Jowandeliwa 15 - Mazu Otchena a Mulungu

Za wa angelro atanu na ambinli kaganna jowopiha tanu na mbinli

¹ Nomala enne, miyo dohoona zulu ionihedo imohiwa yotikiniha, yohokala ya masika. Daaonne angelro atanu na ambinli kaganna jabure jowopiha mayiji tanu na mbinli, jogomiheda. Kada mungelro yowopiha yaye yaye. Jowopiha janna atu jile jamala ireya, uwali wa Mulugu unagomela evo.

² Eto dohoona yengo yakala nnga ha bara indimuwa ya viduru, yagali yogumanihiwa na munlo. Eto atu oindjiva anno kawandile gondjiha muwari mwa besta, kahakokorele ikwamutu yosema yaye eto kahawatchenle numero neno natapulela nzina naye, aliwa kafwanyeya kagaimenle mutcherelani mwa bara ya viduru mule, kaganna mmandani mwewa arpa da Mulugu.

³ Aliwa koimbaga nyumbo ya Mozeji, muzari wa Mulugu, imohive yenno eto inafwanyeya yagali Nyumbo ya mwana Nibila, keraga: <<Nyo so Nabwiya Mulugu, Mwinnya wa Kopolo Datene, joira jenyu ti joira johokala ja masika eto jotikiniha. Nyo so Mwene wa vilambo datene, munairana jengo jatene jofwanela, ja ibaribari.

⁴ Bani ahanauoveni nyo Nabwiya eto bani ahanautitimiheni? Tchoira nyo bahi guli otchena. Malogo matene anoza kaukokorelegeni, kautamalelegeni, mwasiwa atu atene anoona joira jenyu japama.>>

⁵ Noira enne, miyo dagaing'anne, dohoona Nimburo Notchenetchetcha na Musasa wa Yehova zulu nagahuleyile.

⁶ Muwari mwa Nimburo Notchenetchetcha nne mohokuma angelro atanu na ambinli anno kanna jowopiha tanu na mbinli jile. Aliwa kakumile kagawarile jowara jotchena, jojerimela, josakanyiwa na usalru wapama eto kagawarile masintu a oru pandi ya mirimani wewa.

⁷ Eto mwanainyama mmohi wa ingumi muwari mwa anavinyama annayi ale, ohotukula mabasiya matanu na menli, mwagazanle uwali wa Mulugu wenno uliwo kala no kala, liye za agawelaga angelro atanu na ambinli ale.

⁸ Mwa enne Nimburo Notchenetchetcha nne mohozalaga utchi wa undimuwa wa Mulugu na kopolo daye. Kalivo mutu nne mmohi awandile volowamo fiyeda jowopiha tanu na mbinli janna angelro ale aliwa fiyeda mala.