Jowandeliwa 12 - Mazu Otchena a Mulungu

Za wa mwana muhiyana na daragawu

¹ Nomala enne, yohooneya ionihedo yotikiniha zulu. Ohokala muhiyana mmohi awarile nzuwa eto vati va manyalo aye vafwanyeya mwedi. Eto ohokana vamuru vaye tchapowa wa nyenyedi kumi na mbinli.

² Muhiyanole ohokana vambani. Mwa enne vambani vanna liye vale, tempwaye yoira abale yohonfiyelaga, liye roma kuwa na makalelo ohokala a masika na mwasa wa upa aona liye.

³ Noira eno, eto zulu yohozawo ionihedo imohiwa. Waoneyile mwanainyama eni owopiha ofila, unaitaniwa daragawu, aganna miru mitanu na minli na manyanga kumi. Kada muru ohokana mwana tchapowa vamuru vaye.

⁴ Eto liye ohorungunutcha mwila waye, dowa varetchana pandi yaneraru ya nyenyedi datene dali zulu, liye moriheda ilambo ya vati. Noira eno, daragawu ule ohodowa imela wandamelana vafwanyeya muhiyanole ira tempu inafuna liye bala, awande mutakuna mwanole.

⁵ Mwa enne muhiyanole ohombala mwanapongwe. Mwanole ali wenno afuna tonga vilambo datene na ikumbuzo yaye ya momba. Mwanole nobaliwa, ohovayela tukuliwa, dowiwana vamentoni va Mulugu eto vampandoni vaye va umwene.

⁶ Eto muhiyanole ohotawela muisalesaleni, dowa nimburo neno Mulugu asakannye liye ira muhiyanole akalevo fiyeda malambo 1.260 agalive nimburo neno aing'aneliwaga.

Satana ohovokediwa vati

⁷ Noira eno, ilambo ya zulu wohokala kondo ilukulu. Migeli vamohi na angelro aye aasogolrelra liye kohoroma wana na daragawu ule. Daragawule vamohi na angelro aye na aliwene kohoroma wana na nikuru na Migeli.

⁸ Mbwenye daragawu ule ohogondjihiwa na nikuru na angelro a Migeli. Mwa enne kohogondjihiwa, fiyeda ira zulu kwaali nimburo noira aliwa kakalewo.

⁹ Evale kohomutamangihawo zulu daragawu ule, wenno unafwanyeya agali nyowa ya wanle, unaitaniwa Diyabo nari Satana, wenno unaanyenga atu a ilambo yatene ya vati. Liye vamohi na angelro aye atene kohovokediwa mwilamboni ya vati.

¹⁰ Nomala enne, miyo dohovwa nizu nindimuwa nakumelaga zulu niwongaga niiraga: <<Peno mbwenye vulusa wa Mulugu, na kopolo daye, na Umwene wa Mulugu wehu vamohi na utongi wa Namatikeliwa waye, jihimala fiya. Tchoira maliba asumela abalihu, wenno unaasumeletcha awongaga jabure jiwa vamentoni va Mulugu wehu ntana na mahiyu, peno umala vokediwa vati.

¹¹ Abalihu kohomala mugondjiha muwari mwa sangiri na mwana Nibila eto muwari mwa mazu a ibaribari kalaleya atu. Aliwa eto koholramwisa ingumi yewa kavivelelaga fiyeda rumela kwa.

¹² Nona nyo zulu watene vamohi na atene munafwanyeya wewo, hagalalani. Mbwenye udilu zela wa nyo mwatene munafwanyeya mwilamboni ya vati vamohi na bara. Tchoira Diyabo vere liye atatileliwa mwilamboni ya vati, liye ukana uwali wohokala wa masika. Mwasiwa liye uiziwa ira: <Malambo aga kahanle vang'onove.> >>

¹³ Daragawule agaonne ira: <<Dihivokediwa mwilamboni ya vati>>, ohodowa roma nvendaga muhiyana ambanle mwanapongwe ule.

¹⁴ Eto muhiyanole ohovahiwa mapepelo menli nnga mapepelo a kakozi ira avave, atawe nyowele, adowe muisalesaleni nimburo neno Mulugu amusakanyele liye ira muhiyanole aing'aneliwe wewule yaka taru na meya.

¹⁵ Noira enne, nyowele yagaonne ira: <<Muhiyanole uditawa>>, yohula wanoni waye, kumiha mahindje nnga muhindje ompumbula ira kadowe kamulrowihe muhiyanole.

¹⁶ Mbwenye mahindjale kazaga wa muhiyanole, teya yohozaga hula wanoni, mida muhindje watene wenne awumunle daragawu ule wanoni waye.

¹⁷ Daragawule agaonne ira mahindjale tchanfwannye muhiyanole, ohokana rayiva nlukulu zela muhiyanole. Mwa enne liye ohodowa ira awane kondo na ahima amohiwa a muhiyanole, anno anahara malamulo a Mulugu eto anahara umboni wa Yesu. Liye oholupa ira adowe awane na anne.

¹⁸ Daragawule ohodowa imela vamisevani tcherela ya bara.