Jowandeliwa 19 - Mazu Otchena a Mulungu

Hagalala wa atu kafwanyeya zulu

¹ Nomala enne, miyo dohovwaga nizu nakumelaga zulu, kalaga nnga mazu a anamwindji, keraga: <<Aleluya! Vulusa no titimihiwa vamohi na undimuwa watene mwinnya gu Nabwiya Mulugu wehu.

² Mulugu atamaleliwe, mwasiwa jotonga jaye ti jotonga ja ibaribari, jokwakwanela. Tchoira liye guwandile mutonga puta mundimuwa wenno anongile ilambo ya vati muwari moraruwa waye. Mulugu uhumuweliheda kunyakunya zela sangiri na anamalabaye natatinle liye.>>

³ Anamwindjale kagawongile eno, kohowelela wonga akoka keraga: <<Aleluya! Munlo utumeyiwena putole, utchiwa unerege gwela zulu kala no kala.>>

⁴ Eto andimuwa 24 na vinyama nnayi da ingumi dile, kohokokoraga, kaoramihedaga kove diwa vati, aliwa mutamalelaga Mulugu wenno agaratile vazulu va mpando wa umwene keraga: <<Ame! Aleluya!>>

⁵ Nomala eno, dohovwa nizu nimohi nikumelaga mpandoni wa Umwene wa Mulugu niiraga: <<Nyo anamalaba atene a Mulugu, nyo atu atene omuova Mulugu, andimuwa nari atu a vaheno vene, nyo atenene inafwanela mmutamalelege Mulugu.>>

Matelo a mwana Nibila

⁶ Nomala enne, miyo dohovwa nizu nnga na anamwindji adjindji, kalaga nnga vweya wa mahindje katamangaga vapalroni eto kalaga nnga guza wa ndari ilukulu. Nizu nne nakuwaga niiraga: <<Aleluya! Tchoira Nabwiya, Mulugu wehu, Mwinnya wa Kopolo Datene gunatonga.

⁷ Nihagalaleni, niteyeleni eto nimutitimiheni Mulugu mwasiwa tempu ya matelo a mwana Nibila ihimala fiya. Namateliwa wenno mwana Nibila unafuna liye mutela, umala visakanyeda.

⁸ Liye uhumala vahiwa jowara josakanyiwa na usalru wapama, jojerimela eto jotchena ira aware.>> Usalru wapama tapulela joira japama ja atu otchenihiwa.

⁹ Nomala enne, mungelrole ohowonga na miyo ira: <<Ulrembe jinafuna miyo wonga ji: <Orelihiwa ba atu anne anaitaniwa ira kaze kadje pwando ya matelo a mwana Nibila.> >> Nomala enne, mungelrole ohowongagave, liye ira: <<Mazu duwandenle miyo ala ba mazu a ibaribari a Mulugu.>>

¹⁰ Mwa enne miyo dohogwelaga vamanyaloni vaye ira dimutamalele, mbwenye liye ohodihiyiha, liye kwi: <<Nari, ejo kwirena! Mwasiwa miyo dili namalaba wa Mulugu unahidedela umboni wa Yesu nnga weyo na abalawo atene anafwanyeya kagalive olimbene muwari momuhidedela Yesu umboni. Mbwenye yapamiwa, umutamalelege Mulugu bahi. Mwasiwa unanivaha kopolo dofiyiheda ibaribari zela Yesu gu Munemba wa Mulugu. Kahi miyo.>>

Za wa Yesu agagwenle kavalo yotchena

¹¹ Nomala eno, miyo dohoona zulu wagahuleyile. Evale dagaing'anne, dohoonaga kavalo yotchena. Vazulu va kavalo vale, vohogaratigi mutu, wenno unaitaniwa Ororomeleya na Ibaribari. Liye gu mutu otonga na makalelo apama eto gu mutu owana kondo na makalelo apama.

¹² Liye meswaye kali nnga nlumi na munlo. Vamuru vaye vohokala atchapowa ang'onong'ono adjindjene. Eto ohokana nzina nalrembiwe liye. Mbwenye nzina nne kalivo mutu mmohiwa aiziwile. So liye mwinnya bahi gwaiziwile.

¹³ Eto liye awarilege kapa yenno yabwinihiwe musangirini. Nzina naye aitaniwa Mazu a Mulugu.

¹⁴ Liye azaga ohokana makuru a anyakondo kamuhara kuma zulu, kagawarile jowara japama josakanyiwa na usalru wapama, jotchena eto jahanna yotakala. Aliwa kafwanyeya kagagwenle kavalo yotchena.

¹⁵ Wanoni waye wokuma supada noirwa, neno nalaba ira awande gondjihana vilambo datene. Liye unoza aatongege atene na ikumbuzo yaye ya momba eto unoza anyingalelege uva nimburo neno nnanyingaleliwetcha uva ira akume vinyu. Nyingalela uwa uva ku tapulela uwali vamohi no takaleliwa ulukulu wa Mulugu, Mwinnya wa Kopolo Datene.

¹⁶ Vakapani vaye na vatambalani vaye vihilrembiwa nzina noira: Mwene wa amwene na Nabwiya wa anabwiya.

¹⁷ Nomala enne, miyo dohomuona mungelro aimenle vanzuwani, awongaga na mazu okuwa aitanaga mbalrame datene davava zulu eraga: <<Kazani uno, kagumanelani muze uno ira mudje pwando indimuwa ya Mulugu.

¹⁸ Muze ira mudje mitembo da amwene, na andimuwa a anyakondo, na atu a kopolo. Muze mudje nyama da kavalo vamohi na mitembo da aliba wendiha kavalo vamohi na mitembo da atu atene roma azari, ahali azari, andimuwa nari atu a vaheno vene.>>

¹⁹ Nomala enne, miyo dohoona besta na amwene a ilambo ya vati na anyakondo ewa, kagumanne ira kawane kondo na mundimuwa afwanyeya vazulu va kavalo yotchena, na anyakondo aye kamuhara.

²⁰ Evale besta ule ohindiwa vamohi na nfwaye wenno unafwanyeya agali namafiyiheda onama wenno awenda na bestole, airagana jionihedo, aanyengaga atu atenene kawatchenle sinale ya besta eto kakokorela ikwamutu yosema. Ambinlene kohindiwa, aliwa vokediwa mesove ntiya na munlo wewule unaja mabwe onuka.

²¹ Eto anyakondo ewa atene kohomala kakateya na supada nakumenle vamulomoni va mundimuwa agaratile vazulu va kavalo yotchena vale. Evale mbalrame datene dohoroma dja mitembo da atu kakakateyile ale, fiyeda mbalrame dile rumbala, aliwa waheyana.