Jowandeliwa 16 - Mazu Otchena a Mulungu

Angelro atanu na ambinli kohokutulela mwilamboni ya vati uwali wa Mulugu

¹ Nomala enne, miyo dohovwaga nizu nlukulu nakumelaga Nyumba ya Yehova inafwanyeya zulu, niwongaga na angelro atanu na ambinli ale ira: <<Mutukule mabasiya munafwanyeya uwali wa Mulugu ayo, mukutulele mwilamboni ya vati.>>

² Mwa enne mungelro oroma ohotukula basiya naye, liye kutulela mwilamboni ya vati. Agakutulenle mwilamboni ya vati, atu atene kalrembiwe na sinale ya besta eto anno katamalela ikwamutu yosema ya besta ile, atene kohomala kana vilonda dilukulu dowopiha dohokala da masika.

³ Nomala enne, mungelro wanembinli ohotukula basiya naye, liye dowa kutulela mbara. Mwa enne vohodibeliwa, mbara mwatene mohosanduwa kala sangiri nnga sangiri na mutu ukwile. Evale jengo jatene ja ingumi jafwanyeya mbara mule johomala kwa.

⁴ Nomala eno, mungelro waneraru, ohotukula basiya naye, liye dowa kutulela uwali wa Mulugu mmihindjeni na mmaisimeni mwatene. Evale mahindje matene kohosanduwa kala sangiri.

⁵ Jagaireyile enne dohonvwaga mungelro mmohi wenno unna utongi wa mahindje, awongaga eraga: <<Nyo Nabwiya mwaliwo wanle eto muliwo peno, munafwanyeya mwagali Otchena, munatonga mwa ibaribari tchoira nyo guzihile matongelo anna.

⁶ Mwasiwa malambo a mundulri atwala kohovuviha sangiri na atwinyu otchenihiwa, na sangiri na anamafiyiheda enyu. Peno eto nyo muhuwanda sandutcha mahindje kala sangiri ira apanga ala kang'wege. Na ibaribari aliwa anatambilra mofwanelela zela jejo jairile atu.>>

⁷ Nomala eno, miyo dohovwa nizu nimohi niwa nakumela vaibuwani vale, nirumelelaga mazwale ira: <<He, na ibaribari nyo Nabwiya Mulugu, Mwinnya wa Kopolo Datene, matongelo enyu ba matongelo a ibaribari eto ofwanela.>>

⁸ Evale mungelro wanennayi ohotukulaga basiya naye, liye tatilela vanzuwani ira nzuwa nne nikahege bure ira niwande awotcha atu na munlo okumela vanzuwani vale. Agatatilenle basiya naye vanzuwani vale, kaha wa nzuwa wohosimbwagave.

⁹ Mwa enne kaha wohokala wa masika ule wohoromaga awotcha atu. Mbwenye masiki atu kaonihiwagave goyi enne, kohokalelave jotega jiwa, aliwa wongaga jengo joluluviha nzina na Mulugu wenno unna kopolo doruma jowopiha jile. Aliwa tchatwaruwileve nne tchamutitimihile Mulugu.

¹⁰ Nomala eno, mungelro wanetanu ohotukula basiya naye, liye dowa kutulela vampandoni va umwene wa besta. Agakutulenle vampandoni vatonga besta vale, vampandoni vale vohoza isi yohokala ya masika, aliwa kunela umwene watene wa bestole. Mwa enne atu kohoromaga kana vilonda, onaga upa wohokala wa masika. Atwale kohoroma takunaga malumi ewa na mwasa wa upa waona atu.

¹¹ Eto atwale na mwasa wa upa waona atu ule, vamohi na vilonda dowopiha danna atu, kohoroma wonga mazu omululuviha Mulugu wa zulu. Tchafunne twaruwa zela jabure jaira atu.

¹² Nomala enne, mungelro wanetanu na mmohi ohotukula basiya naye, liye kutulela muhindje mundimuwa wa Eufarati. Agakutulenle mmuhindjeni mule, mahindje matene kafwanyeya emule kohoumma ira amwene anafuna kumela pandi ya makumelo wa nzuwa, kawande kana ndila yolambuwela.

¹³ Noira enne, miyo dohoonaga nnga ha minemba miraru dotakala daoneya nnga anyapule, dikumaga. Munemba mmohi akumelaga wanoni wa daragawu. Munemba mmohiwa akumelaga wanoni wa besta. Eto munemba mmohiwa akumelaga wanoni wa namafiyiheda onama.

¹⁴ Minemba dile ti minemba dabure dedo danna jionihedo jaira atu ira diwande dowa agumaniha amwene atene a mwilamboni ya vati ira kadowe kawane kondo. Kondo yenno inoza iwaniwe siku nindimuwa na Mulugu wa Kopolo Datene.

¹⁵ Yesu unawonga ira: <<Kavuruwanani! Miyo nnaza dize nnga mbava. Orelihiwa gu mutu wenno nnaza miyo dinfwanye agali orurumuwene, agawarile jowara jaye, tawiha ira unatamangege mandave, atu kamuonege.>>

¹⁶ Mwa enne minemba miraru dabure dile dohodowa agumaniha amwene atene nimburo nimohi eni nnaitaniwa Arimagedomi na iEberewu.

¹⁷ Nomala eno, mungelro wanetanu na mbinli, ohotukula basiya naye, liye kutulela zulu nipevoni wahanafwanyeya yengo. Noira enne, wohokala nizu nakumenlege Nyumba ya Yehova pandi wafwanyeya mpando wa umwene. Nizu nne nohowongaga ira: <<Jatene jene jihimala.>>

¹⁸ Mwa enne wohokalaga kukuma undimuwa, jerima, ndari vamohi na indarandara yohokala ya masika, ilambo ya vati aliwa roma inainaga. Mbwenye roma ilambo ya vati ipandutchiwile atu kinababihege kalawo indarandara indimuwa ya kopolo nnga yenno yaireyile fendo yenne.

¹⁹ Na mwasa wa indarandara ile sidadi indimuwa ya Babiloniya yohodurumuwa pandi taru. Eto sidadi da mwilamboni dohomalaga gwa. Mwa enne Mulugu ohoumbuwela zela sidadi indimuwa ya Babiloniya ira anvahe kopo ya vinyu wa goyi zela takaleliwa waye. Ku wonga Mulugu ohotonga Babiloniya na uwali waye.

²⁰ Vasuwa vili vatene vamohi na mwango datene johomalaga dimela, kwahafwanyeyaga.

²¹ Eto kohoza mabwe malukulu a maralaza, kumela zulu, onyemela wandamelana kilu 40, aliwa amorelaga atu. Evale atu kohoromaga wonga jengo jomululuviha Mulugu na mwasa wa maralaza ohokala a masika kamora ale. Tchoira jabure jeji, jali jabure jowopiha na makalelo ohokala a masika.