Jowandeliwa 13 - Mazu Otchena a Mulungu

Za wa besta oroma

¹ Daragawule agaimenle vamisevani mutcherelani mwa bara mule, miyo eto dohomuonaga besta akumelaga mwiko, aganna manyanga kumi, na miru mitanu na minli. Eto kada muru ohokana mwana tchapowa vamuru vaye eto kada muru vazulu viwa voholrembiwa nzina nomululuviha Mulugu.

² Besta damuonne miyo ule ali olingana na nyarugwe eto manyalo aye kali nnga manyalo a urusu, mulomo waye ali nnga mulomo wa podogoma. Mwa enne daragawu ohonvaha besta ule kopolo, na mpando wa umwene anna liye, vamohi na undimuwa ulukulu waye.

³ Miyo dagamuing'anne besta ule muwari mwa miru mitanu na minli danna liye dile, muru mmohi akala nnga ohokana ilonda yokwana eto ilondiwa yafwanyeya yagavonle, oneyaga ndambave. Atu atene a mwilamboni ya vati kotikiniheya zela besta wenne, aliwa muharaga.

⁴ Aliwa eto kohomutamalela daragawule na mwasa onvaha besta ule utongi waye. Eto komutamalelaga besta ule keraga: <<Kodi bani unna kopolo nnga besta ula? Bani unawanda wana na liye?>>

⁵ Mwa enne besta ule ohovahiwa mulomo ira awandege wonga mazu ovitukulela na mazu omululuviha Mulugu. Eto ohovahiwa utongi ira awandege irana jatene ejile fiyeda medi 42.

⁶ Evale ohofugula mulomo avahiwe liye ule ira arome wonga mazu omululuviha Mulugu, atembelrelrege nzina na Mulugu na Nyumba yaye eto aatembelrelrege atene anakala ilambo ya zulu.

⁷ Eto ohovahiwa utongi ira arome wana kondo na atu otchenihiwa, afiyede agondjiha. Eto ohovahiwa utongi otonga malogo matene, atu a viwongelo datene, na atu a vilambo datene.

⁸ Atu atene a mwilamboni ya vati mwatene komutamalela. Atu anne aatonga liye, anne kamutamalela, ba atu anno kahalrembiwile mazina ewa muLivuru na Ingumi na Nibila, neno napiwe romela mapanduwelo a ilambo.

⁹ Ule unna mabaru, avwe mazwala.

¹⁰ Ule usakulriwe ira ahindiwe, unohindiwa. Ule usakulriwe ira apiwe na supada, unopiwa na supada. Jafiya eno, inafwanela atu otchenihiwa kakale ovilela eto kakale olimba mwa nroromelo.

Za wa besta owelela

¹¹ Nomala enne, besta oroma agaliwove, miyo dohomuona besta mmohiwa akumelelaga vati. Liye anna manyanga menli kalaga nnga manyanga a mwana nibila. Jowonga jaye jalingana na jowonga ja daragawu.

¹² Liye atonga na utongi watene wa besta oromole ira ora yakala atu vamohi, besta muxa ule awandege irana jionihedo jorumelela zela besta oroma ule ira ilambo ya vati vamohi na atu anafwanyeya mwilamboni ya vati kamutamalelege besta murandji wenno avulumuwile mwa ilonda yokwana yanna liye.

¹³ Muwari mwa jionihedo jairana liye, ante owanda ruma munlo, kumela zulu za mwilamboni ya vati atu atene kaonaga.

¹⁴ Muwari mwa jionihedo jairana liye agali vamohi na besta oromole, besta wanembinli ule ohowanda anyenga atu a mwilamboni ya vati, awandelaga ira kasakanye ikwamutu yosema ya besta wenno aporotchiwe na supada eto ahakwa.

¹⁵ Ikwamutu yosemele yagamanle sakanyiwa, besta wanembinli ule ohovahiwa kopolo ira awande ivaha ikwamutu yosema ile mwelra ovuma ira iwongege nnga mutu. Eto bestole ohovaha ikwamutu yosema ile kopolo ira mutu wenno ahanafuna itamalela, ikwamutu yosema ile iwandege wonga ira mutule apiwe.

¹⁶ Besta wanembinli ule unoakanyiheda atu atene, ahima na andimuwa, azari, ahali azari, atu orayela na atu osimela, nari mutu uli watene ira alrembiwe sinale. Sinale ile inaza ilrembiwe ndanda naye nodjana nari vakoveni.

¹⁷ Evale ule ahanalrembiwe na sinale ya besta ule, liye kanagulege yengo nne kanagulihege yengo. So mbwenye unafuna gulaga yengo nari guliha unakala mutu wenno unafuna kana sinale ile, inafwanyeya yagali nzina na besta ule nari numero na nzina naye.

¹⁸ Va vinafuneya toto. Mutu wenne uli wa toto inafwanela awande sakasaka iziwa numero na besta ule, tchoira ti numero na mutu. Numero niwa nnafwanyeya nagali 666.