Jonasi 3 - Mazu Otchena a Mulungu

Laleya wa Jonasi sidadi ya Ninive

¹ Noira eno, mazu a Yehova kohozaga wa Jonasi akoka fendo yanembinli kawongaga keraga:

² <<Venya udowe sidadi indimuwa ya Ninive, waalaleye atu zela muselu unafuna miyo duwandele.>>

³ Noira eno, Jonasi ohomaruwa adowaga Ninive nnga mwemo mwamuwandenle Yehova. Fwanyeya ira sidadi ya Ninive yali sidadi indimuwa yohokala ya masika. Mutu ira avire muwari mwa sidadi yatene na mendo, amala malambo mararu awendaga.

⁴ Jonasi ohovolowa sidadile, liye roma wenda ulrendo wa siku nimohi, alaleyaga eraga: <<Vamala malambo 40, Ninive unogudjuliwa.>>

Twaruwa wa akuda Ninive

⁵ Atu a Ninive kagavwile laleya wa Jonasi, kohomuroromela Mulugu. Mwa enne kohoroma wandelana keraga: <<Atu atene, andimuwa nari ang'onong'ono, inafwanela atene nikayena jeju eto niware masakwi.>>

⁶ Mwene wa Ninive na liyene agavwile ejile, ohotitaga vampandoni vaye va umwene, liye wungula bata yaye yawarile liye, liye wara sakwi. Liye dowa garati vandorani.

⁷ Noira eno, liye ohokumiha nlamulo noira: <<Mwene vamohi na andimuwaye atene anawonga ira nyo atu a Ninive, mutu uli watene kadje yengo. Masiki jifuwo jatene podi kala jilukulu nari jing'onong'ono kajidjihiwe. Eto nne kajing'wihiwe mahindje.

⁸ Atu nari anavinyama kawarege masakwi. Atene kakuwege wa Mulugu, na kopolo diwa datene dene. Kada mutu ahiye makalelo aye otakala na joairela afwaye ubure jinafwanyeya mmandani mwaye.

⁹ Kalekale Mulugu aniwendele tangaranga, ahaniirele yabure yenno yafuna liye niirela na uwali wozela takaleliwa waye ulukulu ira nahatolowe.>>

¹⁰ Evale Mulugu agaonne ejile jaira atu, na makalelo kahiyile atu makalelo otakala kanna atu, ohalevelela yabure yenno yafuna liye airela yawongile liye. Mwa enne kairilena.