Jenesesi 7 - Mazu Otchena a Mulungu

Mulugu ohomuwandela mulombwana Nowe ira avolowe mmwadeyani

¹ Nowe agamanle sakanyeda jatene, Yehova ohomuwandela, liye ira: <<Uvolowe mmwadeyani weyo na atu atene a vande vawo. Tchoira dihiona ira muwari mwa atu atene a tempu yenna, weyo uli wapama.

² Eto waavolotchihe anavinyama. Muwari moavolotchiha mule, anavinyama apama, utukule vinyama da alombwana tanu na mbinli na vinyama da ahiyana tanu na mbinli. Zela anavinyama otakala, utukule mwanainyama wa mulombwana mmohi na wa muhiyana mmohi.

³ Eto mwa mbalrame datene utukulege tanu na mbinli da alombwana, tanu na mbinli da ahiyana. Uirena eno ira uwande koya vinyama na mbalrame ira musogolro dikale mbewu mwilamboni ya vati.

⁴ Tchoira vavira malambo matanu na menli, miyo nnorumbwiha muzongwe mwilamboni ya vati ntana na mahiyu fiyeda malambo 40 muzongwe arumbwaga. Mwa eno, nnotimiha jengo jatene jene ja ingumi jipandutchile miyo.>>

Za wa mahindje madjindji

⁵ Mulombwana Nowe ohoirana jatene jene nnga mwemo Yehova mwamurumele liye.

⁶ Tempu yaza mahindje madjindji mwilamboni, Nowe anna yaka 600.

⁷ Evale Nowe ohovolowa mmwadeyani na muhiyanaye na ahimaye vamohi na ahimaye ale ahiyaniwa ira kahafwanyiwe mahindje madjindji anne kafuna za.

⁸ Zela wa anavinyama atenene apama na otakala, na mbalrame vamohi na jatene jomburunuwa,

⁹ johovolowa mbinli mbinli, mwanainyama wa mulombwana vamohi na mwanainyama wa muhiyana. Johovolowa vamohi na mulombwana Nowe mmwadeyani mule, nnga mwemo Mulugu mwamurumele liye Nowe.

¹⁰ Vagamanle malambo matanu na menli, mahindje madjindji kohoroma za mwilamboni ya vati.

¹¹ Tempu yenne mulombwana Nowe anna yaka 600. Kagakwakwanne malambo 17 a mwedi wanembinli, mihindje datene da mwilamboni dohoroma pula mahindje okumela vati eto zulu majanela matene a muzongwe kohomala huleya.

¹² Mwa enne mwilamboni ya vati mohokala muzongwe mudjindji fiyeda malambo 40, arumbwaga ntana na mahiyu.

¹³ Siku nenne naromile za mahindje, Nowe ohovolowa mmwadeyani na muhiyanaye, na anaye Semi, Kami na Jafeti vamohi na anaye ale ahiyaniwa araru.

¹⁴ Aliwa kohovolowa vamohi na vinyama da makalelo ohiyana-hiyana, roma vinyama da mukokolani vinyama da vande, na jomburunuwa, vamohi na mbalrame da makalelo ohiyana-hiyana dovava, dohovolowa mmwadeyani mule.

¹⁵ Eto jovuma jatene johovolowa mmwadeyani mule mbinli mbinli vamohi na Nowe.

¹⁶ Mwa ibaribari jatene jovuma johovolowa mbinli mbinli, mulombwana na muhiyana nnga Mulugu mwamurumele liye Nowe. Evale atene kagamanle volowa, Yehova ohafungela.

¹⁷ Muzongwe mudjindji ule amanle malambo 40 arumbwagave. Mwa enne mahindje kohozala mwilamboni ya vati fiyeda mwadeya ule venya, roma mbelruwa vazulu va mahindje.

¹⁸ Mahindjale kohozave eto koindjivagave mwilamboni ya vati. Mbwenye mwadeya ule afwanyeya vazulu va mahindje vale, mbelruwaga jaye.

¹⁹ Mahindjale kohofiyeda mwezo ogumana ilambo yatene fiyeda kunela mwango dilukulu datene dafwanyeya ilambo yatene ya vati.

²⁰ Mahindjale kagakunenle mwango datene, kohogwelave fiyeda aliwa kwaranya mwango dile mameturu matanu na menli.

Tolowa wa atu vamohi na jovuma jatene

²¹ Malambo anne dohokwa vinyama datene da mwilamboni ya vati, mbalrame, anavinyama a vande, na anavinyama a mukokolani vamohi na jatene jowenda ja mwilamboni ya vati. Kohokwa eto atu atene.

²² Mwa enne jengo jatene jokana mpunoni muwa mwelra ovumana jafwanyeya mwilamboni ya vati johokwa.

²³ Vingumi datene da mwilamboni Mulugu ohotimiha roma atu, vinyama, jomburunuwa vamohi na mbalrame dovava zulu. Jatene johotimihiwa mwilamboni ya vati. Nowe ekave gwavuluwile na ale kali na liye mmwadeyani mule.

²⁴ Evale vagamanle malambo 150 mahindje kohoroma vunguwa.