Jonasi 2 - Mazu Otchena a Mulungu

Lobela wa mulombwana Jonasi

¹ Mwa enne Jonasi oholobela wa Yehova Mulugu waye agali mbani mwa sombele

² eraga: <<Dohomuitana Yehova mmakatamihoni mwaga. Noira eno, liye ohodiwakula. Dohokuwa dagali Nimburo na Anokwa. Noira eno, nyo mohovwa nizu naga.

³ Mwasiwa nyo mohodiponyeda modiha muwari mwa bara eto mahindje kohodirungunuwa. Mahindje enyu omanganyeya na mahindje enyu otamanga kohovira vazulu vaga.

⁴ Evale miyo dohoira: <Dihitamangihediwa olapela wene na nyo. Masiki eno nnoza diing'ane pandi ya Nyumba yenyu yotchena.>

⁵ <<Mahindje kohodirindja ira katimihe ingumi yaga. Mahindje odiha kohodirungunuwa. Mpinda wa mwiko ohopitikelrelra muru waga.

⁶ Miyo dohotitela vati vinakumela mwango. Dohotitela vati vati eto misuwo da magaradi a momba dohodifungela ira dikale wewo kala no kala. Mbwenye nyo Yehova Mulugu waga muhuvenyiha ingumi yaga mmasiyeni mwali miyo.

⁷ Ingumi yaga iditawaga, dohouumbuwelani nyo Yehova. Lobela waga wohofiya vamentoni venyu eto wohofiya muwari mwa Nyumba yenyu yotchena.

⁸ <<Ale analobela katamalelaga vikwamutu josema jengo johokana mabasa, atu anno anaukondani nyo Mulugu wa tangaranga.

⁹ Mbwenye miyo nnerege velela mukuto wa nyo muwari mwa mazu outamalelani. Jopangana japanganne miyo, nnokwakwaneliheda mwa ibaribari. Mwasiwa vulusiwa unakumela wa nyo Yehova.>>

¹⁰ Evale Yehova ohowonga na sombele, aliwa dowa muwumula Jonasi vateyani voumma.