Jowandeliwa 10 - Mazu Otchena a Mulungu

Za wa mungelro na mwana livuru

¹ Nomala eno, dohomuonaga mungelro mmohiwa wa kopolo akumelaga ilambo ya zulu azaga ilambo ya vati. Mungelrole ali muwari mwa murambo, kalaga nnga ere wara murambo ule. Eto vazulu va muru vaye vohokala muzirilimbo. Kove yaye yali yojerimela nnga nzuwa eto mendo daye dali nnga mambozo malukulu ohinda munlo.

² Mmandani mwaye ohideda mwana livuru nohuleya. Mungelrole ohotukula mwendo waye odjana, liye nyingaliha mbara, mwendo mmohiwa oromana, liye nyingala teya youmma.

³ Evale ohoroma wonga na mazu okuwa nnga podogoma anlaga. Agakuwile enne dohovweyaga ndari tanu na mbinli damurumelelege kuwa wakuwile liye.

⁴ Mwa enne ndari tanu na mbinli dile dagarumile, miyo dohofunaga joira dirome lremba jejo javwa miyo muwari mwa ndari dile, mbwenye zulu wohokumela nizu nawongilege, nidiwandelaga ira: <<Uhiye jejo jiwongile ndari dile ira jikale jokoyeya. Kulrembe!>>

⁵ Nomala enne, mungelro wenno ahenle nnyalo naye nimohi mwiko, nimohi niwa anyingaliha vateyani voumma, wenno damuonne miyo, ohovenyiheda zulu muwono waye odjana

^6-7 liye lumbela eraga: <<Wanle Mulugu ohawandela anamafiyiheda mabasaye okoyeya afuna liye za laba. Miyo nnolumbela na nzina na Mulugu wenno unazave akalagawo, wenno upandutchile zulu na jatene jilimo vamohi na ilambo ya vati na jatene jilimo na bara na jatene jilimo. Nnolumbela ira vohodibeliwa mungelro wanetanu na mbinli aimba palraza yaye, mabasa anno anomala kwakwanela.>>

⁸ Nomala enne, nizu nimohive nenne navwile miyo nidiwandelaga kumela zulu ira: <<Kulrembe>>, nohowongaga akoka kumela zulu, diwandela ira: <<Kadowa watukule livuru nohuleya neno nili mmandani mwa mungelro uimelihile mwendo mmohi mbara, mwendo mmohiwa vateyani voumma ule.>>

⁹ Mwa enne miyo dohodowaga mukwivela mungelrole, miyo nvepa livuru nne ira adivahe. Evale mungelrole ohodiwandela ira: <<Watukula livuru ni, udje. Wadja, nnotapilra nnga nuwi. Eto wamala dja, wamida, unokana inyungulela.>>

¹⁰ Evale miyo dohotukula mwana livuru nali mmandani mwa mungelro nne, miyo dja. Didjaga dohoona tapilra vanlumini vaga nnga nuwi eto dagamanle dja, dohoona inyungulela.

¹¹ Nomala enne, dohowandeliwaga ira: <<Weyo unofiyihedave akoka zela jinafuna aireyelaga atu a malogo madjindji, na atu a vilambo didjindji, na atu owonga viwongelo didjindji, na amwene oindjiva.>>