Jowandeliwa 11 - Mazu Otchena a Mulungu

Za wa amboni ambinli

¹ Nomala enne, miyo dohovahiwa imiri eni yopimana, yolingana na ikumbuzo. Dohorumiwa ira: <<Udowe wapime Nyumba ya Mulugu, na ibuwa ili mwemo. Eto wamala, waakontari atu anafwanyeyamo anno anamutamalela Mulugu.

² Mbwenye pima uwa, kupime na ntando nene nili unde mwasiwa nihivahediwa atu a malogo a unde ira kanyingalele. Aliwa anomala yaka taru na medi mitanu na mmohi kanyingalelaga ntando no vamohi na sidadi yotchenihiwa.>>

³ <<Eto muwari mwa malambo anno miyo nnoaruma amboni aga ambinli eto nnoavaha kopolo ira kafiyihedege mazu aga mwilamboni. Aliwa anerege fiyiheda mazwaga kagawarile masakwi, fiyeda kamale malambo 1.260 anno anafunege atwale nyingalela ntando nne.>>

⁴ Anamafiyiheda ambinli ale ti mitengo minli da azeti vamohi na jogoromeyavo panti mbinli, jejo nnakala vamentoni va Nabwiya wenno unafwanyeya agali mwinnya wa ilambo yatene.

⁵ Aliwa karoma laba mabasiwa, mutu wenne unavende joairela yabure, aliwa anerege kumiha munlo wanoni wewa kaatolotchege amwidaniwa ale. Mutu uli watene unavende joairela yabure unakwege na makalelo anno.

⁶ Anamafiyiheda ambinli ale anovahiwa kopolo dofunga zulu ira muzongwe aharumbwe malambo matene analaba atu mabasiwa ofiyiheda ja Mulugu. Eto anovahiwa kopolo dosandutcha mahindje ira kakale sangiri. Eto anovahiwa kopolo ira kazihe mwilamboni jowopiha johokala ja masika johiyana hiyana, malringana na makalelo anafuna atu.

⁷ Mwa eno, aliwa kamala laba mabasiwa omuhidedela Mulugu umboni, mwanainyama owopiha, besta wenno unakumela muliha odiha ohokana magomelo, unoza arome wana na aliwa, afiyede agondjiha, aape.

⁸ Aliwa kakwa mitembo diwa nnokala gwembelre varampani va sidadi indimuwa ile, wewule wakomeliwe Nabwiya wewa vamuradini. Sidadi yenno mmusimboni inaitaniwa Sodoma owu hehi Ijipitu.

⁹ Anamafiyiheda ale kakwa enne, atu ohiyana-hiyana, na malogo ohiyana-hiyana, na atu a viwongelo dohiyana-hiyana, na atu a vilambo dohiyana-hiyana anerege ing'ana mitembo da anamafiyiheda ale dagali varampani evale, fiyeda malambo mararu na meya. Kiza eto karumeliha ira mitembo da anamafiyiheda ale dikoyiwe.

¹⁰ Mwa enne atu atene anakala mwilamboni ya vati anoza kakayena hagalala, karome dja pwando eto karome rumihedana mivaho oka oka muwari moziveliwa zela ukwa wa anamafiyiheda ambinli ale, voira aliwa koaonihetcha goyi ilukulu atu kakala ilambo ya vati.

¹¹ Mbwenye mamalelo wa malambo mararu na meya, Mulugu ohaweliheda anamafiyiheda ale yovuma yewa, aliwa roma vuma akoka. Mwa enne aliwa kohovenya na manyalo ewa, aliwa imela. Mwa enne atu atene kaonne zela venya wa anamafiyiheda ale, kohokagana ova ulukulu.

¹² Evale anamafiyiheda ale kohovwaga nizu nindimuwa nakumelaga zulu, niiraga: <<Kagwelani muze uno.>> Evale aliwa kohogwelaga kadowaga zulu muwari mwa murambo, amwidaniwa kaaing'anaga.

¹³ Ora imohive wohoza indarandara yohokala ya masika. Mwa enne pandi yanekumi ya sidadile yohogwa. Evale kohokwa atu 7.000 muwari mwa indarandara ile. Atu amohiwa kahanle kahakwa kohoromaga ova valukulu eto kohoroma mutitimiha Mulugu uli zulu.

¹⁴ Yowopiha yanembinli yawongiwa ihivira. Mbwenye muing'ane, yowopiha yaneraru inaza mohodibeliwa.

Imbiwa wa palraza yogomiheda

¹⁵ Nomala enne, mungelro wanetanu na mbinli ohoimba palraza yaye. Agaimbile, ilambo ya zulu wohovweya mazu mandimuwa keraga: <<Umwene wa Nabwiya wehu na Namatikeliwa waye uhumala gondjiha umwene wa ilambo ya vati. Liye uneregeve tonga ilambo yatene kala no kala.>>

¹⁶ Nomala eno, andimuwa 24 anno kagaratile mmipandoni mwa umwene vamentoni va Mulugu ale, kohooramihaga kove diwa vamentoni va Mulugu kafiyihaga vati, aliwa mutamalelaga Mulugu

¹⁷ keraga: <<Nyo Nabwiya Mulugu wa Kopolo Datene, mwaliwo wanle eto muliwove peno, hiyo nnoutamalelani na mwasa wa jinaira nyo. Tchoira muwari mwa kopolo dindimuwa munna nyo, peno muhuroma tonga.

¹⁸ Tchoira atu a vilambo didjindji tchafuna utamalelani, aliwa koutakaleliwani. Peno mbwenye ihifiya tempu ya uwali wenyu. Ihifiya tempu ira mwaatonge atu kakwile wanle eto mwaatambilrihe upama anamalabinyu anamafiyiheda, na atwinyu otchenihiwa vamohi na atu anno anaova nzina nenyu, roma ahima na andimuwa eto ihifiya tempu ira mwaatolotche atu anno anaatolotcha afwiwa mwilamboni.>>

¹⁹ Noira eno, Nyumba ya Mulugu inafwanyeya zulu yohuleya. Evale yohooneya Kaxa ya Yopangana ya Mulugu yafwanyeya emule. Noira enne, mohokalaga jerima, kukuma undimuwa, ndari, indarandara vamohi na maralaza madjindji.