Jowandeliwa 1 - Mazu Otchena a Mulungu

Mazu oroma

¹ Ji ti jowandeliwa ja Yesu Kiristu jejo janvahile Mulugu ira adowe aaonihe anamalabaye zela jengo jinafuna ireya tchineneva. Mwa enne Yesu ohotukula mazwala, liye nvaheda mungelro waye ira aze amuonihe namalabaye Juwawu.

² Liye unalremba ibaribari zela jatene jionihiwe liye na mazu a Mulugu avwile liye na jengo Yesu Kiristu umuwandenle liye.

³ Orelihiwa gu mutu wenno unaileri eto na atu anne anavuruwana mazu kalrembiwe mulivuruni mu eto kairagana jejo jilrembiwe emu. Mwasiwa tempuwa ihiwandamela ira jatene jeji jiireye.

Malondjelo a Juwawu para makuru a atu omuroromela Yesu

^4-5 Unalremba gu miyo Juwawu. Nnoulrembelani nyo makuru matanu na menli a atu omuroromela Yesu munafwanyeya ilambo ya Aziya. Malondjelo anaurumihedani miyo ba ala. Sayi na murendele jokumela wa Mulugu wenno aliwo wanle eto uliwo na vanove eto unaza akalewo kala no kala jikale na nyo. Eto sayi na murendele jokumela wa Minemba mitanu na minli dedo nnakala vamentoni va mpando wa Umwene wa Mulugu jikale na nyo. Eto Yesu Kiristu wenno uli mboni wa ibaribari uwandile za awandela atu ibaribari eto unafwanyeya agali Mwana Murandji muwari mwa atu okwa eto unafwanyeya agali mundimuwa oatonga amwene a ilambo ya vati, sayi na murendele jokumela wa liye jikale na nyo. Nimutamalelege Yesu Kiristu wenno unaniziveliwa eto wenno uwandile nikutcha mwa jotega jehu muwari movuviha sangiri naye,

⁶ eto uwandile nitukula hiyo, nisakanyeda ira nikale anamakuta muUmweneni mwa Babaye Mulugu. Undimuwa unna liye, utongi unna liye udowegeve sogolro kala no kala. Ame!

⁷ Kaing'anani. Liye unoza aze akumelaga mmiramboni. Atu atene anoza kamuone na meso, masiki atu anne kamulatile. Malogo matene a ilambo ya vati kamuona azaga, anoza katomole kuto na mwasa wa liye. Na ibaribari jinoza jiireye. Ame!

⁸ Nabwiya Mulugu unawonga ira: <<Miyo dili <A>. Miyo dili <Ze>. Miyo dili wenno aliwo mundulri eto wenno uliwove peno eto wenno unafuna za kalagawove sogolro, Mwinnya wa Kopolo Datene.>>

Juwawu unawonga zela mutu wenno amuonne liye

⁹ Miyo mbalinyu Juwawu eto nfwinyu wa mmakatamihoni munafwanyeya nyo, nfwinyu omuroromela Yesu, nfwinyu wa muUmweneni mwa Mulugu, dafwanyeya vasuwa vinaitaniwa Patimu na mwasa olaleya Mazu a Mulugu eto na mwasa omuhidedela Yesu umboni.

¹⁰ Siku na Nabwiya nagafiyile, miyo dohotukuliwa muwari mwa Munemba Otchena, miyo roma vwa mundulri mwaga nizu nokuwa, kalaga nnga palraza

¹¹ niiraga: <<Ulrembe mulivuruni jatene jinaona we, urumihede makuru matanu na menli a atu omuroromela Yesu anafwanyeya Aziya. Waarumihede makuru anafwanyeya muwari mwa sidadi di: Efezo, Ejimirina, Perigamo, Tiyatira, Sardeji, Filadelifiya na Layodiseya.>>

¹² Dagavwile nizu nne, dohorungunuwa, miyo ing'ana mundulri ira dimuone mutu guvi awonga na miyo. Mwa enne dagarungunuwile, dohoona jogoromeyavo panti tanu na mbinli ja oru.

¹³ Vari va jogoromeyavo panti tanu na mbinli vale ohokala alivo nnga ha mutu, agawarile bata yolapa yafiya manyaloni. Eto pandi ya mirimani waye ohowaraga sintu na oru.

¹⁴ Murwaye na nsisi naye jali jotchena nnga ntondje eto nnga maralaza. Meswaye kakala nnga nlumi na munlo.

¹⁵ Manyalo aye kakala nnga mukuwa ojerimela, opiyiwa vaparani. Eto nizu naye navweya nnga kukuma wa mahindje madjindji.

¹⁶ Muwono waye odjana mmandani mwaye mohokala nyenyedi tanu na mbinli. Eto muwano mwaye mokuma supada nosayiheya pama, noirwa wu na wu. Eto kove yaye yali yojerimela nnga nzuwa naombaga mwa kopolo.

¹⁷ Mwa enne miyo dagamuonne, dohogwa vamanyaloni vaye kalaga nnga dere kwa. Mbwenye liye ohodihinda na ndanda naye nodjana, eraga: <<Kuove. Miyo vano dili Oroma eto dili Ogomiheda.

¹⁸ Miyo dili wenno unna ingumi. Dohokwa, mbwenye kaing'anani, dihikalawo eto nnerege kalawo kala no kala. Eto dihikana maxavi a Ukwa na maxavi a Nimburo na Anokwa.

¹⁹ Nona miyo nnouruma ira ulrembe jatene jene jionne we zela jejo jinaireya tchineneva vamohi na jengo jejo jinafuna za ireya sogolro.

²⁰ Zela tapulela wa jengo jokoyeya jionne we mmandani mwaga, nyenyedi tanu na mbinli vamohi na jogoromeyavo panti tanu na mbinli, nyenyedi tanu na mbinli ku wonga angelro a makuru matanu na menli a atu omuroromela Yesu unaalrembela we. Eto jogoromeyavo panti tanu na mbinli tapulela makuru matanu na menli a atu omuroromela Yesu.>>