Jenesesi 6 - Mazu Otchena a Mulungu

Wendjedeya wa jotega mwilamboni

¹ Tempu yenne atu kaindjivihanaga mwilamboni, kohoroma abala ahima a ahiyana.

² Evale ana Mulugu a alombwana kagaaing'anile ahiyana anno kaabanle atwale, kohaona ira kali ahima obaleya. Evale aliwa kohodowa, aliwa asakulra anne kaafunne atu, aliwa atukula ira kakale ahiyaniwa.

³ Evale Yehova ohowonga eraga: <<Yovuma inavaha miyo, kinakalegeve mwa atu kala no kala. Tchoira aliwa joira jiwa jihimala viringana. Nona, malambo ewa mwilamboni anafuna kakale yaka 120.>>

⁴ Muwari mwa tempu yenne kohokalawo atu alukulu a kopolo kaitaniwa aNefili. Eto ahima a Mulugu ale kagaagonnena ahiyana ale, ahima kaabanle atu kali alukulu, a kopolo eto kali atu ovweya malambo anne.

Yehova ohokumbanya na mwasa ompandutcha mutu

⁵ Yehova ohoona ira: <<Jabure jinera atu jihisimbwa indjiva eto joumbuwela jiwa jinaumbuwela atu mmirimani mwiwa ti jotakala ora datene.>>

⁶ Mwa enne Yehova ohokumbanya ira: <<Dairele nni vale dimusakanyaga mutu, dimuhelaga mwilamboni ya vati?!>> Liye kukumuwaga mmirimani mwaye.

⁷ Yehova moona ejile, ohowonga ira: <<Nnoatolotcha atu atene daapandutchile miyo ira kahafwanyeye mwilamboni. Roma atu, dowa vinyama, na jomburunuwa jatene, na mbalrame datene nnavava zulu, mwasiwa dapandutchele miyo kadizi.>>

⁸ Mbwenye mulombwana Nowe ekave bahi gwafwanyile mahala vamentoni va Yehova.

Muselu wa mulombwana Nowe

⁹ Ula gu muselu wa mulombwana Nowe. Nowe bahi gwali mutu wapama eto owongowa muwari mwa atu atene a tempu yaye. Liye awendetcha na Mulugu.

¹⁰ Nowe aabanle anapongwe araru: Semi, Kami na Jafeti.

¹¹ Mwa tempu yenne ilambo yatene vamentoni va Mulugu yohomala viringana eto mohozala irelana ubure.

¹² Mwa enne Mulugu againg'anne jaireya mwilamboni ya vati ohoona ira ilambo yohomala nongeya. Tchoira mwa tempu yenne atu atene a mwilamboni ya vati makalelo ewa kohomala viringana.

Mulugu ohomuwandela mulombwana Nowe ira aseme mwadeya

¹³ Evale Mulugu ohomuwandela Nowe eraga: <<Miyo nnafuna daatolotche atu atene mwasiwa ilambo imala zala irelana ubure. Nona nnafuna daatolotche atu atene vamohi na ilambo ya vati yatene.

¹⁴ Weyo mbwenye uvisemele mwadeya mulukulu. Usakanye na matabwa apama a sipereste. Muwari mwa mwadeya ugawemo makwartu. Wagamanle sakanya, umare na alikataraya muwari na unde.

¹⁵ Mapimeluwa kakale eni. Molapela muwa upime mameturu 130. Rambalala uwa ukale mameturu 22. Regama uwa ukale mameturu 13.

¹⁶ Zulu uwa utomeyewo. Kuma vagomenle ntchihi ante fiya vanantopini, vikale meyu meturu. Mulanguwa uhele mmambalo mwa mwadeya. Eto muwari mwa mwadeya mule ugawemo mamburo mararu, otandanyedeya. Nimohi vati, nimohi niwa vari, nogomiheda vazulu.

¹⁷ Tchoira miyo nnoza dirume mahindje madjindji, kavuhelele ilambo yatene ira katolotche jovuma jatene jili mwilamboni. Jatene jene jinafwanyeya ilambo ya vati jinotolowa.

¹⁸ Mbwenye nnafuna disakanye yopangana yaga na weyo. Roma weyo, muhiyanawo, ahimawo, vamohi na ahimawo ahiyaniwa, munovolowa atene mmwadeyani.

^19-20 Eto weyo unovolotchiha mmwadeyani mule mulombwana mmohi na muhiyana mmohi muwari mwa jatene jokana ingumi. Kada yengo ya ingumi uvolotchihe mmwadeyani mule mulombwana mmohi na muhiyana mmohi, jivolowe vamohi na weyo ira jahakwe. Roma mbalrame ili yatene, dowa mwanainyama uli watene na jatene jomburunuwa vati, kada yengo ya ingumi jizege mbinli mbinli, mmohi wa mulombwana, mmohi wa muhiyana, uvolotchihe ira jikalewove.

²¹ Weyo unotukula eto jodja jatene jinadjiwa, uvolotchihe mmwadeyani mule, ukoye ira jikale jodja jawo na ja anavinyama ale.>>

²² Evale Nowe ohoirana jatene nnga mwamurumele Mulugu. Jatene jene oharihamo.