Jenesesi 48 - Mazu Otchena a Mulungu

Izarayeli ohomureliha Efarayimi na Manasesi

¹ Jatene eji jagaireyile, vagamanle malambo, Joze ohowandeliwa ira: <<Babawo murenda.>> Evale liye ohovenyaga na ahimaye ambinli Manasesi na Efarayimi ira kadowe kampande.

² Aliwa kagafiyile wewule, ohokalawo mutu mmohi adowilege muwandela mulombwana Jako ira: <<Mwanawo Joze uhuza ira aupande.>> Izarayeli agavwile enne, ohovilimbihedaga, liye venya garati vakamani vaye.

³ Joze agafiyile vali babaye vale, Jako ohoromaga muwandela eraga: <<Mulugu wa Kopolo Datene ohoditwanyuwela sidadi ya Luji, ilambo ya Kana, liye direliha.

⁴ Mulugu adirelihaga ohodiwandela ira: <Miyo nnosakanya ira weyo waabale ahima, muindjive, mufiyede za kala malogo madjindji. Eto nnoavaha ilambwela ahimawo ira ikale yewa, malambo matene a mukalakala.> >>

⁵ Evale Jako ohowongagave eraga: <<Ahimawo ambinli anno kabaliwile Ijipitu uno miyo dahanaze, aliwa baga. Efarayimi na Manasesi ba ahimaga nnga Rubeni na Simeyawu.

⁶ Mbwenye waabala ahima amohiwa, anno banafuna kala awo. Eto ahima anafuna we abala anowatchela jorayela muwari mwa Manasesi na Efarayimi.

⁷ Miyo nnairela eno na mwasa wa mmawo Rakeli. Tchoira hiyo nikumaga ilambo ya Padani, miyo dohokukumuwaga muwari moira liye ohokwa mwilamboni mwa Kana nahanafiye ilambo ya Efarata. Agakwile miyo dohomukoya mmambalo mwa ndila yodowa Efarata.>> (Efarata malambo anna unaitaniwa na nzina na Beleme.)

⁸ Mwa enne mulombwana Izarayeli agaaonne ahima a Joze ale, ohonfukaga, liye ira: <<Nnga ahima anna bani?>>

⁹ Evale Joze ohomuwakulaga babaye, liye ira: <<Ala ba ahimaga anno Mulugu udivahile liye ilambo ya Ijipitu ila.>> Noira enne, Jako ohowongaga eraga: <<Kaasusedihe uno ira daarelihe.>>

¹⁰ Na mwasa oulula, Izarayeli meso aye kohogoma, fiyeda liye haonaga. Mwa enne ahimale liye kawanda aona pama. Evale Joze ohasusedihaga ahimale valigi babaye vale. Jako ohabejari, liye akumbarela.

¹¹ Nomala eno, Izarayeli ohomuwandela mwanaye Joze eraga: <<Miyo kadaumbuwela ira nnoza dione kove yawo akoka. Mbwenye Mulugu uhudirumeliha ira difiyede uona vamohi na ahimawene.>>

¹² Evale Joze ohodowaga atukula ahimaye ambinli ale mmandani mwa babaye Jako mwali atu mule, liye kokora afiyihaga kove yaye vati.

¹³ Nomala eno, Joze ohomuhidedaga Efarayimi na muwono odjana, liye muimeliha muwononi oromana wa babaye Izarayeli eto ohomuhidedaga Manasesi na muwono oromana, liye muimeliha muwononi odjana wa babaye.

¹⁴ Mbwenye Izarayeli atapulaga miwono daye, liye ohopilringanyaga. Muwono odjana wenno afuna dowa vamuru va mwana oroma, adowile vamuru va Efarayimi, agali ali mwana wa ng'onong'onuwa. Eto muwono waye oromana dowa hela vamuru va Manasesi, wenno afwanyeya agali mwana wa mulukuluwa.

¹⁵ Noira eno, mulombwana Izarayeli ohoromaga mureliha Joze eraga: <<Mulugu wenno awenda na ababaga Abarahamu na Izaki, Mulugu wenno unadisogolrelra nnga namakumbuza waga kalawo waga watene fiyeda peno,

¹⁶ mungelro wenno unazetcha diwombola mwa jotakala jaga jatene aarelihe azombwala. Nzina naga na nzina na ababaga Abarahamu na Izaki niromoliwege mwa aliwa eto kakayena ahima adjindjene mwilamboni.>>

¹⁷ Mbwenye Joze agaonne ira babaye ule ahenle ndanda nodjana vamuru va Efarayimi mwana wa mung'onong'ono, kaaziveliwile. Na mwasa wenne, ohindaga ndanda na babaye nodjana ira akumihevo vamuru va Efarayimi, atamihede vamuru va Manasesi mwanaye wa mulukulu ule.

¹⁸ Evale Joze ohowongaga na babaye ule, liye ira: <<Babani kahi eno. Ula gu mwana murandji. Muhele ndanda ninyu nodjana vamuru vaye.>>

¹⁹ Mbwenye Jako ohokondaga tamiha miwono dile, liye muwakula eraga: <<Miyo dihiiziwa mwanaga, miyo dihimala iziwa jejo. Ahima anabaliwege mwa Manasesi, na aliwene anakala nlogo nidjindji. Mbwenye mbalaye wa mung'onong'ono, gunafuna kala mundimuwa mukwaranya nfwaye eto mwa ahimaye munokuma malogo madjindjene.>>

²⁰ Mwa enne Izarayeli oharelihaga ahimale siku nenne eraga: <<AIzarayeli kafunaga nvaha mutu mareliho anaromolege mazina enyu, kerege: <Mulugu aureliheni na makalelo nnga amurelihile liye Efarayimi na Manasesi.> >> Mwa enne Izarayeli ohomuhela Efarayimi sogolro, hiya Manasesi.

²¹ Nomala eno, Izarayeli ohowonga na mwanaye Joze eraga: <<Weyo unodiona eni mwanaga, dihanle vang'ono ira dikwe. Mbwenye miyo dakwa, Mulugu unakalave na nyo, ante unofiyeda ukumihanimo mwilamboni muno, auwelihedeni ilambo ya makolo enyu.

²² Miyo nnafuna duvahe hiyanihana na abalawo pandi imohi ya ilambo ya Kana, pandi ya mwangoni, yenno daawakile miyo aAmore diwanaga na supada naga vamohi na urwa naga.>> Muwari mwa mazu anafwanyeya kapitulu 49, mulombwana Jako unaalanya ahimaye a anapongwe. Muwari moalanya, liye unawonga zela makalelo anafuna atu kana sogolro. Ahimaye amohiwa kohorelihiwa na Jako, ahimaye amohiwa ohatembelrelra. Asimbwile tembelrelreya banno kairetchana jengo jotakala. Mbwenye orelihiwa bure banno kairetchana jengo japama. Mazwala Jako kawongile mwa toto daye, mbwenye awongile muwari mosogolrelriwa na Mulugu. Ku wonga Mulugu gwanvahile kopolo dowonga zela makalelo kafuna ahimaye kakayena sogolro.