Jenesesi 50 - Mazu Otchena a Mulungu

Nleliwa wa Jako

¹ Jako agakwile, mwanaye Joze ohomukumbarela, anlaga, ambejarigi.

² Noira eno, Joze oharuma anamalabaye amediku ira kamuzolihe murombwe babaye ira ahavunde. Mwa enne anamalabaye ale anno kali amediku kohozagana mirombwe, aliwa muzoliha mulombwana Izarayeli ira ahavunde.

³ Mwa enne aliwa kohomala malambo 40 kamuzolihagave mirombwe, nnga molemelela mwa akuda Ijipitu, tchoira ayo ali malambo kamaletcha atu kamuzolihaga mutu mirombwe ira ahavunde. Eto akuda Ijipitu kohomunlela mulombwana Jako fiyeda malambo 70.

⁴ Malambo onla ale kagamanle, Joze ohowonga na anamalaba a mwene Farawu eraga: <<Akala munodifwewela murima, nnouvepani ira mudowe, mwamuwandele Farawu ira:

⁵ <Joze wirile: <<Babaga ahanakwe ohodilumbeliha ira didowe damukoye nifukweni neno natimbile liye ilambo ya Kana. Dera duvepeni so mwene ira mudihiye, didowe damukoye babaga. Damala nnowela.>> > >>

⁶ Farawu agavwile yovepa ya Joze, ohowakula eraga: <<Miyo kadinna makani. Venya udowe wamukoye babawo nnga mwemo mwaulumbelihile liye.>>

Koyiwa wa Jako

⁷ Mwa enne Joze ohomaruwaga ira adowe amukoye babaye. Adowaga, ohoveleliwaga na anamalaba atene a palasiyoni wa Farawu na andimuwa atene a vande va Farawu vamohi na andimuwa atene a Ijipitu.

⁸ Eto kohodowaga atu atene a vande va mulombwana Joze, vamohi na abalaye, na atu atene a vande va babaye Jako. So Gozeni ule kaahiyilewo ahima na mabila na ng'ombe bahi.

⁹ Eto ohoveleliwa na anyakondo owendiha aaterelado na ogwela kavalo. Atu kanvelenle tchali ang'ono.

¹⁰ Mwa enne aliwa kadowagave, kagafiyile nimburo nobubudavo jalo, pandi ya Atadi, ilambo inafwanyeya kombela ya muhindje Jordawu, kohotomola kuto kamunlelaga Jako na makalelo ohokala a masika. Evale Joze ohomalagavo malambo matanu na menli na atu atene, amunlelaga Jako.

¹¹ Mwa enne anamurala a ilambo ya Kana, kagaaonne aIjipitu ale kanlaga na makalelo ohokala a masika nimburo nobubudavo jalo na Atadi nne, kohowongaga keraga: <<Ii, akuda Ijipitu kohoiziwa nla.>> Mwa enne sidadile kohovaha nzina na Abeli-Mizirayimi, inatapulela ira: <<Nla wa akuda Ijipitu.>> Sidadi ya Abeli-Mizirayimi inafwanyeya kombela ya muhindje Jordawu.

¹² Mwa enne ahima a mulombwana Jako kohoirana nnga mwemo mwaawandenle liye.

¹³ Tchoira ahimaye kohomudowana ilambo ya Kana, aliwa mukoya nifukwe neno nafwanyeya mmindani mwa ilambo ya Makepela, makumelo wa nzuwa wa Mamere, nimburo neno Abarahamu agunle liye na Eforoni nkuda Eti ira kakale masiye ewa.

¹⁴ Joze agamanle mukoya babaye, ohowelela Ijipitu na abalaye atene, vamohi na atu atene kanvelenle ira kamukamihede mukoya babaye.

Joze ohalimbiha abalaye babiwa agakwile

¹⁵ Jako agakwile, Joze abalaye kohoroma umbuwela ira: <<Kaya Joze kinampa mbani zela jabure jamuirele hiyo malambo a mundulrimu? Kaza afunaga jonizuzumiha ira aniwelihede kunyakunya?>>

¹⁶ Mwa enne kohorumihaga milanyo na atu, aliwa ira: <<Mudowe, mwawonge na Joze ira baba ahanakwe ohowonga na hiyo ira namuwandele Joze,

¹⁷ niire: <Papa uwongile ira waalevelele abalawo yabure yenno yauirele atu.> Mwa eno, hiyo anamalaba a Mulugu mmohive ali Mulugu wa babihu, nnavepa ira Joze anikurumuwele yotega yenno yamuirele hiyo.>> Joze agawandeliwe milanyo da abalaye dile, ohoromaga nla.

¹⁸ Eto noira enne abalaye ale kohozaga, aliwa fiya vamentoni vaye, aliwa mukokorela, keraga: <<Hiyo atene nnafwanyeya eva, nnafuna nikale azari enyu.>>

¹⁹ Mbwenye Joze ohowakula, liye awandela abalaye ale eraga: <<Nyo kamuove. Miyo kannauirelani yabure. Tchoira miyo kadili vamalroni va Mulugu.

²⁰ Na ibaribari nyo malambo a mundulrimu youmbuwela yenyu yali yodiirela ibure, mbwenye Mulugu youmbuwela yaye yali yodiirela upama ira atu oindjiva kawande vulumuwa muwari mwa miyo nnga munaonela nyo peno va.

²¹ Mwa eno, nyo kamuove. Miyo nnerege uing'anelani, roma nyo ababi pakana ahiminyu.>> Mwa enne Joze ohalimbiha, aahagalalihaga abalaye ale.

Kwa wa Joze

²² Joze akala Ijipitu, vamohi na atu atene a vande va babaye. Joze kalawo waye watene amanle yaka 110.

²³ Liye ohofiyeda aona azuliye, ahima a mwanaye Efarayimi. Joze aabalra ahima a Makiri, mwana Manasesi nnga ahimaye.

²⁴ Siku nimohi Joze ohowonga na abalaye ira: <<Miyo eni dihanle vang'ono ira dikwe. Mbwenye Mulugu unoza aukamihedeni, aukumihenimo muIjipitu muno ira audowenani ilambo yenno yalumbenle liye avaha makolo ehu Abarahamu, Izaki, na Jako.>>

²⁵ Evale Joze ohalumbeliha abalaye Ana Izarayeli ale eraga: <<Mwa ibaribari Mulugu unoza aukamihedani ira muvenyemo muIjipitu muno. Nnauvepani ira mwadowaga, makuvaga munahiye.>>

²⁶ Noira enne, mulombwana Joze ohokwa aganna yaka 110. Agakwile, maningo aye kohozoliha murombwe ira ahavunde, aliwa muhela mukaxawuni muhiya muIjipitu emule, mbwenye tchamukoyile. Kukala mazu a livuru na Jenesesi.