Jenesesi 8 - Mazu Otchena a Mulungu

Vunguwa wa mahindje

¹ Mbwenye Mulugu kamudiwanle Nowe vamohi na vinyama ja mukokolani na jifuwo jejo jali na Nowe mmwadeyani mule. Mwa enne Mulugu ohowombiha nipevo ilambo yatene ya vati, mahindje roma welela.

² Mihindje dapunle mahindje okumela vati dohofungeya. Eto majanela a zulu kohofungeya eto muzongwe okumela zulu ohomiyala.

³ Mwa enne, mahindje mwilamboni kovunguwagave vang'ono vang'ono. Evale kakwakwanaga malambo 150, mahindje kohovunguwa pama.

⁴ Nagafiyile diya 17, mwedi wanetanu na mbinli, mwadeya ohodowa garati mwango da ilambo ya Ararati.

⁵ Evale mahindje kovunguwagave. Mbwenye nagafiyile siku noroma, mwedi wanekumi, mwango datene dohoromaga kumelela.

⁶ Vagamanle malambo mamohiwa 40, mulombwana Nowe ohulaga janela nasakanyile liye vamwadeyani vale.

⁷ Agahulile, ohomukumihedavo nakungu. Evale nakungule odowaga, liye welagawo, dowaga liye welagawo fiyeda mahindje welela.

⁸ Noira eno, mulombwana Nowe ohokumiha eto kangayiwa ira idowe yaone akala mahindje kohowelela vati.

⁹ Evale kangayiwa ile yagadowile, tchaonile voimela. Noira eno, yohowelela wa Nowe mmwadeyani mwakoka mwene mwasiwa ilambo yatene ya vati yalive yokuneleyene na mahindje. Evale Nowe ohotapula ndanda naye, liye watchela kangayiwa ile, ivolotchiha mmwadeyani akoka.

¹⁰ Evale liye ohodediha ante malambo amohiwa matanu na menli. Noira eno, ohoiruma kangayiwa akoka.

¹¹ Ora ya tchiguwo, kangayiwa ile yohozaga yagalumile ntakuru nititi na mutengo wa azeti, zana wa mulombwana Nowe. Noira enne, mulombwana Nowe ohoiziwa ira mahindje kohowelela mwilamboni ya vati.

¹² Evale liye ohodediha ante malambo amohiwa matanu na menli, noira eno ohoiruma kangayiwa akoka. Mbwenye fendo yenne kangayiwa ile tchawelile.

¹³ Mulombwana Nowe aganna yaka 601, mwedi oroma wa yaka eto siku noroma mahindje matenene kohowelela mwilamboni ya vati. Evale Nowe ohoparapasulaga zulu wa mwadeya, liye kumiheda unde muru waye, patamela mwilamboni. Agapatamenle, afwanyilege teya yagavuvurile.

Kuma wa Nowe mmwadeyani

¹⁴ Mwa enne kagakwakwanne malambo 27 a mwedi wanembinli, ilambo ya vati yatene yohoumma pama.

¹⁵ Evale Mulugu ohowonga na Nowe eraga:

¹⁶ <<Weyo podi kumamo mmwadeyani vamohi na muhiyanawo, ahimawo vamohi na ahiyaniwene.

¹⁷ Eto ukumihemo jatene ja ingumi jili mmwadeyani, vinyama datene, mbalrame, jifuwo, na jomburunuwa jatene jinamburunuwa vati ira jiwendawendege mwilamboni ya vati, jirelane, jizale mwilamboni ya vati.>>

¹⁸ Evale Nowe ohokuma na muhiyanaye, anaye vamohi na ahiyaniwene.

¹⁹ Eto vingumi datene dali mmwadeyani mule dohokuma, roma vinyama, jomburunuwa, na mbalrame datene nnafwanyeya mwilamboni dohokuma mmwadeyani mule milogo na milogo.

²⁰ Evale Nowe ohomanga ibuwa ya mukuto ira avelele mikuto wa Yehova. Muwari mwa vinyama datene dapama na mbalrame datene dapama, liye oholanda imohi, imohi, liye pa, avelelaga mukuto otumeya vazulu va ibuwa vale.

²¹ Mwa enne nukela wapama wa mukuto ule wohonfwanya Yehova. Evale Yehova ohoumbuwela mmirimani mwaye ira: <<Miyo dihiiziwa ira atu anafuna za baliwa anoza kakayena jofuna jiwa jotakala romana uhimani wewa. Mbwenye kuma peno eni kadiza diwelela akoka tembelrelra teya na mwasa wa atu eto kadiza diwelela tolotcha jatene ja ingumi na makalelo nnga virile miyo.

²² Kuma peno fiyeda mala wa ilambo ya vati, unerege oneya tempu yozala na tempu yohanda, viha no didila, tempu ya ilimwe na tempu yodidila, ntana na mahiyu. Jatene jeji jinerege dowave fiyeda mala wa ilambo ya vati.>>