Jowandeliwa 18 - Mazu Otchena a Mulungu

Gwa wa sidadi ya Babiloniya

¹ Nomala enne, dohomuona mungelro mmohiwa atitaga, akumelaga zulu, aganna utongi undimuwa eto aganna wareya wohokala wa masika, fiyeda moneyaga mwilamboni mwatene.

² Mungelrole ohokuwaga molimbiha eraga: <<Ihimala gwa, ihimala gwa sidadi indimuwa ya Babiloniya. Peno ti nimburo munakala minemba dabure na minemba datene dotakala, na mbalrame datene dotakala nari vinyama dabure datene dotakala dohofwanelela.

³ Babiloniya eni uhumala gwa tchoira atu a vilambo datene kohomala ng'wa vinyu wa uwali zela moraruwa mwaye. Amwene a ilambo ya vati keretcha murarutcha. Eto aliba malronda a mwilamboni kohomala rayela na mwasa wa kobiri didjindji daavahetcha liye agulaga jengo jofuneyetchetcha ira ajingarigina.>>

⁴ Nomala eno, miyo dohovwa nizu nimohi niwa nokumela zulu niwongaga ira: <<Nyo atwaga muli musidadi mo, inafwanela mukumemo, tawiha ira munaze mulande jotega jinaira atu mwemo. Mukumemo ira mwahatongiwe na jabure jowopiha jinafuna azela emo.

⁵ Mwasiwa jotega ja sidadiyo akala ha kamba ihifiya zulu. Eto Mulugu uhuumbuwela joviringaniha jatene ja sidadiyo ira atonge.>>

⁶ Nizu nakumelaga zulu nne nohowongagave ira: <<Kawelihedani kunyakunya sidadi ila na makalelo mamohive nnga veretcha liye. Eto mmuwelihede fendo mbinli jatene juireleni liye. Kopo yaupimenlenani liye vinyu owawa, na nyenne mmupimelena fendo mbinli.

⁷ Mmuonihe goyi indimuwa, na upa wohokala wa masika molingana no indjiva ovitetela waye eto no indjiva wo jingari waye. Tchoira liye unovititimiha mmirimani mwaye ira: <Miyo dili mwene. Miyo kadili makwele nne kadiza dinla.>

⁸ Na mwasa wenno, liye jabure jatene eji jinoza jinfwanye mwa ora imohive: ukwa, kumbanya, ndala, vamohi no tumeyiwa na munlo. Mwasiwa Nabwiya Mulugu unafuna mutonga gu Mulugu wa kopolo.>>

⁹ Era eno amwene atenene a ilambo ya vati anno kararuwetcha na liye eto kajingaretcha na liye, aliwa kaza kamuona liye ajaga, akumaga utchi pwe pwe pwe, anoza katomole kuto, kamunlelaga.

¹⁰ Aliwa anoza kakale volapela vene na liye muwari moova upa unna liye, kamunlelege keraga: <<Udilu, udilu wa we Babiloniya, sidadi indimuwa eto ya kopolo. Kaing'ana, mwa ora imohive uhumala tongiwa.>>

¹¹ Eto aliba malronda a ilambo ya vati anoza katomole kuto, kanle na mwasa wa liye. Mwasiwa, vatongiwe liye, kalivo mutu unafuna atu mugulihedaga joguliha jiwa,

¹² jejo jinafwanyeya jagali joguliha ja oru, parata, mabwe ofuneyetchetcha, jengo jofuneyetchetcha, nguwo dapama, nguwo dokwima da usalru wapama wa kore ya musuzu wa bwanda, nguwo doriyetchetcha, nguwo dofila dagali doumbuwela, vimiri johiyana hiyana jonukela pama, jengo jili jatene josemiwa na manyanga a tembo, jengo johiyana hiyana jisakanyiwe na jengo ja peresu yokwima nnga matabwa apama, mukuwa, momba, mabwe apama anaitaniwa marimore,

¹³ jengo jonukela pama nnga kanela na jimohi jiwa, jengo jonukela jinatumeya atu, na maperefume, na mira na jimohi jiwa, vinyu, makura, utu wapama, tirigu, ng'ombe, mabila, kavalo, aaterelado, azari, nari maningo a atu na minemba diwa dene.

¹⁴ Aliba malronda ale anoza kawonge na liye keraga: <<Misapo dapama daziveliwa we na jofuneyetchetcha jatene na jorayela jatene jaziveliwa we jihimala utawa. Kuza ukana akoka.>>

¹⁵ Aliba malronda atenene karayenle muwari momuguliheda jengo jiwa, kamuona, anoza kaimele olapela wene muwari moova upa unna liye, kanlaga, keraga:

¹⁶ <<Udilu, udilu zela sidadi indimuwa ile, yenno yawaretcha nguwo dosakanyiwa na usalru wapama, na jengo ja peresu dokwima, jengo josakanyiwa na usalru wa kore ya musuzu wa bwanda vamohi na jofila jagali eto joumbuwela. Liye owaretcha jengo ja oru, mabwe ofuneyetchetcha na jengo jofuneyetchetcha.

¹⁷ Ja tangaranga, mwasiwa ora imohive rayela waye watene uhumala tolowa.>> Eto andimuwa atene osogolrelra mwadeya na atu owenda na mwadeya na ale anawendiha mwadeya na aliba sakanya malronda mwiko atene, kaza kaona sidadile ijaga, ikumaga utchi pwe pwe pwe, anoza kaimele olapela wene

¹⁸ kawongaga keraga: <<Kodi sidadi tchivi yaulukunle nnga sidadi yenne?>>

¹⁹ Aliwa anerege vikutulela teya mmuruni mwewa, kanlaga, katomolaga kuto keraga: <<Udilu! Udilu zela sidadi indimuwa ile. Tchoira atene okana mwadeya bara kawanda rayela muwari mwa jorayela janna sidadile. Ja tangaranga, mwasiwa ora imohive ihimala tolotchiwa.

²⁰ <<Nyo atu a ilambo ya zulu hagalalani. Nyo atu atene otchenihiwa, anamarumiwa nari anamafiyiheda muhagalale. Tchoira Mulugu umala itonga sidadile zela jabure jatene jene jauireleni liye.>>

²¹ Nomala enne, ohokala mungelro mmohi wa kopolo, atukunle nibwe nolingana na ntchilo nlukulu, liye tatilela mbara eraga: <<We Babiloniya, sidadi indimuwa, na makalelo amohive nnga nibwe nne niririyenle atu vati, nahawelelaga oneya akoka, na wenne unoza uvokediwe vati, utolotchiwe ira wahaoneye akoka.

²² Muwari mwa weyo kamuza muvweyaga aliba imba arpa, nne aliba imba nyumbo, nne aliba imba mafalauta, nne aliba imba palraza. Muwari mwa weyo kamuza muvweyaga amesilri ali atene ogogoda, nne kamuza muvweyaga kuwa wa mwisi mutu atibulaga.

²³ Nne mwa weyo kamuza mukala wareya wa panti, nne kamuza mukala nizu na namateliwa nari na muteli. Mwa weyo jatene ejo kajiza jikalamo. Weyo unomala tolotchiwa na mwasa oira aliba malronda awo atene kali andimuwa a ilambo ya vati osogolrelra malronda abure. Weyo eto weretcha alowa atu atene ira kanyengiwege.

²⁴ Eto muwari mwa weyo muhufwanyeya sangiri na anamafiyiheda, sangiri na atu otchenihiwa, vamohi na sangiri na atu atene anne waapile we mwilamboni ya vati.>>