Jenesesi 49 - Mazu Otchena a Mulungu

Mazu a Jako aalanyaga ahimaye

¹ Noira eno, mulombwana Jako ohaitanihaga ahimaye atene, liye ira: <<Muze vali miyo vano ira duwandeleni jatene jinafuna uireyelagani malambo anafuna za sogolro.

² Muze mudiwerewere nyo ana Jako ira muvwe yenno inafuna wonga babinyu Izarayeli.>>

³ Aliwa kagazile, liye ohoromaga wonga na mulombwana Rubeni eraga: <<We mulombwana Rubeni uli mwanaga oroma, ku wonga weyo uli kopolo daga eto uli jovaha jaga joroma mwasiwa weyo uli mwanaga oroma wa uzombweni waga. Weyo eni muwari mwa abalawo atene wogokala oroma zela undimuwa eto wogokala oroma zela kopolo.

⁴ Masiki ulive mwana oroma eni weyo kuli oroma mwasiwa weyo uli nnga mahindje a kopolo anabwanyula. Tchoira weyo uhugona na muhiyanaga wang'ono vakamani vaga, we takaliha nipawu naga. Na mwasa wenno kunakala mundimuwa.>>

⁵ Noira enne, ohowongaga eraga: <<Eto mulombwana Simeyawu vamohi na Levi, mutu na mbalaye, aliwa masupada ewa ali oairelana afwiwa ubure.

⁶ Miyo dagarati, mmirimani mwaga kadili na aliwa na zelru dewa. Aliwa kagumana, miyo kadikalevo! Mwasiwa aliwa motakaleliwa mwewa, kohapa alombwana eto na mwasa owalreda kohorangaliha mendo da ng'ombe.

⁷ Takaleliwa wewa wohokala wa masika na uwali wewa utembelrelreye mwasiwa takaleliwa wewa wohosimbwa eto uwali wewa wagatatamuwile, tchanna tangaranga. Miyo nnoza daamwalanihe muwari mwa ilambo ya Jako eto nnoza daamwade muwari mwa aIzarayeli atene.>>

⁸ Noira enne, Jako ohowelelave wonga eraga: <<Mbwenye zela weyo mulombwana Juda, abalawo atene anoza kautamalelege. Eto weyo unoza wahindege makohi a amwidani awo. Ahima atene a babawo anoza kaukokorelege.

⁹ Weyo Juda unakala nnga podogoma mung'onong'ono wenno unakuma masayelo agahindile mwanainyama. Liye unokokora, liye vikunga nnga podogoma wa mulombwana nari podogoma wa muhiyana. Kodi bani unafuna muwaniheda?

¹⁰ Mulombwana Juda kalivo mutu mmohiwa unafuna muwaka umwene waye, nne ikumbuzo yaye ya umwene, fiyeda tempu inafuna liye za vahiwa umwene waye wa ibaribari. Malogo matene anerege zana mivaho, kanvahege eto atu atenene anerege nvwelela.

¹¹ Uva unafuna liye kana unokala oindjiva fiyeda amangelele mwana kavalo yaye nari mwana buru waye vamuratchini wapama wa uva ira atakunege. Vinyu unafuna liye kana unakala oindjiva fiyeda ira afulrege jowara jaye na vinyu nnga mahindje eto unerege fulra kapaye na sangiri na uva.

¹² Meso aye anomala fila na mwasa ong'wa vinyu eto meno aye anakala otchena na mwasa ong'wa mukaka.>>

¹³ Evale Jako ohowongagave eraga: <<Eto zela mulombwana Zebuloni, liye unoza akalege tcherela ya bara. Eto unokana nimburo vinafuna imelaga mwadeya. Madilre aye anoza kafiye ilambo ya Sidoni.

¹⁴ <<Zela mulombwana Isakari, liye unakala nnga buru wa kopolo, wenno ugonatile vari va mitolro daye, avumaga.

¹⁵ Liye agaonne ira uhumala vuma pama mwilamboni mwapama, unokokora, liye kapatcha mitolro daye dile vafudi vaye, liye dowaga. Eto liye unakalege nnga muzari orumiwa.

¹⁶ <<Zela mulombwana Dani, liye unerege atonga atwaye nnga jinaireya muwari mwa malogo amohiwa a Izarayeli.

¹⁷ Dani liye unakalege nnga nyowa inakala mmambalo mwa rampa, unakalege nnga ivili inavitala mundila inaluma nnyalo na kavalo, kavalo ile aliwa venya sogolro mmoriheda mundulri mwinnya wenno agwenlevo.>>

¹⁸ Mulombwana Jako ohowongagave eraga: <<Mbwenye miyo vano nnadediheda vulusiwa wokumela wa nyo so Yehova.>>

¹⁹ Evale liye ohowongagave eraga: <<Zela mulombwana Gadi, liye unoza awakiwege fwaramento daye na amadjuba. Mbwenye liye agawakiwe jengo jaye jile, unoza amaruwe aaharege, arome awaka fwaramento daye.>>

²⁰ <<Ilambo ya mulombwana Azeri inerege kuma jodja jidjindji eto kajinakalege jodja ja burebure. Azeri unadjege jejo jinadja amwene.

²¹ <<Zela mulombwana Nafitali, liye gu nase otapuliwa. Unokuwa akumihaga mazu apama.

²² <<Zela mulombwana Joze, liye unakalege nnga mutengo ovaha pama uzaliwe tcherela ya isime, avahaga jovaha jidjindji eto tambi daye dile diviraga vazulu va ntchihi.

²³ Aliba mafumo kohoroma muhara mwa uwali, aliwa kohomuvokela mafumo ewa eto kohomuharahara na makalelo ohokala a masika.

²⁴ Mbwenye Mulugu wa Kopolo wa Jako, Namakumbuza wa Izarayeli, Nibwe na Izarayeli unoza amukamihede ira urwa naye nikalege notambula nene eto ira mandaye kahangurumelege.

²⁵ Joze, unakamihediwege na Mulugu wa Kopolo Datene, Mulugu wa babaye Jako eto unerege mureliha zela mahindje a zulu eto unomureliha zela mahindje a vati va teya, unomureliha mwa ahima adjindji vamohi na jifuwo jidjindji.

²⁶ Mareliho nnauvaha miyo babawo anokwaranya mareliho a makolo aga. Mareliho anauvaha miyo ba malukulu kwaranya mwango dohomala. Mareliho matene anna kakale vamuru va Joze, kakale vakoveni va wenno usakulriwile muwari mwa abalaye atene.

²⁷ <<Zela mulombwana Benjami, liye unakala nnga mwanambwa wa mukokolani owopiha. Liye na mabebehi unatakunege nyama nnafuna liye sayaga eto tchiguwoni unerege gawa jaawakile liye afwaye.>>

²⁸ Ala ba malogo kumi na menli a Izarayeli vamohi na mazu aawandela babiwa tempu yaareliha liye. Kada mwana ohonvaha mareliho aye onfwanelela.

Kwa wa Jako

²⁹ Nomala eno, mulombwana Jako ohawandelaga ahimaye ale eraga: <<Miyo eni dihanle vang'ono ira dikwe, didowe dagumane na makolo aga. Mbwenye dakwa, mudowe mwadikoye wewo ukoyiwile makolo aga, nifukwe nnafwanyeya mmundani mwa Eforoni, nkuda Eti,

³⁰ neno nnafwanyeya Makepela makumelo wa nzuwa wa Mamere, ilambo ya Kana, nifukwe neno Abarahamu agunle liye vamohi na munda watene mmandani mwa mulombwana Eforoni nkuda Eti ira mundole akale nimburo noakoyamo atwaye.

³¹ Ku wewo ukoyiwile Abarahamu na muhiyanaye Sara, Izaki na muhiyanaye Rebeka eto ku wewo dimukoyile miyo muhiyanaga Leya.

³² Nifukwe nne vamohi na mundiwene mwemo munafwanyeya atu naguliwe na akuda Eti.>>

³³ Jako amalaga akokomeza ahimaye mazu anne, ohogonantigi vakamani vaye, ora imohive ku vuma wogomiheda, liye mariheya, dowa gumana na makolo aye anno kakwile.