Jowandeliwa 17 - Mazu Otchena a Mulungu

Tongiwa wa sidadi ya Babiloniya, puta wa amwene atene

¹ Nomala enne, ohozaga mungelro mmohi wenno akumenle muwari mwa angelro atanu na ambinli kanna mabasiya matanu na menli ale, liye za wonga na miyo ira: <<Kaza uno. Nnafuna duonihe matongiwelo anafuna tongiwa puta wenno ugaratile vazulu va mahindje madjindji,

² wenno araruwa na amwene a ilambo ya vati. Eto wenno aalrezelrihile atu anakala mwilamboni ya vati na vinyu wa uputa waye.>>

³ Nomala enne, mungelrole ohoditukula muwari mwa Munemba, liye didowana isalesale imohi eni. Dagadowile wewule dohomuona muhiyana agaratile vazulu va besta. Bestole ali ofila agali oumbuwela eto anna miru mitanu na minli na manyanga kumi. Eto ohozaleliwa mazina madjindji omululuviha Mulugu, kalrembiwe maningo aye matene.

⁴ Muhiyana agaratile vazulu va besta ule, awarile jowara ja usalru wapama wa kore ya musuzu wa bwanda vamohi na jofila jagali joumbuwela, ja peresu yokwima. Eto ohowara ja oru na mabwe ofuneyetchetcha na jengo jofuneyetchetcha. Muhiyanole mmandani mwaye ohokana kopo ya oru. Mukoponi mule mwazanle jengo jotakaletchetcha, johokala pama, jengo jotakala ja uputa waye.

⁵ Vakoveni vaye voholrembiwa nzina norutcha tapuleleya noira: Sidadi indimuwa ya Babiloniya, mma wa aputa na mma wa jotakaletchetcha jatene jinafwanyeya mwilamboni ya vati.

⁶ Miyo dimuing'anaga muhiyanole, damuonne ira liye afwanyeya agamanle lrezelra na sangiri na atu otchenihiwa, na sangiri na atu kapiwele nzina na Yesu. Evale dagamuonne muhiyanole, dohotikiniheya valukulu.

⁷ Muwari motikiniheya mule, mungelro wenne adioniha ejile ohodiwandelaga ira: <<Kodi weyo unatikiniheyela nni? Miyo nnafuna duwandelemo jengo jorutcha jinaona we ji. Nnafuna dumasulele zela tapulela wa muhiyanole na besta wenno unna miru mitanu na minli na manyanga kumi, vevo vigaratile muhiyanole.

⁸ Besta umuonile we ule, aliwo wanle. Mbwenye malambwala kanafwanyeya mwilamboni. Tchineneva bestole uli muliha odiha ohokana magomelo. Tchineneva eto unoza akume mmulihani odiha ohokana magomelo emo muli liye ira adowe atolotchiwe. Ora inafuna liye kuma mmulihani odiha ohokana magomelo mule, atu anno kahalrembiwe maziniwa muwari mwa Livuru na Ingumi romela mapanduwelo a ilambo, aliwa kaza kamuona bestole akoka, anoza katikinege kerege: <Bestola wanle ohokalawo. Nomala eno, liye dimela. Eto peno uwelela kalawo akoka.> >>

⁹ Mungelrole ohowongagave na miyo eraga: <<Va vinafuneya toto ira mutu awande tapulela jeji. Tchoira miru mitanu na minli da besta ule, nnatapulela mwango mitanu na minli wewo ugaratile muhiyanole.

¹⁰ Eto miru mitanu na minli dakoka dene nnatapulela amwene atanu na ambinli. Muwari mwa amwene atanu na ambinli ale, amwene atanu kohomala gwa, kiliwo. Eto mwene mmohi gwenno uliwo tempu ili hiyo ila. Mbwenye mwene mmohiwa kanaze. Liye aza, utongi waye kunasusa.

¹¹ <<Besta wenno aliwo eto wenno ahaliwo peno va, gu mwene mmohiwa wanetanu na taru unafuna za sogolro. Liye aza, unovenyiha umwene waye muwari mwa amwene atanu na ambinli oromale. Eto vasogolro besta ule aza, unagomela tolotchiwa.

¹² <<Manyanga kumi anno uonne we, tapulela amwene amohiwa kumi, kali kahanavahiwe kopolo dotonga. Mbwenye aliwa anaza kavahiwe umwene ira katonge vamohi na besta, ora imohi bahi.

¹³ Aliwa anoza kagumanele, kapangane yopangana imohive eto anoza katukule undimuwa wewa na utongi wewa kanvahede besta.

¹⁴ Aliwa anoza kawane kondo na mwana Nibila. Mbwenye mwana Nibila nnoza naagondjihe aliwa, tchoira mwana Nibila gu Nabwiya wa anabwiya atenene eto gu Mwene wa amwene atene. Eto mwana Nibila nnaza naagondjihe agali vamohi na atwaye oitaniwa, anno kasakulriwe, anafwanyeya kagali ororomeleya.>>

¹⁵ Mungelrole ohowongagave na miyo eraga: <<Mahindje uonne we, wewo ugaratile puta ule, inatapulela atu ohokala a masika, atu a malogo ohiyana-hiyana, anamwindji a atu, atu a vilambo didjindji na viwongelo dohiyana-hiyana.

¹⁶ Eto besta ule vamohi na manyanga kumi anno uonne we vamuru vaye, anoza kamurungunuwele puta ule, karome muida. Era eno anoza kamuwungule jowara jaye, kamutakune, johala jiwa kadowe kamale tumeya na munlo.

¹⁷ Ira kairege eno, Mulugu gunafuna avaha aliwa zelru dedo mmirimani mwewa ira kairena yenno inafuna Mulugu. Mulugu gunafuna avaha zelru doira kagumanele, kavwanane, katukule utongi wewa, kanvahe besta ule atongege ira mazu a Mulugu kawande kwakwanela muwari mwa aliwa.>>

¹⁸ Eto muhiyana wenno umuonile we, tapulela sidadi indimuwa yenno inaatonga amwene atene a ilambo ya vati.