa zela joraruwa jaye, mbwenye liye kanafuna twaruwa.

²² Kaing'anani, miyo nnafuna dimbulelihe, akale ogonantene vakamani vaye. Eto na atu anne anamurarutchetcha kahafune twaruwa nnoaoniha makatamiho madjindji.

²³ Eto nnoatukula ahima a muhiyanole, daape ira makuru matene a atu omuroromela Yesu kaiziwe ira miyo vano dili wenno unaiziwa joumbuwela ja mutu vamohi na jofuna ja mmirimani mwaye eto miyo gunamutambilriha kada mutu zela joira jaye.

²⁴ <<Mbwenye zela nyo atu omuroromela Yesu amohiwa a Tiyatira, nyo mwahanarumela jofundjiha ja Jezabeli, jofundjiha jejo jinaitana atu keraga: <Jengo jilukulu jokoyeya ja Satana>, zela wa nyo kannaukatamihani na mazu mamohiwa, nari.

²⁵ So mbwenye nnouwandelani ira muhidede pama inna nyo fiyeda za waga.

^26-27 <<Mutu wenno unagondjihe eto airagana jofuna jaga fiyeda makutulo, miyo nnonvaha utongi Baba udivahile liye. Utongi wewo ku atonga atu a maziza matene mofuna mwaye na makalelo nnga mutu unatukula liye ikumbuzo ya momba, aroma twana jombwe jikalaga mapalive.

²⁸ Eto nnonvaha nyenyedi ineriwa Nikoroxo.

²⁹ Ule unna mabaru, avwe jejo Munemba unaawandela liye makuru a atu omuroromela Yesu.> >>